Ákimder qosymsha 3 myńǵa jýyq grant bóldi
«Bıyl memlekettik bilim granttaryna qosymsha jergilikti atqarýshy organdarynyń esebinen 2 700-ge jýyq grant bólinip otyr. Normatıvtik bazamyz daıyn. Bul granttar aıdyń aıaǵyna deıin taratylady», - dedi E.Saǵadıev Úkimettiń búgingi otyrysynda.
Mınıstrdiń aıtýynsha, bıyl ulttyq biryńǵaı testileý men keshendi testileýdi tapsyrmaǵan, ıa bolmasa, shekti deńgeıden asa almaǵandar úshin 15-19 tamyzda qosymsha testileý uıymdastyrylady.
«Ony da tapsyra almasa, ótken jyldaǵydaı joǵary oqý ornyna bir semestrge qabyldana beredi. Biraq kelesi jyly qańtar aıynda testileýdi qaıta tapsyrýy qajet», - dep atap kórsetti E.Saǵadıev.
Aıta keteıik, bıylǵy ulttyq biryńǵaı testileýge respýblıka boıynsha 100 myńnan astam túlek ótinish bildirdi. Olardyń 75 prosenti qazaq tilinde oqýǵa nıet etse, qalǵan 25 prosenti orys tildi bólimderdi tańdaǵan. Memlekettik granttar da solaı taratyldy. UBT-da ortasha upaıdyń kórsetkishi 83-ti qurady. Shekti deńgeı - 50 upaıdy 84 myń túlek jınady. Test tapsyrǵandar smartfon, roýter, modem sıaqty 82 myńnan astam qural-jabdyqty, sondaı-aq, 28 myńnan astam shpargalka alyp ótpekshi bolǵan.