وڭەشىنە تيىن تۇرىپ قالعان 9 جاسار تارازدىق بالا قۇتقارىلدى
وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن ءمالىم ەتكەندەي، ويناپ وتىرعان 9 جاسار بالا بايقاماي تيىن جۇتىپ قويعان.
ءبىر ساعاتتان سوڭ تىنىس الۋى قيىنداپ، جاعدايى ناشارلاعان. ول وبلىستىق كوپبەيىندى بالالار اۋرۋحاناسىنا جەتكىزىلگەن.
«وكپە جاسۋشالارىن تۇسىرگەن رەنتگەنوگرافيا قورىتىندىسى وڭەشتىڭ جوعارعى جاعىندا بوگدە زاتتىڭ تۇرعاندىعىن انىقتادى. شۇعىل تۇردە ونى الۋ ءۇشىن بۇگىنگى كۇنى وسىنداي جاعدايدا قولدانىلىپ جۇرگەن فولەيا (يسپانيا) كاتەتەرى (رەزەڭكە تۇتىك) قولدانىلادى. 2-3 س م ۇرلەنەتىن 2 قۋىستى سيليكوندى تۇتىكتى دەنە قۋىسىنداعى زاتتاردى بوساتۋ، دارىلىك زاتتاردى ەنگىزۋ، شايۋ نەمەسە ولاردى وتكىزۋ ماقساتىندا سىرتقى ورتامەن بايلانىستىراتىن رەزەڭكە تۇتىكپەن بالاعا جالپى ناركوز سالىنادى.
جالپى بۇل ءادىس وقىستان بولعان شۇعىل جاعدايدا ءتيىمدى بولىپ سانالادى. سەبەبى، ۋاقىت ءوتىپ كەتسە، دەنەگە بەيىمدەلىپ كەتكەن زاتتى الۋ قيىنعا سوعادى. دارىگەرلەر جوعارىدا اتالعان ءادىستى قولدانا وتىرىپ، ۋاقىتىلى كومەك كورسەتكەننىڭ ارقاسىندا بالانىڭ جاعدايى جاقسارىپ، بالا مەديتسينالىق ەم- شارادان كەيىن ۇيىنە قايتارىلدى»، - دەلىنگەن حابارلامادا.
بالانىڭ ومىرىنە ءقاۋىپ توندىرگەن وقىس جاعدايدا جەدەل شەشىم قابىلداعان تاجىريبەلى حيرۋرگتار نۇرتۋعان ءالقۋاتوۆ پەن ءالىمجان الكەنوۆ مۇنداي وقيعا ءجيى بولماسا دا، ۇشىراسىپ تۇراتىنىن ايتادى. دارىگەرلەر اتا-انالاردان بارىنشا ساق بولىپ، بالالارىن قاراۋسىز قالدىرماي، ولارعا كوبىرەك ۋاقىت ءبولۋدى جانە ۇساق زاتتاردى بالالاردىڭ قولى جەتپەيتىن جەرگە قويۋ كەرەكتىگىن ەسكەرتەدى.