وتكەن 9 ايداعى رەسپۋبليكالىق بيۋدجەتتىڭ شىعىنى قانشا

نۇر-سۇلتان. قازاقپارات - 9 ايدا رەسپۋبليكالىق بيۋدجەتتەن شىعىستارعا بولىنگەن 11 تريلليون تەڭگەنىڭ 13 ميلليارد تەڭگەسى يگەرىلمەگەن، دەپ حابارلايدى قازاقپارات ءتىلشىسى.

ۇكىمەت وتىرىسىندا ق ر قارجى ءمينيسترى ەرۇلان جاماۋبايەۆ وسىنداي مالىمەت كەلتىردى. «مەملەكەتتىك بيۋدجەتتىڭ شىعىستارى %99,7 كە، رەسپۋبليكالىق بيۋدجەتتىڭ شىعىستارى - %99,8 كە، جەرگىلىكتى بيۋدجەتتەردىڭ شىعىستارى %99,7 كە اتقارىلدى. وتكەن جىلدىڭ ۇقساس كەزەڭىمەن سالىستىرعاندا بيۋدجەتتەردىڭ بارلىق دەڭگەيلەرىندە اتقارىلۋ پروتسەنتى جوعارى. رەسپۋبليكالىق بيۋدجەت بويىنشا سوماسى 11 تريلليون تەڭگەگە شىعىستار جۇرگىزىلدى. بيۋدجەتتىڭ ورىندالماۋى 19 ميلليارد تەڭگەنى قۇرادى. ونىڭ ىشىندە 6 ميلليارد تەڭگە ۇنەمدەۋگە جاتادى. يگەرىلمەگەنى - 13 ميلليارد تەڭگە»، - دەگەن مينيستر.

اسىرەسە مادەنيەت جانە سپورت، دەنساۋلىق ساقتاۋ، ادىلەت، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرىندە شىعىستاردى يگەرۋ كەستەسى كەشىگىپ جاتقانىن ايتتى. ونىڭ سوزىنشە، يگەرىلمەۋدىڭ نەگىزگى سەبەپتەرىنە تولەم ناقتى كورسەتىلگەن قىزمەتتەر مەن ورىندالعان جۇمىس اكتىلەرىنىڭ، شوت- فاكتۋرالاردىڭ ۋاقتىلى ۇسىنىلماۋى، قازىناشىلىق ورگاندارىنا تولەم شوتتارىن كەش ۇسىنۋى، سوتتا مەملەكەت مۇددەسىن قورعاۋ جونىندەگى تالاپ- ارىز جۇمىستارىن جۇرگىزۋ سياقتى جايتتار سەبەپ بولعان. قارجى ءمينيسترى جەرگىلىكتى بيۋدجەتتەردىڭ شىعىستارىنا دا توقتالدى.

«اعىمداعى جىلى وڭىرلەرگە 2,5 تريلليون تەڭگە سوماسىندا نىسانالى ترانسفەرتتەر كوزدەلگەن. 1-قازاندا ولارعا 1 تريلليون 525 ميلليارد تەڭگە بولىنگەن. ونىڭ %99,5 ى يگەرىلدى. اتقارىلماعانى - 7 ميلليارد تەڭگە، ونىڭ ىشىندە ۇنەمدەلگەنى - 3 ميلليارد تەڭگە، يگەرىلمەگەنى - 4 ميلليارد تەڭگە. اسىرەسە تۇركىستان، اقتوبە، قىزىلوردا جانە جامبىل وبلىستارىندا شىعىستاردى يگەرۋ قارقىنى تومەن»، - دەدى ەرۇلان جاماۋبايەۆ.

ەسكە سالساق، توعىز ايدا بيۋدجەتكە 7,9 تريلليون تەڭگە ءتۇستى.

اۆتور: ەسىمجان ناقتىباي