ديماش قۇدايبەرگەن 9 ايدان كەيىن ساحناعا شىقتى

نۇر-سۇلتان. ماسكەۋ. قازاقپارات - ماسكەۋدەگى ۆ ت ب ارەنادا ءداستۇرلى «جىل ءانى» كونسەرتى ءوتتى.

وتكەن عاسىردىڭ 70 -جىلدارىندا باستالعان اڭىزعا اينالعان فەستيۆال بۇل جولى بارلىق ارتىستەر مەن ولاردىڭ جانكۇيەرلەرى ءۇشىن كوپتەن كۇتكەن ۇلكەن مەرەكەگە اينالدى، دەپ حابارلايدى قازاقپارات DimashNews-كە سىلتەمە جاساپ.

بۇل - كوروناۆيرۋس پاندەمياسىنا بايلانىستى كارانتيننەن كەيىنگى رەسەيدە وتكەن العاشقى اۋقىمدى كونتسەرت. 5 جەلتوقساندا وتكەن كەشتە ديماش «تام، گدە جيۆەت ليۋبوۆ»، «Your Love « جانە جاڭا «يا سكۋچايۋ پو تەبە» اتتى ءۇش ءاندى ورىنداپ، جانكۇيەرلەرىنىڭ كوڭىلىنەن شىقتى. ءارتىس پەن Dears-تىڭ (جانكۇيەرلەر) ءبىر-ءبىرىن قاتتى ساعىنعانى انىق سەزىلدى.

«مەن قازىر باستان كەشىپ جاتقاننىڭ ءبارى - بۇرىن-سوڭدى بولماعان ەيفوريا سەزىمى. ءدال وسى ساتتە «سوزبەن جەتكىزە المايمىن» دەگەن تىركەستى ايتۋ ورىندى بولار ەدى. مەن 9 ايدان بەرى ساحناعا شىققان جوقپىن، سوندىقتان كوپشىلىك الدىندا، اسىرەسە وسىنداي قيىن كەزەڭدە قايتادان ونەر كورسەتكەنىمە وتە قۋانىشتىمىن. مەنى قولداۋعا كەلگەندەرىڭىز ءۇشىن العىس بىلدىرەمىن. مەن ءبارىڭىزدى جاقسى كورەمىن، سىزدەردى قاتتى ساعىندىم!»، - دەدى ول.

ماسكەۋگە «جىل انىنە» ءتۇرلى قالادان ديماشتىڭ جانكۇيەرلەرى كەلدى. ولار سونداي- اق كوپتەن كۇتكەن كەزدەسۋدەن العان اسەرىمەن ءبولىستى. ولاردىڭ ايتۋىنشا، ديماش تاماشا ونەر كورسەتكەن. «DimashAli « شىعارماشىلىق ورتالىعىنىڭ جەتەكشىسى قانات ايتبايەۆ Dears-كە وسىلاي جىلى قابىلداعانى ءۇشىن العىسىن ءبىلدىردى.

اۆتور: اياۋلىم التىنبەك