پارا ازيا ويىندارى: ەلىمىزدىڭ قورجىنىندا 9 جۇلدە بار

استانا. قازاقپارات - جاكارتادا ءوتىپ جاتقان III ازيا پارا ويىندارىنىڭ ەكىنشى كۇنگى ناتيجەسى بويىنشا قازاقستان قورجىنى تاعى 7 مەدالمەن تولىقتى، دەپ حابارلايدى قازاقپارات ءتىلشىسى ق ر ۇلتتىق پاراليمپيادا كوميتەتىنىڭ باسپا ءسوز قىزمەتىنە سىلتەمە جاساپ.

يندونەزياداعى پارا ويىنداردىڭ ەكىنشى كۇنى سپورتشىلارىمىز 4 كۇمىس جانە 3 قولانى قانجىعالارىنا بايلادى. العاشقى كۇمىستى پاراپاۋەرليفتينگ بويىنشا 54 كەلى سالماقتا داۆيد دەگتياريەۆ يەلەنسە، كەيىنگى ءۇش كۇمىستى ءزۇلفيا گابيدۋللينا (50 مەترگە ارقامەن ءجۇزۋ)، دزيۋدودان ازامات تۇرىمبەتوۆ جانە 100 مەترگە ەركىن جۇزۋدەن دميتري لي ەنشىلەدى.

قولا مەدالداردى سيازبەك داليەۆ (50 مەترگە ارقامەن ءجۇزۋ)، مانسۇربەك يبراشەۆ (100 مەترگە ەركىن ءجۇزۋ) جانە 50 كەلىگە دەيىنگى پارا پاۋەرليفتينگتەن گۇلبانۋ ءابدىحالىقوۆا ولجالادى.

 ەلىمىزدىڭ قورجىنىنا العاشقى مەدالدى پاراپاۋەرليفتينگتەن الينا سولودۋحۋنا (قولا مەدال) مەن پارا جۇزۋدەن دميتري لي (قولا مەدال) تارتۋ ەتكەن بولاتىن.

وسىلايشا قازاقستاننىڭ قورجىنىندا پارا ويىننان 4 كۇمىس جانە 5 قولا بارلىعى 9 مەدال بار.

 ايتا كەتەيىك، III ازيا پارا ويىندارىنا الەمنىڭ 43 ەلىنەن، 3 مىڭنان اسا سپورتشى قاتىسۋدا، قازاقستاننان وسى جولعى پارا ويىندارعا رەكوردتىق كولەمدە سپورتشى اپاردى، اتاپ ايتقاندا 9 سپورت تۇرىنەن 91 سپورتشى.

ەسكە سالساق، پارا ويىنداردىڭ تىكەلەي كورسەتىلىمىن Qazsport تەلەارناسىنان كورۋگە بولادى.