وليمپيادا ويىندارىنا قىتايداعى 9 قانداسىمىز قاتىسىپ، ەكەۋى جۇلدە العان

نۇر-سۇلتان. قازاقپارات - سوڭعى جىلدارى قىتايداعى ات توبەلىندەي از عانا قانداستارىمىز اراسىنان وليمپيادا ويىندارىنا 9 قانداسىمىز قاتىسقان. ونىڭ ىشىندە 5-ەۋى جازعى وليمپيادا ويىندارىندا، تورتەۋى قىسقى وليمپيادادا سىنعا ءتۇستى.

اتاپ ايتساق، جازعى وليمپيادا ويىندارىندا قىتايداعى قانداستارىمىزدان تۇڭعىش وليمپياداعا قاتىسقان ءالنۇر تورگە ۇلى.

ول 2004-جىلى افينىدا وتكەن وليمپيادا ويىندارىندا گرەك-ريم كۇرەسىنەن سىنعا ءتۇستى. بۇل وليمپيادادا بوكسشى قانات يسلام دا شارشى الاڭعا شىققان بولاتىن. الايدا، ول وليمپيادا جارىستارىنا تورگە ۇلىنان كەيىن شىققاندىقتان ەكىنشى قانداس رەتىندە ەستە قالدى.

2008-جىلى بەيجىڭ قالاسىندا وتكەن جازعى وليمپيادادا قانات يسلام قىتايداعى قانداستار اراسىندا تۇڭعىش وليمپيادا جۇلدەگەرى اتانعانىن جاقسى بىلەمىز.

2018-جىلعى اق وليمپيادا ويىندارىندا قانداسىمىز ارشىنعازى شاكەن ۇلى كونكي سپورتىنان العاش رەت سىنعا ءتۇستى.

ال وتكەن جىلى توكيو وليمپياداسىندا قىتايدان شىققان ەكىنشى قانداسىمىز جۇلدەگە ءىلىندى. مىنە، بيىل بەيجىڭدە ءوتىپ جاتقان اق وليمپيادا ويىندارىندا ءۇش قانداسىمىزعا جانكۇيەر بولدىق.

قاراپ وتىرساق، قىتايداعى ات توبەلىندەي از عانا قانداسىمىزدان وسى كۇنگە جازعى جانە قىسقى ويىندارعا جالپى سانى 9 سپورتشى قاتىسىپ ۇلگەرگەن. بولاشاقتا بۇل سان تاعى دا ۇلعايا تۇسەدى دەگەن سەنمىزدەمىز.

ەندى ءار وليمپيادا مەن ءار سپورتشى تۋرالى جەكە-جەكە توقتالىپ وتسەك.

جازعى وليمپيادا ويىندارى:

افينى وليمپياداسى (گرەكيا) - 2004-جىل

2004 -جىلى گرەكيانىڭ افينى قالاسىندا وتكەن وليمپيادا ويىندارىنا قىتايداعى قانداستارىمىزدان ەكى سپورتشى باردى. ونىڭ ءبىرى گرەك-ريم كۇرەسىنىڭ شەبەرى ءالنۇر تورگە ۇلى بولسا، ەكىنشىسى بوكسشى قانات يسلام بولاتىن. الايدا، گرەك تورىندە ەكەۋى دە جۇلدەگە ىلىگە المادى.

ءالنۇر وليمپيادا ويىندارىن 13-ورىنمەن اياقتاسا، قانات ىرىكتەۋ سىندارىنان وتە الماعان بولاتىن.

وسى وليمپيادادان كەيىن حالىقارالىق دارەجەدەگى سپورت شەبەرى، ازيا چەمپيوناتىنىڭ كۇمىس جۇلدەگەرى باپكەرلىككە بەت بۇردى. قانات بولسا ارى قاراي كارەراسىن جالعاستىردى.

بەيجىڭ وليمپياداسى (قىتاي) - 2008-جىل

2008-جىلعى بەيجىڭ وليمپياداسى شەتەل قازاقتارى اراسىنان قانات يسلامنىڭ قولا جۇلدەگەر اتانۋىمەن ەستە قالدى. وسىلايشا، قانات قىتايداعى وليمپيادا ويىندارىنان جۇلدە العان تۇڭعىش قازاق رەتىندە تاريحتا قالدى.

كەيىن قانات يسلام اتاجۇرتىنا ءبىرجولا قونىس اۋداردى. قازىر كاسىپقوي بوكستا سىنعا ءتۇسىپ ءجۇر.

ريو-دە-جانەيرو وليمپياداسى (برازيليا) - 2016-جىل

2016-جىلعى ريو وليمپياداسىندا ەرلانبەك كاتەي ۇلى ەسىمدى تاعى ءبىر قازاق قىتاي اتىنان ونەر كورسەتتى. ول 1990-جىلى قىتايدىڭ التاي ايماعىندا دۇنيەگە كەلگەن. ول - قىتايداعى قازاقتار اراسىنان وليمپياداعا جولداما العان ءۇشىنشى قازاق.

الايدا ريودا قانداسىمىز وليمپيادا تۇعىرىنان كورىنە العان جوق.

توكيو وليمپياداسى - 2021-جىل

توكيودا وتكەن جازعى وليمپيادا ويىندارىنا قىتايداعى قانداستارىمىزدان ەكى سپورتشى قاتىستى: ءبىرى بوكسشى بولسا، ەكىنشىسى - گرەك-ريم كۇرەسىنىڭ شەبەرى.

بوكستان 75 كەلى سالماقتا سىنعا تۇسكەن توقتاربەك تاڭاتقان ۇلىنىڭ توكيودا جولى بولا قويمادى.

الايدا، ەكىنشى قانداسىمىز گرەك-ريم كۇرەسىنەن 60 كەلى سالماقتا بەلدەسكەن ءۋاليحان سەرىك ۇلى بەيجىڭ وليمپياداسىنداعى قانات يسلامنىڭ جەتىستىگىن قايتالاپ، قىتاي قورجىنىنا قولا مەدال سىيلادى.

وسىلايشا، ەكى قانداسىمىز - قانات يسلام مەن ءۋاليحان سەرىك ۇلى وليمپيادا ويىندارىندا قىتاي قۇراماسىنا ەكى مەدال سىيلادى.

قىسقى وليمپيادا ويىندارى:

پحەنچحان وليمپياداسى (وڭتۇستىك كورەيا) - 2018-جىل

قىسقى وليمپيادا ويىندارىنا قىتايداعى قانداستارىمىز العاش رەت 2018-جىلى وڭتۇستىك كورەيانىڭ پحەنچحان قالاسىندا وتكەن وليمپياداعا قاتىستى.

اتاپ ايتساق، پحەنچحاندا شىڭجاڭدىق قانداسىمىز ارشىنعازى شاكەن ۇلى كونكيمەن جۇگىرۋدەن سىنعا ءتۇستى. الايدا ول جەڭىس تۇعىرىنان كورىنە العان جوق.

ارشىنعازى ءۇرىمجى قالاسىندا دۇنيەگە كەلگەن. 2010-جىلى كونكيمەن جۇگىرۋدەن قىتايدىڭ ۇلتتىق قۇراماسىنىڭ مۇشەسى اتانىپ، ءبىرىنشى رەت وليمپياداعا قاتىستى.

بەيجىڭ وليمپياداسى (قىتاي) - 2022-جىل

بۇل كۇندەرى بەيجىڭدە XXIV قىسقى وليمپيادا ءوتىپ جاتىر. وسىعان دەيىن حابارلاعانىمىزداي اتالعان دودادا ءۇش بىردەي قانداسىمىز باق سىنادى.

ولار: كونكي سپورتىنان - اقنار اداق، شاڭعى سپورتىنان - بايان جالىن جانە قادىس بەدەلحان ۇلى.

وكىنىشكە قاراي، ۇشەۋى دە جۇلدەگە ىلىنە العان جوق.

كونكيشى اقنار اداق - شىنجاڭ ولكەسى، قۇتىبي اۋدانىندا دۇنيەگە كەلگەن. بۇعان دەيىن 2019-جىلعى قىتاي بىرىنشىلىگىندە 5000 مەترلىك جارىستا - «التىن»، 3000 مەتردە - كۇمىس مەدال العان.

حالىقارالىق جارىستارعا دا قاتىسىپ، جۇلدەگەرلەر قاتارىنان كورىنىپ ءجۇر. 2016-جىلى قىتاي ۇلتتىق قۇراماسىنا قابىلدانعان.

شاڭعىشى بايان جالىن قىزى شىڭجاڭ ولكەسى، التاي ايماعى، جەمەنەي اۋدانىندا دۇنيەگە كەلگەن.

قىتاي بىرىنشىلىكتەرىنىڭ جارىستارىنا قاتىسىپ، بىرنەشە مارتە جەڭىمپاز اتانعان. 2020-جىلى درەزدەندە (گەرمانيا) وتكەن الەم كۋبوگىندا 9-ورىن العان.

تاعى ءبىر شاڭعىشى قانداسىمىز قادىس بەدەلحان شىڭجاڭ ولكەسى، سانجى وبلىسىندا دۇنيەگە كەلگەن.

قىتاي بىرىنشىلىگىنىڭ جەڭىمپازى. 2017-جىلدان بەرى قىتاي ۇلتتىق قۇراماسىنىڭ ۇزدىك سپورتشىلارىنىڭ ءبىرى سانالادى.

اۆتور: كۇنسۇلتان وتارباي