اسقار مامين: اۋىل حالقىنىڭ %99 نا كەڭ جولاقتى ينتەرنەت قولجەتىمدى بولماق
بۇل تۋرالى پرەمەر- مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا ايتىلدى.
«وسى جىلدىڭ قورىتىندىسى بويىنشا 5,2 مىڭنان اسا اۋىل — ەلىمىزدەگى اۋىل حالقىنىڭ %99 ى ءۇشىن كەڭ جولاقتى ينتەرنەت قولجەتىمدى بولادى. ينتەرنەتكە كەڭ جولاقتى قولجەتىمدىلىكتى دامىتۋ ماسەلەلەرى ەلىمىزدىڭ دامۋى ءۇشىن ستراتەگيالىق ماڭىزعا يە. اۋىلداردى كەڭ جولاقتى ينتەرنەتكە قوسۋ جونىندەگى بيىلعى جىلعا ارنالعان بارلىق جوسپارلار مەرزىمىندە ىسكە اسىرىلادى»، - دەدى اسقار مامين ۇكىمەت وتىرىسىندا.
ۇكىمەت باسشىسى اكىمدىكتەرگە جابدىقتار ورناتۋ ءۇشىن ۋچاسكەلەر ءبولۋ راسىمدەرىن جەدەل جۇرگىزۋدى، سيفرلىق دامۋ مينيسترلىگىنە اكىمدىكتەرمەن بىرلەسىپ، حالىق سانى 250 ادامنان از اۋىلداردى ساپالى ينتەرنەتپەن قامتاماسىز ەتۋدىڭ جوسپار- كەستەسىن ازىرلەۋدى تاپسىردى.
پرەمەر- مينيستر مەكتەپ وقۋشىلارى مەن ستۋدەنتتەردى قاشىقتان وقىتۋعا بايلانىستى وتە وزەكتى بولىپ وتىرعان ينتەرنەت ساپاسىن ەداۋىر ارتتىرۋدىڭ ماڭىزدىلىعىن اتاپ ءوتتى. ول ءۇشىن تەحنيكا ساتىپ الىنۋدا، بايلانىس جانە ينتەرنەت قىزمەتتەرىنىڭ ساپاسىن باقىلاۋعا ارنالعان بارلىق رەسۋرستار بار.
«ءاربىر تۇرعىن ءۇي مەن ۇيىمدا ورنالاسقان جەرىنە قاراماستان، ساپالى ينتەرنەت پەن بايلانىس بولۋى كەرەك. سوندىقتان ناقتى تالاپتاردى بەلگىلەپ، ءتيىستى جابدىقتى ورناتۋ ماسەلەلەرىن پىسىقتاۋ قاجەت. سيفرلىق دامۋ مينيسترلىگى يندۋستريا مينيسترلىگىمەن بىرلەسىپ، اتالعان ماسەلەلەر شەشىلۋى ءتيىس»، - دەدى اسقان مامين.