اقتوبەدە بيىل 9 مىڭعا جۋىق ادام قونىس تويىن تويلايدى
2020 -جىلى اقتوبەدە تاعى 1 ميلليون شارشى مەتر تۇرعىن ءۇي نەمەسە 9 مىڭ جاڭا پاتەر پايدالانۋعا بەرىلەدى.
«حالىقتىڭ ءومىر ءسۇرۋ ساپاسىن ارتتىرۋدىڭ ماڭىزدى فاكتورى - قولجەتىمدى باعامەن
ساپالى تۇرعىن ءۇي سالۋ. 2019 -جىلى قۇرىلىس جۇمىستارىنا 194 ميلليارد تەڭگە جۇمسالعان. اۋدانى 1 ميلليون شارشى مەتردەن استام تۇرعىن ءۇي پايدالانۋعا بەرىلدى. بۇل - وبلىس ءۇشىن رەكوردتىق دەڭگەي. بىلتىر جەكە تۇرعىن ءۇي قۇرىلىسى ءۇشىن 1600 دەن استام جەر تەلىمى ءبولىندى. ولارعا 305 شاقىرىم ينجەنەرلىك- كوممۋنالدىق جەلى جۇرگىزىلدى. «نۇرلى جەر» مەملەكەتتىك باعدارلاماسى بويىنشا اقتوبە قالاسى مەن تەمىر، مارتوك، بايعانين، شالقار اۋداندارىندا جالپى الاڭى 22,7 مىڭ شارشى مەتر بولاتىن جالعا بەرىلەتىن 7 كوممۋنالدىق تۇرعىن ءۇيدىڭ قۇرىلىسى اياقتالدى»، - دەدى ءوڭىر باسشىسى وڭداسىن ورازالين.
ايتا كەتەيىك «نۇرلى جەر» مەملەكەتتىك باعدارلاماسى اياسىندا كەزەكتە تۇرعان 1302 وتباسى تۇرعىن ۇيمەن قامتاماسىز ەتىلدى. ولاردىڭ اراسىندا جەتىم بالالار، كوپبالالى
وتباسى، حالىقتىڭ الەۋمەتتىك وسال توبىنا كىرەتىن ازاماتتار بار.
ال «باقىتتى وتباسى» باعدارلاماسى بويىنشا 264 تۇرعىن ءۇي سەرتيفيكاتى بەرىلدى. 2020 -جىلى تۇرعىن ءۇي قۇرىلىستارىنا 215 ميلليارد تەڭگە قارجى جۇمسالادى. بارلىعى 122 كوپبالالى وتباسىنا تۇرعىن ءۇي ساتىپ الۋ ءۇشىن 1 ميلليارد تەڭگە كولەمىندە قارجى قاراستىرىلعان.
«نۇرلى جەر» باعدارلاماسى اياسىندا جەكە تۇرعىن ءۇي قۇرىلىسى ءۇشىن 563 شاقىرىم ينجەنەرلىك- كوممۋنالدىق جەلى تارتىلادى.