+7 (701) 759 90 19 Лента
2 °С : استانا
-5 °С : الماتى
USD 363.26 EUR 420.11
RUB 5.54 CNY 52.45
جاڭالىقتار

ادامدارعا جايدان جاي اقشا تولەيتىن 9 ەل

17 مامىر 11:22 728
:ءبولىسۋ
ادامدارعا جايدان جاي اقشا تولەيتىن 9 ەل

 استانا. قازاقپارات - شارتسىز نەگىزگى كىرىس تۋرالى وي وتكەن عاسىردا-اق پايدا بولعان.

اي سايىن ءسىز قالاعانىڭىزشا جۇمساي الاتىن بەلگىلى ءبىر مولشەردەگى قاراجاتتى الىپ وتىراسىز. سىزدەرگە ازاماتتارىنا ەشقانداي شارتسىز اقشا تولەيتىن ەلدەر مەن قالالار جايلى جانە ونىڭ الەمگە قانداي وزگەرىس اكەلەتىنى تۋرالى قىسقاشا ايتىپ بەرەمىز.

فينليانديا

ۇكىمەتتىك ۇيىمداردىڭ شەشىمى بويىنشا 2017-جىلدان باستاپ فينليانديانىڭ 25 تەن 58 جاسقا دەيىنگى جۇمىسسىز 2000 تۇرعىنى اي سايىن 560 ەۋرو الىپ وتىراتىن بولعان. اقشا الۋشىلار كەزدەيسوق تۇردە تاڭدالىپ، بارلىق الەۋمەتتىك جاردەماقىلاردان قاعىلدى. ءبىراق جۇمىس تاپسا دا بولىنگەن اقشانى الۋىن جالعاستىرا بەرەدى. ەگەر بۇل وڭ ناتيجە بەرسە، بيىل وعان قاتىسۋشىلار سانىن كوبەيتەدى. تاجىريبە 2 جىلعا سوزىلادى.

فينلياندياداعى ورتاشا ەڭبەكاقى - 2202 ەۆرو.

ليۆورنو، يتاليا

 2016-جىلدىڭ 1-ماۋسىم ايىنان باستاپ مەردىڭ(قالا باستىعىنىڭ - رەد.) شەشىمىمەن قالاداعى ەڭ كەدەي 100 وتباسى اي سايىن 517 ەۆرو مولشەرىندە شارتسىز نەگىزدى قاراجات الىپ وتىراتىن بولعان. 2017-جىلدىڭ قاڭتار ايىندا بۇل جوباعا تاعى 100 وتباسى قوسىلدى. مەردىڭ ايتۋىنشا مۇنداي قادام - الەۋمەتتىك جەڭىلدىكتەردى ءبولۋدىڭ كۇردەلى كوپ كەزەڭدى جۇيەسىنەن شىعۋدىڭ امالى. نەاپول مەن راگۋزا دا وسىعان ۇقساس باعدارلامانى ەنگىزۋ ءۇشىن بۇل تاجىريبەنى باقىلاپ وتىر.

ليۆورنوداعى ورتاشا ەڭبەكاقى - 1480 ەۆرو.

كەنيا

«GiveDirectly» كوممەرتسيالىق ەمەس ۇيىمىنىڭ ارقاسىندا كەنيانىڭ 6000 اۋىل تۇرعىنى 12 جىل بويى اي سايىن 22 دوللار اقشا الىپ وتىراتىن بولدى. جەرگىلىكتى حالىق ءۇشىن بۇل وتە ۇلكەن سومما: ولاردىڭ 45 پايىزى ەشقاشان دا مۇنداي اقشا ۇستاپ كورمەگەن. تاجىريبەنىڭ كوپتەگەن قاتىسۋشىلارى اقشانى ۇيلەرىن جوندەۋگە، اۋىز سۋ، مال ساتىپ الۋعا جانە مەكتەپتەردى دامىتۋعا بەرگەندەرىن ايتتى.

كەنيا قالالارىنداعى ورتاشا ەڭبەكاقى - $291.

ۋترەحت، نيدەرلاندى

2017-جىلدىڭ مامىر ايىنان باستاپ 2 جىل بويى ۋترەحتا قالاسىنىڭ تۇرعىندارى مەملەكەتتەن اي سايىن 960 ەۆرو كولەمىندە قاراجات الىپ وتىراتىن بولعان. تاجىريبەگە قاتىسۋشىلار تولەم كولەمى جۇمىسقا قاتىستى بەلگىلى ءبىر تالاپتارعا بايلانىستى بولاتىن 6 توپقا ءبولىندى. مىسالى، ءبىر توپتىڭ ادامدارى ەرىكتىلەر قاتارىنا قوسىلسا، قوسىمشا 150 ەۆرو الادى. ەگەر تاجىريبە ءساتتى بولسا، بىرنەشە قالا وسى جوبانى قولداۋعا جوسپار جاساپ وتىر.

ۋترەحتەگى ورتاشا ەڭبەكاقى - 2227 ەۆرو.

ماريكا، برازيليا

ماريكا قالاسىنىڭ ءمەرىنىڭ شەشىمى بويىنشا ۇلكەن قالانىڭ 150000 تۇرعىنى ەڭبەك بيرجاسىنداعى مارتەبەلەرىنە قاراي اي سايىن 30$ كولەمىندە كومەك الىپ وتىراتىن بولدى. از قامتىلعان وتباسىلار قوسىمشا 28$ الادى. ناتيجە وڭ بولسا، تولەم كوتەرىلەدى.

 ماريكا قالاسى ەنەتىن ريو- دە- جانەيرو شتاتىنداعى ورتاشا ەڭبەكاقى - $642.

ءۇندىستان

ءۇندىستان ۇكىمەتى 2017-جىلى 7 جىل بۇرىن كەرەمەت ناتيجەلەر كورسەتكەن تاجىريبەلىك جوبانى قايتادان قولعا العان بولاتىن. سول كەزدە UNICEF قولداۋىمەن اۋىلداعى 6000 تۇرعىن 18 اي بويى بىرنەشە دوللار كولەمىندە ازداعان تولەم الىپ وتىرعان بولاتىن. بۇل جوبا سوت جوق كاستانىڭ (ءۇندىستانداعى كاستا) وتباسىلارىنا تولىق ەركىندىك، تاۋەلسىزدىك جانە بولاشاقتاعى ومىرلەرىن وزگەرتۋگە مۇمكىندىك بەرىپ، ومىرلەرىنە قاتتى اسەر ەتتى. ءۇندىستانداعى بۇل كاستانىڭ ادامدارى دۇنيەگە كەلگەن ساتتەن باستاپ مارگينالدار جانە قۇلدار دەپ ەسەپتەلدى. ولار تەك اۋىر جۇمىستاردى اتقارىپ، عيباداتحانالارعا بارۋعا جانە ءبىلىم الۋعا، باسقا كاستانىڭ ادامدارىمەن سويلەسۋگە تيىم سالىنعان بولاتىن.

ءۇندىستان قالالارىنداعى ورتاشا ەڭبەكاقى - $535.

ونتاريو، كانادا

2017-جىلدىڭ مامىر ايىنان باستاپ ونتاريونىڭ 3 سۋبەكتىسىندەگى كىرىسى وتە تومەن 18 دەن 64 جاسقا دەيىنگى 4000 ادام بىردەن ۇكىمەتتەن اعىمداعى تابىستارىنا بايلانىستى قالىپتاسقان نەگىزدى قاراجاتقا قول جەتكىزىپ كەلەدى. مىسالى، ەگەر ادام جىلىنا 10000$ تابىس تاباتىن بولسا، وندا ونىڭ نەگىزگى كىرىسى 11989$ بولادى. سوندا، ول ادام جىلىنا بارلىعى 21989$ الادى. ال مۇگەدەكتىگى بار ادامدار قوسىمشا ايىنا 500$ الادى.

ونتاريوداعى ورتاشا ەڭبەكاقى - $ 2216.

ۋگاندا

2017-جىلدان باستاپ كوممەرتسيالىق ەمەس«ەight»  ۇيىمى اۋىلداردىڭ بىرىندە 50 وتباسىنا اپتا سايىن 8$ تولەپ كەلەدى. بۇل تاجىريبە 2 جىلعا سوزىلادى جانە شارتسىز بازالىق كىرىستىڭ شاعىن ەلدى مەكەندەردەگى تىرشىلىك ساپاسىنا اسەرى جايلى دەرەكتى ءفيلمنىڭ نەگىزگى بولادى.

ۋگاندا قالالارىنداعى ورتاشا ەڭبەكاقى - $168.

وكلەند، ا ق ش

2017-جىلدىڭ قاڭتار ايىنان باستاپ 100 وتباسى «Y Combinator» ەنشىلەس قورىنان اي سايىن 2000$  عا دەيىن اقشا الىپ تۇرادى. جوباعا قاتىسۋشىلار جۇمىس ىستەمەۋلەرىنە، ەرىكتى بولۋلارىنا، ءتىپتى ەلدەن كەتىپ قالۋلارىنا بولادى. ۇيىمداستىرۋشىلار بۇل تاجىريبەگە تاعى دا 900 وتباسىنى قوسپاقشى. بازالىق كىرىس 2021-جىلدىڭ سوڭىنا دەيىن تولەنەتىن بولادى.

وكلەندتە ورتاشا ەڭبەكاقى - $3215.

العاشقى ناتيجەلەر:

- كوپتەگەن ادامدار اقشانى جاعدايلارىن جاقسارتۋ ءۇشىن: ۇيلەرىن جوندەۋگە، ءبىلىم الۋعا، تاماق ساپاسىن جاقسارتۋعا جۇمساعان.

- اقشانىڭ ءبىر بولىگى ءدارى-دارمەككە جانە مەديتسينالىق قىزمەتتەردى تولەۋگە جۇمسالعان.

- جاعدايى تومەن وتباسىلار جاڭا كىرىس كوزىن بالالارىنىڭ يگىلىگىنە جۇمساعان: كيىم جانە كوپ ازىق- تۇلىك العان، مەكتەپكە جانە كولىككە تولەگەن.

- ادامدار قارىزدارىنان قۇتىلىپ، قىسقا مەرزىمدى قارىزدار مەن نەسيەلەرگە دەگەن سۇرانىس ازايعان.

- وسى اقشا ارقىلى كوبىرەك دەمالىپ، دەنساۋلىعىن تۇزەۋگە مۇمكىندىك العان ەگدە جاستاعى ادامداردان باسقالارى جۇمىس ىستەۋدەن باس تارتپاعان.

- تاجىريبەگە قاتىسۋشىلاردىڭ كوپشىلىگى جۇمىسقا قاتىسسىز تۇراقتى كىرىستىڭ بولىپ تۇرۋى ولارعا بولاشاقتى جاقسى جوسپارلاۋعا جانە تاۋەكەلدى، ءبىراق پايدالى شەشىمدەر قابىلداۋعا كومەكتەسەتىنىن مويىنداعان.

  


باستى سوزدەر: الةم,
:ءبولىسۋ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049
رەداكتور
باقىتجول كاكەش
باقىتجول كاكەش
954-049
مۇراعات