قازاقپارات كۇنتىزبەسى: 9- شىلدە
اتاۋلى كۇندەر
قازاقستاندا سۋ شارۋاشىلىعى قىزمەتكەرلەرى كۇنى
قازاقستاننىڭ كاسىبي وقيعالار كۇنتىزبەسىندەگى ەڭ جاڭا مەرەكەلەردىڭ ءبىرى قازاقستان رەسپۋبليكاسى ۇكىمەتىنىڭ 2019-جىلعى 24- قاڭتارداعى 11№ قاۋلىسىمەن بەكىتىلدى.
سۋ شارۋاشىلىعى قىزمەتكەرلەرىنىڭ كۇنىن ەنگىزۋ ماقساتى - بۇل حالىق پەن ەكونوميكا سالالارىن سۋ رەسۋرستارىمەن قامتاماسىز ەتۋگە قوماقتى ۇلەس قوساتىن، سۋ شارۋاشىلىعى وبەكتىلەرىنىڭ سەنىمدى جۇمىسىن قولدايتىن، قازاقستاننىڭ تابيعي بايلىقتارىن ساقتاۋعا جانە كوبەيتۋگە كومەكتەسەتىن سۋ شارۋاشىلىعىنىڭ بارلىق قىزمەتكەرلەرىنە قۇرمەت كورسەتۋ.
ەستە قالار وقيعالار
1906-جىلى رەسەيدىڭ ۆىبورگ قالاسىندا ءبىرىنشى مەملەكەتتىك دۋمانىڭ تاراتىلۋىن زاڭسىز دەپ تانىعان دەپۋتاتتار حالىققا ۇندەۋ جولدادى. بۇل ۇندەۋ تاريحتا ۆىبورگ ۇندەۋى دەگەن اتپەن قالعان. دۋمانى تاراتۋ تۋرالى پاتشا جارلىعىنا قارسى حالىقتى سالىق تولەۋدەن، اسكەري مىندەتكەرلىكتى وتەۋدەن باس تارتىپ، نارازىلىق بىلدىرۋگە شاقىرعان بۇل ۇندەۋگە قول قويعان 200 گە جۋىق دەپۋتاتتىڭ باسىم كوپشىلىگىن كادەتتەر پارتياسىنىڭ وكىلدەرى قۇرادى.
ولاردىڭ قاتارىندا ءاليحان بوكەيحانوۆ پەن سالىمگەرەي ءجانتورين دە بولدى.
1907-جىلى جەلتوقساندا ۇندەۋگە قول قويۋشىلار سوتقا تارتىلىپ، ولاردىڭ ىشىندە 167 ادام 3 اي مەرزىمگە اباقتىعا جابىلىپ، ەندىگى جەردە دۋماعا مۇشە بولۋ قۇقىعىنان ايىرىلدى.
1991-جىلى ەلباسى نۇرسۇلتان نازاربايەۆتىڭ جارلىعىمەن مەملەكەتتىك سالىق قىزمەتى قۇرىلدى.
2001-جىلى قازاقستان رەسپۋبليكاسىنىڭ «عىلىم تۋرالى» ق ر زاڭى جارىق كوردى.
2007-جىلى اتىراۋ مەملەكەتتىك ۋنيۆەرسيتەتى جانىنداعى ارحەولوگيالىق-ەتنوگرافيالىق ورتالىقتىڭ كەزەكتى ەكسپەديتسياسىنىڭ مۇشەلەرى سارمات داۋىرىنەن جەتكەن التى وبانى تاپتى. سارمات داۋىرىنە قاتىستى بىرنەشە كونە قۇمىرا، ەجەلگى حالىقتىڭ باسقا دا تۇتىنعان ىدىس-اياقتارى اتىراۋ وبلىسىنىڭ قىزىلقوعا اۋدانىنان تابىلدى.
2009-جىلى «قازپوشتا» ا ق قازاقستان رەسپۋبليكاسىنىڭ اۋماعىندا «ەجەلگى قازاقستانداعى قارۋ جانە قارۋ-جاراقتار» توپتاماسىنىڭ كوركەمدىك ماركاسىن اينالىمعا ەنگىزدى.
ماركادا XVIII عاسىرداعى باتىردىڭ قالقانى ءبىر توپ جاۋىنگەردىڭ بەينەسىندە بەينەلەنگەن. ماركا ءتورت بوياۋدا وفسەت، بۇرعىلاپ تەسۋ ءادىسى بويىنشا ورىندالعان، ولشەمى - 50x 38 م م، تارالىمى - 30 مىڭ دانا.
سۋرەتشىسى - دانيار مۇحامەدجانوۆ. ماركالار بەيجىڭنىڭ (ق ح ر) پوشتالىق تاڭبالار فابريكاسىندا باسىپ شىعارىلعان.
2011-جىلى وڭتۇستىك قازاقستان وبلىسى ارقىلى «ازيا تۇرعىندارىنا تازا سۋ ءۇشىن» ۇرانىمەن حالىقارالىق مارافون مارشرۋتى ءوتتى. ءۇش ادام 150 كۇننىڭ ىشىندە التى مەملەكەتتىڭ اۋماعىن كەسىپ ءوتتى.
2015-جىلى العاش رەت قازاقستاندىق تورەشى بىرلەسكەن كۇرەس الەمىنىڭ (United World Wrestling - UWW) سۋپەرۆايزەرى بولدى. گرەك-ريم، ەركىن جانە ايەلدەر كۇرەسى بويىنشا رەفەري باقىتجان جاقسىقۇلوۆ فرانكفۋرتتاعى (گەرمانيا) تورەشىلەر سەمينارىنا قاتىستى. ونىڭ قورىتىندىسى بويىنشا UWW پرەزيدەنتى نەناد لالوۆيچ قازاقستاندىقتى سۋپەرۆايزەر ەتىپ تاعايىندادى.
2017-جىلى ءۇندىستاننىڭ بحۋبانەشۆارە قالاسىندا وتكەن ازيا چەمپيوناتىندا قازاقستاندىق جەڭىل اتلەتتەر ەكى التىن جانە ءبىر كۇمىس مەدال الدى.
2018-جىلى بولگاريادا KWU Camp 2018 حالىقارالىق جازعى لاگەر اياسىندا كيوكۋشينكاي- كان كاراتەدەن «Varna Cup 2018» ءداستۇرلى كادەتتەر تۋرنيرى ءوتتى. وندا اقمولا وبلىستىق مامانداندىرىلعان بالالار- جاس وسپىرىمدەر سپورت مەكتەبىنىڭ تاربيەلەنۋشىسى الەمگۇل سابىرحان 65 كەلىدەن استام سالماق دارەجەسىندە جەڭىمپاز اتاندى.
2019-جىلى 9 جاسار مەكتەپ وقۋشىسى ءلايلىم-شىراق قازاقتىڭ ۇلى اقىنى ابايدىڭ ولەڭىنەن ءۇزىندى وقىپ، ق ر پرەزيدەنتى قاسىم-جومارت توقايەۆقا ەستافەتا جولدادى.
«كىشكەنتاي بالدىرعان قىزىمىز ءلايلىم-شىراق ابايدىڭ 175 جىلدىعىنا وراي ۇلى اقىننىڭ ولەڭدەرىنەن ءۇزىندى وقۋ ەستافەتاسىن ماعان جولداعان ەكەن. مەن بۇل باستامانى زور قۋانىشپەن قابىلدادىم. حاكىم ابايدىڭ ەسىمى ءارقاشان قازاق حالقىمەن قاتار ايتىلادى. ءبىز ابايدى ۇلىقتاۋ ارقىلى جاس ۇرپاقتىڭ بويىنا ۇلتتىق رۋح دارىتامىز. اباي ارقىلى ەلىمىزدى الەمگە پاش ەتەمىز. بيىل 30- مامىردا دانىشپان ابايدىڭ 175 جىلدىعىن رەسپۋبليكالىق دەڭگەيدە اتاپ ءوتۋ جونىندە ارنايى جارلىققا قول قويدىم. اباي مۇراسى - ءبىزدىڭ قاستەرلى قازىنامىز»، - دەپ اتاپ ءوتتى قاسىم-جومارت توقايەۆ.
مەملەكەت باسشىسى كەمەڭگەر اقىننىڭ جاستاردى ءبىلىم مەن عىلىمعا شاقىراتىن، ماقساتىڭا جەتۋ جولىندا قاجەت اسىل قاسيەتتەردى اتاپ كورسەتكەن «عىلىم تاپپاي ماقتانبا» اتتى ولەڭىنەن ءۇزىندى وقىپ بەردى. كەيىننەن بۇل ەستافەتا قازاقستانداعى جانە شەت ەلدەرەگى قالىڭ كوپشىلىكتىڭ قولداۋىنا يە بولدى.