قازاقستان 99 حالىقارالىق باعىت بويىنشا اۋە قاتىناسىن ورناتتى

None
None
نۇر-سۇلتان. قازاقپارات - قازاقستان 26 مەملەكەتپەن 99 حالىقارالىق باعىت بويىنشا اۋە قاتىناسىن ورناتتى.

بۇل تۋرالى ۇكىمەت وتىرىسىندا «نۇرلى جول» باعدارلاماسىنىڭ ىسكە اسۋ بارىسىن تالقىلاۋ كەزىندە ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات ءتىلشىسى.

«ازاماتتىق اۆياتسيا سالاسىندا بەسجىلدىق قورىتىندىسى بويىنشا وتاندىق اۋەجايلاردا قىزمەت كورسەتىلگەن جولاۋشىلار سانى 16,2 ميلليون ادامعا دەيىن ءوستى، 8,1 ميلليون جولاۋشى تاسىمالداندى، بۇل 2014-جىلعا قاراعاندا 47 پايىزعا ارتىق. جالپى، وتاندىق اۆياكومپانيالاردىڭ اۋە كەمەلەرى پاركىنىڭ ءوسۋى مەن جاڭارتىلۋى بايقالادى. اۋە كەمەلەرىنىڭ مەملەكەتتىك تىزىلىمىنە 78 بىرلىك ەنگىزىلدى، ال نەگىزگى تاسىمالداۋشىلار پاركىن 22 ۇشاققا تولىقتىردى»، - دەدى مينيستر.

ونىڭ سوزىنە قاراعاندا، قازاقستاندىق اۋەجايلاردىڭ جەرۇستى ينفراقۇرىلىمىن دامىتۋ بويىنشا جۇمىس جالعاسۋدا، وعان ينۆەستيتسيالاردىڭ جالپى كولەمى 128 ميلليارد تەڭگەنى قۇرادى.

«ءبىرىنشى «نۇرلى جول» اياسىندا پەتروپاۆل، تاراز جانە سەمەي اۋەجايلارىنداعى تەرمينالدار قالپىنا كەلتىرىلدى. الماتى، پەتروپاۆل، تاراز، ورال جانە سەمەي اۋەجايلارىنىڭ ۇشۋ-قونۋ جولاقتارىن قايتا جاڭارتۋ مەن جاڭعىرتۋ جۇمىستارى جۇرگىزىلدى. اعىمداعى جىلى قوستاناي جانە بالقاش اۋەجايلارىنىڭ ۇشۋ-قونۋ جولاقتارىن قايتا جاڭارتۋ اياقتالۋدا»، - دەدى اتامقۇلوۆ.

حالىقارالىق اۆياقاتىناستار سانىن ارتتىرۋ بويىنشا جۇمىستار جۇرگىزىلۋدە. بۇگىنگى تاڭدا قازاقستان 26 مەملەكەتپەن 99 حالىقارالىق باعىت بويىنشا اۋە قاتىناسىن ورناتقان.

«2017-جىلدان باستاپ نۇر-سۇلتان قالاسىندا «اشىق اسپان» رەجيمى ەنگىزىلدى. 3 جىل ىشىندە قازاقستاندىق جانە شەتەلدىك اۆياتاسىمالداۋشىلار 19 جاڭا باعىت اشتى، ونىڭ ىشىندە توكيو، ۆارشاۆا، بۋداپەشت، حەلسينكي قالالارى بار. بۇرىننان بار لوندون، ماسكەۋ، پەكين، ىستامبۇل مارشرۋتتارىندا ۇشۋ جيىلىگى ۇلعايدى. قازاقستاندىق تاسىمالداۋشىلار شاڭحاي (2020 ج)، سينگاپۋر (2020 ج.) ، نيۋ-يورك (2021 ج.) سياقتى ءىرى قالالارعا رەيستەر اشۋدى جوسپارلاپ وتىر»، - دەدى ۆەدومستۆو باسشىسى.

سوڭعى جاڭالىقتار