ءشاي ۇستىندەگى اڭگىمە-9. مۇحتار شاحانوۆ جايلى ەسسەدەن ءۇزىندى

استانا. قازاقپارات -بۇگىنگى اڭگىمە دە قىرعىزستان توڭىرەگىندە ءوربىدى. شىڭعىس ايتماتوۆتى دا تىلگە تيەك ەتتىك.

مۇحاڭ: «بىردە ماعان تەلەفون شالعان تانىسىم ءبىر ايەلدىڭ شىقاڭا جولىققىسى كەلەتىنىن جەتكىزدى» دەپ جاڭا اڭگىمەنىڭ شەتىن شىعاردى. «الگى ايەلمەن سويلەستىم. شىقاڭا جان-تانىمەن بەرىلگەن ادام ەكەن.

«جۇزبە-ءجۇز جولىقسام بولدى» دەگەن سوڭ، شىقاڭا قابارلاسىپ، ءمان-جايدى ءتۇسىندىردىم. شىقاڭ: «قاجەتى جوق» دەپ بىردەن باس تارتتى. «بۇل ءوزى ءسىزدى ەرەكشە قۇرمەت تۇتاتىن وقىرمانىڭىز ەكەن» دەپ مەن دە قولقالاپ قويماي قويدىم. شىقاڭ: «وندا سەنىڭ جۇمىس ورنىڭدا كەزدەسەيىك» دەدى. كەزدەستى. كەزدەسكەنى بار بولسىن، الگى ايەل شىقاڭدى كورگەن ساتتە تالدى دا قالدى. ەكەۋمىز بەتىنە سۋ بۇركىپ الەك بولىپ جاتىرمىز.

اۋپىرىمدەپ ەسىن جيعىزىپ، شىعارىپ سالعان سوڭ شىقاڭا: «قىزدارعا ءالى دە ءوتىمدىسىز» دەپ ازىلدەگەن بولدىم. «وسى سەن-اق وسىنداي ءازىلىڭدى قويمايسىڭ» دەدى شىقاڭ. ولاي دەيتىن دە ءجونى بار.

بىردە اۋرۋحاناعا ءتۇسىپ قالدىم. تىنىش جەر، وڭاشا بولمە. مەنىڭ كوڭىلىمدى سۇراي كەلگەن شىقاڭ: «مىنا جەر دۇرىس ەكەن. مەن دە ەمدەلىپ شىعايىن» دەپ وڭاشا ءبىر بولمەگە جايعاستى. ەرتەسىنە بريۋسسەلدەن ايەلى قوڭىراۋ شالدى. شىقاڭ ايەلىنە: «وسىلاي دا وسىلاي، مۇحتار ەكەۋمىز اۋرۋحانادا بىرگە ەم قابىلداپ جاتىرمىز» دەپ ءمان-جايدى ءتۇسىندىردى. ءسال كەيىندەۋ شىقاڭنىڭ ايەلى ماعان دا تەلەفون سوقتى. انانى-مىنانى ايتىپ، تامىرىمدى باسىپ كورىپ جاتىر.

مەن دە سىر بەرمەي: «جۇمىستا وتىرمىن. شىقاڭدى ءبىرازدان بەرى كورگەنىم جوق» دەپ قويىپ قالدىم. تەلەفوننىڭ ءۇنى ءوشتى. ماعان ويىن كەرەك. جەڭگەمنىڭ قىزعانشاق ەكەنىن جاقسى بىلەمىن. شامالىدان سوڭ شىقاڭ كەلدى. «ال نە بولدى ەندى» دەدى كۇيىنىپ.

سوسىن: «تەلەفون سوعىپ، جاعدايدى ءتۇسىندىر» دەدى. تەلەفون سوعىپ: «وسىلاي دا وسىلاي، اۋرۋحانادا جاتىرمىز» دەدىم. جەڭگەم سەنگەن جوق. سودان شىقاڭ اۋرۋحانادان «ەمدەلىپ جاتىر» دەگەن انىقتاما الىپ، ونى بريۋسسەلگە فاكسپەن جىبەرىپ، اۋرە بولدى دا قالدى. «سەنىڭ-اق ءازىلىڭ قالمايدى» دەگەندە شىقاڭ سول وقيعانى ەسكە العان بولاتىن.

جالپى شىقاڭ ءبۇبىسارادان كەيىن ايەل بالاسىنا بۇرىلىپ قاراعان ەمەس.

كەزىندە ەكەۋىنىڭ ماحابباتى بۇكىل قىرعىز دالاسىنا اڭىز بولىپ تاراعان بولاتىن. ءبىز ءوز ومىرىمىزدەگى ايەلدەر تۋرالى ەكەۋمىز بىرلەسىپ جازعان «قۇز باسىنداعى اڭشىنىڭ زارى» اتتى كىتابىمىزدا كەڭىرەك توقتالعان بولاتىنبىز. بۇل قىزعانىش دەگەندى قويسايشى. شىقاڭنىڭ ايەلى سول كىتاپتى قايتا باستىرعاندا الگى تاراۋدى تۇگەلدەي الدىرىپ تاستاپتى» دەدى دە ويعا شومىپ وتىرىپ قالدى. مەن مۇحاڭ كوڭىلىن اۋلايىن دەگەن ويمەن: «سىزگە دە: «وزىڭىزدەن بالا تاپسام ارمانىم بولماس ەدى» دەپ حات جازعان قىزدار بولدى عوي» دەدىم. مۇحاڭ: «ءيا، ول تۋرالى دا كىتاپتا جازىلعان بولاتىن» دەدى. مەن: «ءبىراق قانشا قىزدىڭ ارمانى ورىندالعانى جازىلماي قالدى-اۋ» دەدىم. مۇحاڭ كۇلدى. ءبارىمىز جادىرادىق. ءشاي دا ءسىڭىمدى بولدى.

جالعاسى بار

اۆتورى: قۇديار ءبىلال