USD 429.57 EUR 447.35
RUB 6.94 CNY 63.23
جاڭالىقتار

شىڭجاڭدىق جاس جۇبايلار بەيجىڭگە اتپەن 99 كۇندە جەتتى - شەتەلدەگى قازاقشا ب ا ق-قا شولۋ

12 جەلتوقسان 14:25
:ءبولىسۋ
شىڭجاڭدىق جاس جۇبايلار بەيجىڭگە اتپەن 99 كۇندە جەتتى - شەتەلدەگى قازاقشا ب ا ق-قا شولۋ

نۇر-سۇلتان. قازاقپارات - «قازاقپارات» حالىقارالىق اقپارات اگەنتتىگى ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

عابيدەن سوۆەت ۇلى قول كۇرەستەن Overall سايىسىندا ەل چەمپيونى اتاندى - Kaznews


2021 -جىلدىڭ 4-جەلتوقسان كۇنى ۇلانباتىر قالاسىندا قول كۇرەستەن ەل چەمپيوناتى ءوتتى. بايان- ولگي ايماعىنىڭ سپورتشىلارى قاتىسىپ 2 التىن، 3 كۇمىس، 3 قولا جۇلدەگە يە بولدى، دەپ حابارلايدى Kaznews.

اتالعان ب ا ق- تىڭ دەرەگىنشە، باقىتجان جانات ۇلى - 100 كەلى سالماقتا وڭ قولمەن كۇش سىناسىپ كۇمىس، سول قولمەن كۇش سىناسىپ قولا جۇلدەگەر اتاندى. -70 كەلى سالماقتا سول قولمەن كۇش سىناسقان نۇرتۋعان تۇرسىنحان ۇلى كۇمىس جۇلدە، نۇربولات حابىلحان ۇلى قولا جۇلدەگە يە بولدى. نۇرتۋعان تۇرسىنحان ۇلى -80 كەلى سالماق دارەجەسىندە دە سىنعا ءتۇسىپ قولا جۇلدەگەر اتانعان.

«ال، -100 كەلى سالماقتا سايىسقا تۇسكەن عابيدەن سوۆەت ۇلى وڭ جانە سول قولمەن كۇرەسىپ ەل چەمپيونى اتاندى. سونىمەن قاتار، +100 كەلى سالماقتا كۇمىس جۇلدە، بارلىق سالماقتار اراسىنداعى Overall سايىسىندا جەڭىمپاز اتاندى»، دەپ تۇيىندەيدى موڭعوليالىق ب ا ق.

جەمەنەي اۋدانى «دالا سالتى» ات سپورتى كۋرسىن اشتى - «اعاجاي-التاي»


قىسقى مۇز جانە قار تۋريزمىمەن اينالىسۋدى جاقسارتۋ ءۇشىن جەمەنەي اۋدانىنىڭ «دالا سالتى» اتتى ات سپورتىنىڭ ونىمدىلىگىن ارتتىرۋعا ارنالعان 5 كۇندىك وقۋ- جاتتىعۋ ساباعى ءوتتى، دەپ حابارلايدى اعاجاي- التاي پورتالى.

ات سپورتىنىڭ جاتتىقتىرۋشىسى مارحابات القابەك ۇلى بۇل كۋرستا كوپشىلىككە قازاقتىڭ ات ونەرىن كورسەتۋدەگى ءداستۇرلى ادەپ- يباسى سياقتى ەرەجەلەردى، ۇلتتىق كيىم كيۋدەگى تالاپتارىن تانىستىردى. سونداي- اق كوكپار، قىز قۋۋ، تەڭگە ءىلۋ، ۇلتتىق بي، كوشى- قون مادەنيەتى مەن وسى زامانعى اعىلشىن ۇلگىسىندەگى اتقا ءمىنۋ ەرەجەلەرىن دە وقىتتى.

ساباقتىڭ ءبىرىنشى كۇنى تىڭداۋ، كورۋ جانە پراكتيكالىق قارىم- قاتىناس جاساۋ ارقىلى ستۋدەنتتەر تەوريالىق دەڭگەيلەرىن، ويلاۋىن كەڭەيتىپ، تەحنولوگيانى ودان ءارى جەتىلدىردى. «جاتتىعۋلار ارقىلى مەن تەوريالىق جانە كاسىپتىك ءبىلىمىمدى بايىتتىم، ناقتى جۇمىس كەزىندە ءارتۇرلى ات سپورتى ونەرلەرىنەن جاتتىعۋلار جاسادىم جانە تۋريستەرگە جاقسى ات سپورتى ونەرلەرىن كورسەتۋگە قابىلەتىم مەن سەنىمىمدى نىعايتتىم. مەن كەلەسى كۋرستاردى اسىعا كۇتەمىن»، - دەيدى اتالعان كۋرستىڭ قاتىسۋشىسى داۋىل كەنجەباي ۇلى.


قىتايلىق ب ا ق- تىڭ دەرەگىنشە، جەمەنەي اۋدانى التاي ايماعىنىڭ باتىس جاعىنداعى ماڭىزدى ءتۇيىن رەتىندە ءتۋريزمدى ورنالاستىرۋدا ايقىن ارتىقشىلىقتارعا يە ءوڭىر. اتالعان اۋدان تۋريستەردى تارتۋ ءۇشىن ۇلتتىق قۇندىلىقتاردى، سونىڭ ىشىندە ات سپورتىن دامىتۋىنىڭ ناتيجەسىندە كەلۋشىلەر سانى بىرتە- بىرتە ارتقان.

جەمەنەيدەگى ءداستۇرلى مال شارۋشىعى كوپتەگەن وڭىرلەردەن كەلگەن قىتايلىق تۋريستەردى قىزىقتىرادى. تاماشا ات ويىنىن كورسەتۋ قىزمەتىن جاقسارتۋ ءۇشىن دالالىق ستيلدەگى ات سپورتىن دامىتۋعا كۇش سالۋدا. ولاردىڭ بۇگىنگى كۇندە وتكىزىپ وتىرعان كۋرستارى وسى سالاداعى مامانداردىڭ ساپاسىن ارتتىرۋ، سانىن مولايتۋ ەكەن.


نۇر-سۇلتان قالاسىندا وزبەكستان ەلشىلىگىنىڭ جاڭا عيماراتى اشىلدى – ءو ز ا


وزبەكستان پرەزيدەنتىنىڭ قازاقستانعا مەملەكەتتىك ساپارى اياسىندا ەل استاناسى نۇر-سۇلتان قالاسىندا وزبەكستان ەلشىلىگىنىڭ جاڭا عيماراتى اشىلدى، دەپ حابارلادى ءوزا مەملەكەتتىك اقپارات اگەنتتىگى.


وزبەكستاندىق ب ا ق-تىڭ دەرەگىنشە، اشىلۋ سالتاناتىنا ەكى ەل پرەزيدەنتتەرى شاۆكات ميرزيايەۆ پەن قاسىم- جومارت توقايەۆ قاتىستى. وندا ەكى ەلدىڭ مەملەكەتتىك ءانۇراندارى شىرقالىپ، مەملەكەت باسشىلارى ەلشىلىكتە جاسالعان جاعدايمەن تانىستى.

ديپلوماتيالىق وكىلدىكتىڭ اۋماعىندا باس عيمارات، كونسۋلدىق ءبولىم، قىزمەتكەرلەر ءۇيى، ديپلوماتيالىق وكىلدىك باسشىسىنىڭ رەزيدەنتسياسى، بالالار جانە سپورت الاڭدارى، كىتاپحانا ءماجىلىس جانە كونفەرەنسيالار زالى ورنالاسقان.


اتالعان ءىس-شارا سوڭىندا شاۆكات ميرزيايەۆ پەن قاسىم-جومارت توقايەۆ ەلشىلىكتىڭ قۇرمەتتى قوناقتار كىتابىنا جازبا قالدىرعان.


قازاقستان تاۋەلسىزدىگى تۇركيا تورىندە تويلاندى - TRT


قازاقستان رەسپۋبليكاسى تاۋەلسىزدىگىنىڭ 30 -جىلدىعى اياسىندا باۋىرلاس ەل تۇركيانىڭ بىرنەشە قالاسىندا الماتى وبلىسى ءسۇيىنباي اتىنداعى فيلارمونياسى «سازگەن» انسامبلىنىڭ كونسەرتى بولىپ ءوتتى، دەپ حابارلايدى تۇركيا راديو تەلەۆيزيا پورتالى.

اتالعان ب ا ق- تىڭ دەرەگىنە سۇيەنسەك، تۇركيانىڭ ءار قالاسىندا وتكەن مەرەكەلىك كونتسەرتتى «كوك تۋ» قازاق مادەنيەتى قوعامى قازاقستاننىڭ تۇركياداعى ەلشىلىگى جانە مالتەپە، يالوۆا، وسمانگازي، ماماك مۋنيتسيپاليتەتتەرىنىڭ قولداۋىمەن ۇيىمداستىرىلدى.

1-جەلتوقسان كۇنىنەن باستالعان كونسەرتتىك ساپار ەل استاناسى انكارادا اياقتالدى.

TRT-نىڭ دەرەگىنشە، تۇركيانىڭ ءتورت بىردەي قالاسىنداعى كونتسەرتتە كورەرمەن قاۋىمنىڭ قىزىعۋشىلىعى ەرەكشە بولعان. پاندەميا كەزىندە قازاق ونەرىن، دومبىرانىڭ كۇمبىرىن، ءان- كۇيدى اڭساعان، كونسەرتتىك شارالاردان الىس قالعان تۇركياداعى قانداستار، ءبىلىم الۋشى قازاقستاندىق ستۋدەنتتەر، باۋىرلاس تۇرىكتەر ەرەكشە ىقىلاس تانىتتى.

اسىرەسە، انكاراداعى كونسەرتكە كەلگەن جۇرتشىلىق زالدى تولتىرىپ، كوپتەگەن تۇرىك باۋىرلار تۇرەگەلىپ تۇرىپ تاماشالاعان.


«سازگەن» انسامبلىنىڭ كونسەرتتەرىندە قازاقتىڭ كوك بايراعى جەلبىرەپ، دومبىرانىڭ ءۇنى كۇمبىرلەپ، جەزتاڭداي انشىلەردىڭ داۋسى سايراپ، بيشىلەر مىڭ بۇرالىپ، قازاق ونەرىن ناسيحاتتادى» دەپ جازادى تۇركيا راديو تەلەۆيزيا پورتالى.

ايتا كەتەيىك، 1981 -جىلى الماتى قالاسىنداعى ىقىلاس دۇكەن ۇلى اتىنداعى رەسپۋبليكالىق حالىق اسپاپتارى مۋزەيى جانىنان قۇرىلعان بۇل ونەر وشاعى دا بيىل 40 جىلدىق مەرەيتويىن تويلاپ وتىر. ءىس- شارانىڭ باس ۇيىمداستىرۋشىسى «كوك تۋ» قازاق مادەنيەت قوعامى - 2018 -جىلى تۇركيا انكارادا قۇرىلىپ، قازاق مادەنيەتىن، تاريحىن تانىتۋدا، قازاق ءتىلىن وقىتۋدا ايانباي ەڭبەك ەتىپ كەلە جاتقان قوعامدىق ۇيىم.

شىڭجاڭدىق جاس جۇبايلار بەيجىڭگە اتپەن 99 كۇندە جەتتى - «اعاجاي-التاي»


ەرلى-زايىپتىلار شىڭجاڭنىڭ تارباعاتاي ايماعىنان قىتاي استاناسى بەيجىڭگە ەكى اتقا ءمىنىپ ساپارعا شىققان بولاتىن. ولار ماقساتتارىنا جەتۋگە 99 كۇن ۋاقىتىن جۇمساعان، دەپ حابارلايدى قىتايدىڭ اعاجاي- التاي اقپارات پورتالى.

بۇل تۋرالى 2021 -جىلدىڭ 2-جەلتوقسانىندا شىڭجاڭ- ۇيعىر اۆتونوميالى ولكەلىك ۇكىمەتى وتكىزگەن باسپا ءسوز ءماسليحاتىندا ايتىلدى.

قىتايلىق اقپارات كوزىنىڭ كەلتىرگەن دەرەگىنە سۇيەنسەك، كۇيەۋىمەن بىرگە بەيجىڭگە ساپار شەككەن قازاق ايەلى جاينا ەركىن قىزىنىڭ جاسى 25-تە.

ول ساۋان اۋدانى بولتۋنگۋ ەجەلگى قالاشىعى كەناگەن اۋىلىنىڭ تۇرعىنى. ونىڭ وتباسىندا 5 ادام بار. جاينا كۇيەۋى، ەكى كىشكەنتاي ۇلى جانە قايىن ەنەسىمەن بىرگە تۇرادى. ولار وسىدان ءۇش ايدان استام ۋاقىت بۇرىن اعايىن تۋىس، دوستارىمەن اقىلداسا كەلىپ، نەشە مىڭداعان شاقىرىم قاشىقتىقتاعى قىتاي ەلىنىڭ استاناسى بەيجىڭگە اتپەن بارۋ شەشىمىن قابىلداعانىن ايتادى.

ونىڭ ايتۋىنشا، اتپەن جۇرگەن بۇل ۇزاق جولدارى قيىنشىلىققا ەمەس، قىزىققا تولى بولعان.

قىتايلىق ب ا ق- تىڭ دەرەگىنە سەنسەك، ولار ءوز اۋىلىنان بەيجىڭ قالاسىنا اتپەن جەتۋگە تۇپ- تۋرا 99 كۇن ۋاقىت كەتكەن. وسى ساپاردا 120000 يۋانعا ( 8160000 تەڭگە كولەمىندە - اۆت. ) جۋىق اقشا جۇمسالعان. ونىڭ بارلىعىن ءوز ەڭبەگىمەن تاپقان.

شىڭجاڭنان ەل استاناسىنا جولعا شىعۋى جاس جۇبايلار ءۇشىن ومىرلەرىندەگى ەڭ ەستە قالاتىن وقيعا. جولدا ءارتۇرلى وڭىرلەردەن ءوتىپ، 40 گرادۋستىق اپتاپ ىستىقتى سەزىنىپ، ءشولدى ايماقتاردىڭ قيىندىقتارىنا شىداپ، تابيعات سىنىنا توتەپ بەرگەن. سونداي-اق، جولدا كەزدەسكەن ءتۇرلى ەتنوس وكىلدەرىنىڭ وزدەرىنە جاساعان كومەكتەرى دە كوپ بولعان.

99 كۇندىك ۇزاق جولدان كەيىن جاينا ەركىن قىزى مەن كۇيەۋى تۋعان جەرىنە ورالىپ، وتباسى مەن اۋىلداستارىنا جولداعى كورگەن- بىلگەندەرى مەن ەلدەگى ۇلكەن وزگەرىستەر تۋرالى اڭگىمەلەپ بەرگەن. ايتا كەتەيىك، ولار مال باعۋمەن اينالىسادى، جىلقى، سىيىر جانە قوي سياقتىلاردى باعادى. جاينا قازىرگى تۇرمىستىق جاعدايلارىنىڭ جاقسى ەكەنىن ايتادى.

«مەن تاۋدا ءوستىم، ونىما ەش وكىنبەيمىن. قازىرگى ۋاقىتتا تۋعان جەرىمدە اسفالت جول ءۇيىمنىڭ تابالدىرىعىنا دەيىن اپارادى. سۋ، جارىق، ينتەرنەت قوسىلعان. اۋىلداستار ناۋقاس كورسەتۋدەن ەش قينالمايتىن بولدى. بالالارىمىز بالا باقشادان باستاپ تەگىن وقيدى. سونىمەن قاتار مەكتەپكە بارعاندا تاماق، جاتىن ورىن سۋبسيديالارى بار. ءبىزدىڭ ۇيدە ءقازىر 300-دەن استام قوي، 40 نەشە باس سىيىر، 20-دان استام جىلقى بار. ءوزىمىزدىڭ ەڭبەكتەنۋىمىزدىڭ ارقاسىندا تۇرمىسىمىز كۇننەن- كۇنگە جاقسارىپ كەلەدى» دەيدى جاينا ەركىن قىزى.

يراندا «قاس قاعىم» اتتى قىسقا ولەڭ كىتابى قازاق تىلىندە جارىق كوردى - Parstoday

يراندىق اقىن پارۆيز بەيگي حابيباباديدىڭ قىسقا قايىرىمدارى «قاس قاعىم» (یک آن) دەگەن اتاۋمەن قازاق تىلىنە اۋدارىلدى، دەپ حابارلايدى يراندىق Parstoday اقپارات اگەنتتىگى. اتالعان ب ا ق- تىڭ كەلتىرگەن دەرەگىنە سۇيەنسەك، پارۆيز بەيگي حابيبابادي - يراندىق اقىن، كومپوزيتور، زەرتتەۋشى، جازۋشى جانە «فاسل- ە پاندجوم» (بەسىنشى مەزگىل) باسپاسىنىڭ ديرەكتورى. ول 1954 -جىلى 16-جەلتوقساندا يراننىڭ يسفاحان وبلىسىنداعى اردەستان اۋدانىندا دۇنيەگە كەلگەن. پارسى ءتىلى مەن ادەبيەتى ماماندىعى بويىنشا باكالاۆر ديپلومىن العان.

قازىرگى تاڭدا ادەبيەت سالاسىندا ءبىرىنشى دارەجەلى توسبەلگىگە يە. وسى كۇنگە دەيىن پارۆيز بەيگيدىڭ 24 كىتابى جارىق كوردى. ونىڭ ىشىندە 6 ولەڭدەر جيناعى مەن 18 زەرتتەۋ ەڭبەگى بار. ول «قاسيەتتى قورعانىس» دەپ اتالاتىن يران-يراك سوعىسى كەزىندەگى پارسى پروزاسى مەن پوەزياسىن سارالاپ، قازىرگى زامان اقىندارىنىڭ ءومىرباياندارىن جيناقتاپ، سەفيەۆيلەر مەن قادجارلار زامانىندا جازىلعان تازكەرەلەردى زەرتتەگەن.

سونداي-اق جۋىردا «كوروناۆيرۋستىڭ حالىقارالىق سوتتاعى ءسوزى» اتتى يرونياعا تولى سيۋررەاليستىك پوۆەست جازدى.

«بەيگي حابيباباديدىڭ «قاس قاعىمى» - شىن مانىندە ءبىر ءساتتى سيپاتتايتىن قىسقا ولەڭنىڭ ءتۇرى. ياعني اقىننىڭ كومەسكى ساناسىندا جارق ەتكەن ۇشقىن پوەتيكالىق سيپاتتاماعا اينالعان. كىتاپ قوس ءتىل - پارسى جانە قازاق تىلدەرىندە جارىق كوردى. اۋدارعان - يران تەلەراديو بىرلەستىگى الەمدىك قىزمەت تورابىنا قاراستى قازاق راديوسىنىڭ اۋدارماشى- ديكتورى گاۋحار ومارحانوۆا» دەپ تۇيىندەيدى Parstoday.

اۆتور: بەيسەن سۇلتان ۇلى



:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز

مۇراعات