جامبىلدا جەمقورلىق بويىنشا جاۋاپقا تارتىلعان 9 باسشى قىزمەتىن جالعاستىرىپ كەلگەن
اتالعان تۇلعالار تەك سىبايلاس جەمقورلىققا قارسى قىزمەتتىڭ ارالاسۋىنان كەيىن عانا ءوز وكىلەتتىگىن دوعارۋعا ءماجبۇر بولعان. بۇل تۋرالى ەڭبەك جانە سىبايلاس جەمقورلىق زاڭناماسىنىڭ ورىندالۋى بويىنشا مونيتورينگ بارىسىندا انىقتالعان.
جامبىل وبلىسى اكىمى بەردىبەك ساپاربايەۆتىڭ توراعالىعىمەن وتكەن سىبايلاس جەمقورلىققا قارسى ءىس-قيمىل جونىندەگى كوميسسيانىڭ وتىرىسىندا 2019-جىلى جانە اعىمداعى جىلدىڭ العاشقى ءۇش ايىندا اتقارىلعان جۇمىستاردىڭ قورىتىندىسى سارالاندى.
- 2019-جىلى جامبىل وبلىسى بويىنشا سىبايلاس جەمقورلىق قىلمىستارى ءۇشىن 33 لاۋازىمدى تۇلعا سوتتالسا، ولاردىڭ باسىم بولىگى ءبىلىم سالاسىنا قاتىستى. باسقا سالالاردان دا سىبايلاس جەمقورلىققا قارسى زاڭنامانى بۇزۋشىلار بار. ەڭ كوپ قىلمىس تاراز قالاسىندا، شۋ، بايزاق، جۋالى جانە مەركى اۋداندارىندا بولعان، - دەپ اتاپ ءوتتى وبلىس اكىمى جيىننىڭ العى سوزىندە.
كۇن تارتىبىندەگى وزەكتى تاقىرىپ بويىنشا تولىق اقپاراتتى سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتىنىڭ باسشىسى ءادىلحان اشىربايەۆ باياندادى.
- وتكەن جىلدىڭ قورىتىندىسى بويىنشا دەپارتامەنت سوتقا سىبايلاس جەمقورلىق سيپاتىنداعى 70 ءىس جولداسا، 90 لاۋازىمدى تۇلعا قىلمىستىق جاۋاپقا تارتىلعان. سىبايلاس جەمقورلىق قىلمىستارىنان كەلتىرىلگەن شىعىن كولەمى 1,2 ميلليارد تەڭگەنى قۇراپ، 930 ميلليون تەڭگە مەملەكەتكە قايتارىلدى.
شاعىن جانە ورتا بيزنەس قىزمەتىنە ارالاسۋمەن، سونداي-اق مەملەكەتتىك باعدارلامالاردى ىسكە اسىرۋعا بولىنگەن قاراجاتتى جىمقىرۋعا قاتىستى قىلمىستاردىڭ سانى ارتقان، - دەپ اتاپ ءوتتى ا. اشىربايەۆ.
انىقتالعانداي، مەملەكەتتىك قۇرىلىمدار اراسىندا جەرگىلىكتى اتقارۋشى ورگاندار سىبايلاس جەمقورلىققا اسا بەيىم. اسىرەسە، ءبىلىم بەرۋ، دەنساۋلىق ساقتاۋ، الەۋمەتتىك قورعاۋ، اۋىل شارۋاشىلىعى، قۇرىلىس، ەنەرگەتيكا جانە تۇرعىن ءۇي كوممۋنالدىق شارۋاشىلىق سالالارىندا زاڭبۇزۋشىلىققا ءجيى جول بەرىلۋدە.
سونىمەن قاتار، جيىندا قۇقىق قورعاۋ ورگاندارىنىڭ قىزمەتكەرلەرىنە قارسى وتكەن جىلى 29 قىلمىستىق ءىس قوزعالعاندىعى دا ايتىلدى. اعىمداعى جىلدىڭ ءۇش ايىندا سوتقا جولدانعان سىبايلاس جەمقورلىق سيپاتىنداعى قىلمىستىق ىستەردىڭ سانى 27 گە جەتسە، وسى بولىك بويىنشا 28 تۇلعا قىلمىستىق جاۋاپقا تارتىلعان. بايانداماشى وبلىس كولەمىندە سىبايلاس جەمقورلىققا قارسى ءىس-قيمىل جونىندەگى 2020-جىلعا ارنالعان كەشەندى جوسپاردى ىسكە اسىرۋعا بايلانىستى ءبىرقاتار ۇسىنىسىن ورتاعا سالدى.
ول جەرگىلىكتى اتقارۋشى ورگانداردىڭ ماڭىزدى مىندەتى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە حالىقپەن ءتيىمدى كەرى بايلانىس ورناتۋ بولىپ تابىلاتىندىعىنا ايرىقشا كوڭىل ءبولدى.
سوڭعى ۋاقىتتا «ادالدىق الاڭى» جوبالىق كەڭسەسىنىڭ جۇمىسىندا وڭ تاجىريبە جيناقتالعاندىعىن، وسى باعىتتاعى جۇمىستاردى ودان ءارى جالعاستىرۋ كەرەكتىگى ايتىلدى.
باسقوسۋدا «جامبىل - ادالدىق الاڭى» جوبالىق كەڭسەسىنىڭ جۇمىسى مەن پەرسپەكتيۆالىق باعىتتارى تۋرالى اتالعان جوبانىڭ جەتەكشىسى نازيما جۇباندىقوۆا باياندادى.
جيىندى قورىتىندىلاي كەلە بەردىبەك ساپاربايەۆ اعىمداعى جىلدىڭ ءبىرىنشى توقسانىنداعى سىبايلاس جەمقورلىق كورىنىستەرىنىڭ سەبەپتەرىن ەگجەي-تەگجەيلى تالداۋ جانە ناقتى ءىس-قيمىل باعدارلاماسىن ازىرلەۋ قاجەتتىگىن اتاپ ءوتتى.