17:57, 19 - ناۋرىز 2023 | GMT +6
باس پروكۋراتۋرا سايلاۋ بارىسى تۋرالى: ءۇش وبلىستا 9 زاڭبۇزۋشىلىق تىركەلدى
استانا. قازاقپارات - داۋىس بەرۋ پروتسەسى باستالعاننان بەرى ءۇش وبلىستا 9 زاڭ بۇزۋ فاكتىسى رەسمي تىركەلگەن.
بۇل تۋرالى باس پروكۋراتۋرا وكىلى ازامات سارعازين Qazaqstan تەلەارناسى وتكىزىپ جاتقان ونلاين تەلەمارافوندا ايتتى، دەپ حابارلايدى قازاقپارات ءتىلشىسى.
«جۇرگىزىلىپ جاتقان مونيتورينگ ناتيجەسىندە ءدال وسى ۋاقىتتا سايلاۋ تۋرالى زاڭنامانى بۇزۋدىڭ 9 فاكتىسى تىركەلدى. ولار الماتى وبلىسىندا ەڭبەكشى قازاق، جامبىل، رايىمبەك جانە ۇيعىر اۋداندارىنداعى سايلاۋ ۋچاسكەلەرىندە؛ جەتىسۋ وبلىسىندا قاراتال جانە كەربۇلاق اۋداندارىنداعى ۋچاسكەلەردە؛ سولتۇستىك قازاقستان وبلىسىنىڭ ايىرتاۋ جانە جامبىل اۋداندارىنداعى ۋچاسكەلەردە بولعان.
بۇل زاڭبۇزۋشىلىقتار كوميسسيا مۇشەلەرى تاراپىنان ازاماتتارعا باسقا ادامدار ءۇشىن داۋىس بەرۋگە مۇمكىندىك بەرۋمەن بايلانىستى»، - دەدى باس پروكۋراتۋرا وكىلى.