#Abai175: شۆەيتساريالىق ستۋدەنتتەر اباي ولەڭىن وقىدى
شۆەيتساريانىڭ گليون (Glion Institute of Higher Education) ۋنيۆەرسيتەتىندە ءبىلىم الىپ جۇرگەن يوردانيا، يسپانيا، يتاليا، قىتاي، ليۆان جانە شۆەيتساريا جاستارى ءوز تىلدەرىندە ابايدىڭ «كۇز» ولەڭىن وقىدى.
ناۋقاندى قازاقستاندىق ستۋدەنت داۋلەت ۇرانحايەۆ ۇيىمداستىرعان. ول كۋرستاستارىنا ابايدىڭ ءومىربايانىن، قازاق تاريحىنداعى الار ورنىن ءتۇسىندىرىپ، شاعىن بەينەروليك جاساعان.
«ءبىز اباي-175 ەستافەتاسىن سىزدەرگە جولدايمىز»، - دەدى بەينەروليكتە داۋلەت ۇرانحايەۆ.
ايتا كەتەيىك، بۇگىن شۆەيتساريا كونفەدەراتسياسىنىڭ پرەزيدەنتى ۋلي ماۋرەر قازاقستانعا رەسمي ساپارمەن كەلدى.
ساپار اياسىندا ۋلي ماۋرەر قازاقستان پرەزيدەنتىمەن جانە پرەمەر-مينيسترىمەن كەزدەسىپ، ەكى ەلدىڭ ىسكەر توپتارىنىڭ «دوڭگەلەك ۇستەلىندە» ءسوز سويلەيدى.
ق ر پرەزيدەنتى قاسىم-جومارت توقايەۆتىڭ «اباي قۇنانباي ۇلىنىڭ تۋعانىنا 175 جىل تولۋىنا ارنالعان» جارلىققا قول قويۋى «بولاشاق» تۇلەگى باستاعان اكسياعا تىڭ سەرپىن بەردى دەۋگە بولادى.
كۇن سايىن اباي ولەڭدەرىنەن ءۇزىندى وقۋشىلار قاتارى وسۋدە. چەللەندجدى ق ر پرەزيدەنتى قاسىم-جومارت توقايەۆ تا قولداپ، ۇلى اقىننىڭ ولەڭىن وقىپ، ەستافەتانى مينيسترلەر مەن بەلگىلى ءانشى ديماش قۇدايبەرگەنوۆكە تاپسىردى.
وسىلايشا، پوەزيا ەستافەتاسىن يگور كرۋتوي، ق ر اقپارات جانە قوعامدىق دامۋ ءمينيسترى داۋرەن ابايەۆ، قازاقستاننىڭ رەسەيدەگى ەلشىسى يمانعالي تاسماعامبەتوۆ، رەسەيدىڭ شوۋ-بيزنەس وكىلدەرى، اقتوبەنىڭ اكىمى وڭداسىن ورازالين، قازاقستاننىڭ حالىق ءارتىسى، پروفەسسور تالعات تەمەنوۆ جالعاستىرىپ اكەتتى.