كوروناۆيرۋس ورشىگەن قىتايدىڭ ۋحان قالاسىندا قازاقستاندىق 98 ستۋدەنت قالدى – ق ر س ءى م

None
None
نۇر- سۇلتان. قازاقپارات - ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۋحان قالاسىندا 230 قازاقستاندىق ستۋدەنت وقيتىنىن ايتادى، دەپ حابارلايدى قازاقپارات ءتىلشىسى.

«كارانتيننىڭ ەنگىزىلۋىنە بايلانىستى قىتاي اۋماعىنداعى ءبىزدىڭ ازاماتتار ءۇشىن بەيجىڭدەگى قازاقستان ەلشىلىگى تاۋلىك بويى جۇمىس ىستەيتىن جەدەل جەلى اشتى. تەلەفونداردى ەلشىلىكتىڭ ۆەب- سايتىنان نەمەسە س ءى م سايتىنان قاراۋعا بولادى. قازاقستاننىڭ قىتايداعى ەلشىلىگىنىڭ جانە ق ر س ءى م سايتتارىندا جەدەل اقپاراتتى قاداعالاۋعا جانە جەرگىلىكتى بيلىك ورگاندارىنىڭ ۇسىنىستارىن ناقتى ۇستانۋعا كەڭەس بەرەمىز»، - دەدى ايبەك سمادياروۆ.

ونىڭ ايتۋىنشا، ۋحان قالاسىندا 230 قازاقستاندىق ستۋدەنت تىركەلگەن.

«بۇگىنگى تاڭدا قالادا 98 ستۋدەنت قالىپ وتىر. ال قالعاندارى دەمالىستىڭ باستالۋىنا بايلانىستى قازاقستانعا جانە باسقا دا ەلدەرگە كەتىپ قالعان. ءبىزدىڭ ديپلوماتتار ۋحانداعى بارلىق ستۋدەنتپەن بايلانىس ورناتقان. ولار تانىمال مەسسەندجەرلەر ارقىلى ۋحان مەن قىتايدىڭ باسقا قالالارىندا قالىپتاسقان ەپيدەميولوگيالىق جاعدايلار كەزىندە قابىلداۋ قاجەت ساقتىق شارالارى مەن ءتارتىپ ەرەجەلەرى تۋرالى حاباردار ەتىلگەن. ءبىزدىڭ ستۋدەنتتەر وقيتىن ج و و باسشىلارىمەن تىكەلەي جۇمىس بايلانىستارى ورناتىلعان. سونداي- اق، قازاقستان ەلشىلىگى حۋۆەي پروۆينتسياسىنىڭ سىرتقى ىستەر باسقارماسىمەن بايلانىسىپ، وزەكتى اقپارات الماسۋ جانە ازاماتتارىمىزدى ىزدەستىرۋگە بارىنشا كومەك كورسەتۋ جونىندە كەلىسىمگە قول جەتكىزدى»، - دەدى ول.

ايبەك سمادياروۆ اتاپ وتكەندەي، ەلشىلىكتە بار اقپارات بويىنشا، قىتاي اۋماعىندا انىقتالعان كوروناۆيرۋستىڭ جاڭا تۇرىنەن تۋىنداعان اۋرۋدى جۇقتىرعان پاتسيەنتتەردىڭ اراسىندا قازاقستان ازاماتتارى جوق.

ايتا كەتسەك، ايبەك سمادياروۆ بۇعان دەيىن قىتايداعى كوروناۆيرۋستى 830 ادام جۇقتىرىپ، 25 ادام كوز جۇمعانىن حابارلاعان بولاتىن.

اۆتور: ايان بەكەن ۇلى

سوڭعى جاڭالىقتار