ماسكەۋلىك 9 جاسار قىز ۋنيۆەرسيتەت تۇلەگى اتانادى
جاڭا رەكورد ورناتقان قارشاداي قىز جوعارى وقۋ ورنىنىڭ باعدارلاماسىن قازىردەن يگەرۋدە. وتباسىنداعى ۆۋندەركيند جالعىز اليسا ەمەس. اليسا تەپلياكوۆا 8 جاسىندا ءبىرىڭعاي مەملەكەتتىك ەمتيحاندى ءساتتى تاپسىرىپ، ورتا ءبىلىم تۋرالى اتتەستاتتى العاننان كەيىن بۇكىل ەلگە تانىلدى. ەندى ول اتا- اناسىنىڭ جولىن قۋىپ، ماسكەۋ مەملەكەتتىك ۋنيۆەرسيتەتىنە تۇسكەلى وتىر.
دانىشپان قىز قازىردىڭ وزىندە ءبىرىنشى كۋرستىڭ باعدارلاماسىنىڭ ءبىراز بولىگىن يگەرىپ العان. بۇدان باسقا، ول ۇيىندە جوعارى ماتەماتيكا، ىقتيمالدىق تەورياسى، سىزىقتىق الگەبرا جانە پسيحولوگيا بويىنشا وقۋلىقتاردى وقىپ جاتىر.
اليسا تەپلياكوۆا، 9 جاستاعى مەكتەپ تۇلەگى:
- پسيحولوگ، بيولوگ نەمەسە باعدارلاماشى بولاتىن شىعارمىن. بالالار نەمەسە جاس ەرەكشەلىك پسيحولوگياسىنا قىزىعامىن. بالالاردىڭ ميى قاي جاستا، قالاي داميتىنى دا قىزىق.
اليسانىڭ ءىنىسى - 7 جاستاعى حەيمدالل دا بيىل 9-سىنىپتىڭ ەمتيحانىن تاپسىرىپ، اتتەستات الدى. بۇل وتباسىندا ەكەۋىنەن باسقا لەيا، تەررا، ايلۋنگ، فەيلۋنگ جانە تەسەي ەسىمدى 5 باۋىرى بار. 4 جاستاعى لەيا رەسەيدەگى ەڭ جاس وقۋشى قىز رەتىندە تىركەلگەن.
ناتاليا تەپلياكوۆا، تەپلياكوۆتار وتباسىنىڭ اناسى:
- باسىندا بالامىز كوپ بولسىن دەپ جوسپارلامادىق. جۇمىسىمىز وركەندەپ، ءىسىمىز العا باستى. كەيىن بىرىنەن سوڭ ءبىرى 2 بالامىز تۋدى. ءبىراق قىزىق كورىپ، ءۇشىنشى بالانى تۋدىق. ۇشەۋى بولعان سوڭ، نەگە ءتورتىنشىنى تۋماسقا دەدىك.
تەپلياكوۆتار وتباسىسى ءبىراز جىل قىتايدا تۇردى. رەسەيگە ورالعان سوڭ ەرلى- زايىپتى بالالارىنىڭ قاتارلاستارىنان كوش ىلگەرى ەكەنىن بايقايدى. ءبىراق مەكتەپتەر وقۋشىلاردى ءبىلىم دەڭگەيىنە قاراي جوعارى سىنىپتارعا قابىلداعىسى كەلمەگەن. سوسىن اتا- انا ءبىلىمدى ۇيدە بەرە باستاعان. ۇلكەندەرىنە ساباقتى اكەسى بەرسە، كىشىلەردى شەشەسى وقىتقان. وسىلاي وقۋعا كۇنىنە 5 ساعاتتاي ۋاقىت كەتىپ وتىرعان.
ەۆگەني تەپلياكوۆ، تەپلياكوۆتار وتباسىنىڭ وتاعاسى:
- بۇل كەڭەستىك كەزەڭنىڭ ادىستەمەسى. ۆىگوتسكي، رۋبينشتەين، ەلكونين، داۆىدوۆتاردىڭ يدەيالارىنا نەگىزدەلگەن. باعا قويماۋ، بالانىڭ قىزىعۋشىلىعىن ۇنەمى ۇستاپ تۇرۋ، تاپسىرمانى تىم قيىنداتپاۋ تاسىلدەرىنە جۇگىنەمىز. تاپسىرما كۇردەلى بولسا، بالانىڭ نازارى باسقاعا اۋىپ كەتەدى.
ناتاليا مەن ەۆگەني بالالارىن ۆۋندەركيند دەپ ەسەپتەمەيدى. ولار وقىتۋدىڭ دۇرىس تاسىلدەرىن قولدانا بىلسە، كەز كەلگەن بالا تابىسقا جەتە الادى دەپ سەندىرەدى. ال جەرگىلىكتى بيلىك ءبىر بولمەلى پاتەردە تۇرىپ جاتقان كوپبالالى تەپلياكوۆتاردىڭ ادىستەمەسىنە دە، جاعدايىنا دا ازىرگە ەش نازار اۋدارماي وتىر.
www.24.kz