ەلوردادا كوروناۆيرۋستىڭ ەكىنشى تولقىنىنا دايىندىق اياسىندا 9 زەرتحانا ساتىپ الىندى

None
None
نۇر-سۇلتان. قازاقپارات - نۇر-سۇلتاندا كوروناۆيرۋستىڭ ەكىنشى تولقىنى كەلگەن جاعدايدا مەديتسينا مەكەمەلەرى كۇشەيتىلگەن جۇمىس رەجيمىنە كوشەدى، دەپ حابارلايدى قازاقپارات.

اكىمدىكتىڭ مالىمەتىنشە، قوعامدىق دەنساۋلىق ساقتاۋ باسقارماسىنىڭ ەسەپ بەرۋ جيىنى ونلاين رەجيمدە وتكەن. وعان قالا اكىمىنىڭ ورىنباسارى باقتيار ماكەن، دەنساۋلىق ساقتاۋ ءبىرىنشى ۆيتسە-ءمينيسترى م. شورانوۆ، قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ، قالالىق جانە جەكە مەديتسينالىق ۇيىمداردىڭ ءبىرىنشى باسشىلارى قاتىستى.

تيمۋر مۇراتوۆ ءوز بايانداماسىندا ەلوردادا نەگىزگى مەديتسينالىق-دەموگرافيالىق كورسەتكىشتەر جاقسارعانىن اتاپ ءوتتى.

ءومىر ءسۇرۋ ۇزاقتىعى ءوسىپ، قان اينالىمى جۇيەسىنىڭ اۋرۋلارىنان، قاتەرلى ىسىكتەردەن، جاراقاتتاردان، جازاتايىم وقيعالاردان جانە ۋلانۋدان بولاتىن نارەستە ءولىمىنىڭ تومەندەۋى بايقالادى.

سونداي-اق، ەپيدەميولوگيالىق جاعداي بويىنشا ماسەلەلەر قوزعالدى. 23- قازانداعى جاعداي بويىنشا، كوروناۆيرۋس ينفەكتسياسىنىڭ 20 جاڭا جاعدايى انىقتالدى.

«بۇگىنگى تاڭدا ك ۆ ي- مەن ناۋقاستانعان جۇقپالى اۋرۋلار ستاتسيونارلارىندا - 94 پاتسيەنت، كارانتيندە - 148 پاتسيەنت بار. پاندەميا باستالعاننان بەرى 13701 ناۋقاس ساۋىعىپ، 318 ادام كوروناۆيرۋستان قايتىس بولدى. كۇن سايىن قالاداعى ەپيدەميولوگيالىق جاعدايدى باقىلاۋ جۇمىستارى جۇرگىزىلەدى»، - دەدى باسقارما باسشىسى.

كەڭەسكە قاتىسۋشىلارعا ەلوردادا COVID-19 قايتالانعان جاعدايداعى دايىندىق تۋرالى باياندالدى.

قالا اكىمدىگى مەن باسقارما مەديتسينالىق ۇيىمدار ءۇشىن قوسىمشا جابدىقتار ساتىپ الدى.

«15 زەرتحانا جۇمىس ىستەيدى، ولاردىڭ تاۋلىكتىك قۋاتى 10 مىڭنان استام زەرتتەۋ مەن قۋاتى 1440 زەرتتەۋ بولاتىن قوسىمشا 9 يزوتەرميالىق زەرتحانا ساتىپ الىندى»، - دەپ اتاپ ءوتتى تيمۋر مۇراتوۆ.

ءوز كەزەگىندە قالا اكىمىنىڭ ورىنباسارى باقتيار ماكەن ەمحانالاردا حالىقپەن جۇمىستى كۇشەيتۋدى تاپسىردى.

«حالىق ۇنىنە قۇلاق اساتىن مەملەكەت جۇيەسى بىزدەن باستالادى. پاتسيەنتتەرمەن نەعۇرلىم تىعىز بايلانىس ورناتىپ، حالىقتىڭ دەنساۋلىعىنا مۇقيات بولۋ قاجەت. جىل سوڭىنا دەيىن ۋاقىت بەرەمىز، ەگەر جۇمىس جاقسارماسا، قاتاڭ شارالار قابىلدانادى»، - دەدى نۇر-سۇلتان قالاسى اكىمىنىڭ ورىنباسارى باقتيار ماكەن.

سونداي-اق، ەلوردا اكىمىنىڭ ورىنباسارى ءدارىحانالاردا ءدارى-دارمەك تاپشىلىعىنا جول بەرمەۋ قاجەتتىگىن اتاپ ءوتتى. بۇل ماسەلە قالا باسشىلىعىنىڭ قاتاڭ باقىلاۋىندا.

سوڭعى جاڭالىقتار