بيىل جابىلعان 9 بانكتىڭ سالىمشىلارى وتەماقىنى قالاي الۋىنا بولادى
9 تامىز 21:58

بيىل جابىلعان 9 بانكتىڭ سالىمشىلارى وتەماقىنى قالاي الۋىنا بولادى

نۇر-سۇلتان. قازاقپارات - جابىلعان بانكتەردەن وتەماقىسىن ۋاقىتىلى الماعان سالىمشىلار ءوتىنىش بەرۋ ارقىلى اقشاسىن قايتارۋىنا بولادى.

بۇل ورايدا قازاقستاننىڭ دەپوزيتتەرگە كەپىلدىك بەرۋ قورى ءوتىنىش بەرۋ تاسىلدەرىن ءتۇسىندىردى، دەپ حابارلايدى قازاقپارات ءتىلشىسى.

بيىل قازاقستاندا 9 بانك جابىلدى. ولار - «قازينۆەستبانك» ا ق، «ۆاليۋت-ترانزيت بانك» ا ق، «Delta Bank» ا ق، «Qazaq Banky « ا ق، «ەكسيمبانك قازاقستان» ا ق، «استانا بانكى» ا ق، «Tengri Bank» ا ق، «AsiaCredit Bank» ا ق، «Capital Bank Kazakhstan» ا ق.

اتالعان بانكتەردە دەپوزيتى بار سالىمشىلارعا كەپىلدىك وتەماقى تولەۋ مەرزىمى اياقتالدى. قاراجات ازاماتتاردىڭ زەينەتاقى قورىنا اۋدارىلدى.

دەگەنمەن وسى ارالىقتا قانداي دا ءبىر جاعدايعا بايلانىستى وتەماقى الا الماي قالعان ازاماتتار دا بار.

قازاقستاننىڭ دەپوزيتتەرگە كەپىلدىك بەرۋ قورىنىڭ دەرەگىنشە، كەشىككەن ادامدار دالەلدى سەبەپتەرىن راستاپ، قازىر دە ءوتىنىش بەرە الادى.

دالەلدى سەبەپ بويىنشا وتەماقىنى تاراتىلاتىن بانكتەردە جەكە شوتى بار ادامدار نەمەسە سالىمشىلاردىڭ مۇراگەرلەرى الۋعا قۇقىلى.

دالەلدى سەبەپ بولىپ ەسەپتەلەتىن جاعدايلار:

- اسكەري قىزمەتكە ورنالاسۋ؛

- قازاقستان رەسپۋبليكاسىنىڭ تەرريتورياسىنان تىس جەردە بولۋ؛

- سالىمشىنىڭ مۇراسىن قابىلداۋ جانە مۇرانى يەمدەنۋگە نەمەسە اشۋعا بايلانىستى وزگە دە سەبەپتەر؛

- باس بوستاندىعىنان ايىرۋ ورىندارىندا بولۋ؛

- سوت انىقتاعان وزگە دە ءمان-جايلار.

وسى اتالعان جاعدايلار مەن سەبەپتەردى قۇجات تۇرىندە راستايتىن رەسمي انىقتاما بولسا، وندا دەپوزيتتەرگە كەپىلدىك بەرۋ قورىنا ءوتىنىش جولداۋعا بولادى.

ءوتىنىشتىڭ ۇلگىسى ق د ك ب ق سايتىندا جاريالانعان. سالىمشى ونى قاعاز كۇيىندە شىعارىپ، دالەلدەمەلەرىن ەنگىزىپ، اتالعان ورگانعا تاپسىرۋى ءتيىس.

دەپوزيتتەرگە كەپىلدىك بەرۋ قورى ءوتىنىشتى 5 جۇمىس كۇنى ىشىندە قارايدى. ول وسى ۋاقىت ىشىندە كەپىلدىك وتەماقىنى تولەۋگە ءتيىس. الايدا، قۇجاتتار سايكەس كەلمەگەن جاعدايدا ءوتىنىش كەيىن قايتارىلادى. قاراجات سالىمشىنىڭ ءوزى كورسەتكەن بانك شوتىنا اۋدارىلادى.

ەگەر قانداي دا ءبىر سەبەپتەرگە بايلانىستى ءوتىنىش ماقۇلدانباسا، وندا سالىمشى قۇجاتتاردى تەكسەرىپ، ءوتىنىشتى قايتا جولداي الادى.

جاڭالىقتار