پرەزيدەنت ءجۇز جاساعان سوعىس ارداگەرى يۆان گاپيچپەن جانە 96 جاستاعى ولكەتانۋشى جايساڭ اقبايمەن كەزدەستى
مەملەكەت باسشىسى قاسىم- جومارت توقايەۆ سوعىس ارداگەرى يۆان گاپيچتىڭ ۇيىنە بارىپ، 100 جاسقا تولعان مەرەيتويىمەن قۇتتىقتادى. پرەزيدەنت ونىڭ ءومىر جولى حالىققا قىزمەت ەتۋدىڭ، ەرەن ەڭبەكتىڭ، وتانسۇيگىشتىكتىڭ جارقىن ۇلگىسى سانالاتىنىن اتاپ ءوتتى.
- بۇل جاسقا جەتۋ ەكىنىڭ ءبىرىنىڭ ماڭدايىنا جازىلمايدى. ونىڭ ۇستىنە ءسىز ۇلى وتان سوعىسىنا قاتىستىڭىز. ءبىز مايدان دالاسىندا بولعان سوعىس ارداگەرلەرىنە زور قۇرمەتپەن قارايمىز. سوعىستان كەيىنگى جىلدارى ەلگە ورالىپ، پروكۋراتۋرا ورگاندارىندا ەڭبەك ەتىپ، ەلىمىزدىڭ دامۋىنا سۇبەلى ۇلەس قوستىڭىز. سىزگە العىس ايتامىن، - دەدى مەملەكەت باسشىسى.
يۆان گاپيچ 1923 -جىلى اقمولا وبلىسىندا دۇنيەگە كەلىپ، الماتىدا ءبىلىم العان. ول مايدان دالاسىندا پولشانى، چەحوسلوۆاكيانى، ۋكراينانى ازات ەتۋگە قاتىستى. سوعىستان كەيىنگى جىلدارى پروكۋراتۋرا ورگاندارىندا قىزمەت اتقارىپ، قاراعاندى، وڭتۇستىك قازاقستان، اقمولا جانە باتىس قازاقستان وبلىستارىندا ۇزاق جىل ەڭبەك ەتتى.
سونىمەن قاتار پرەزيدەنت 96 جاستاعى جەرگىلىكتى ولكەتانۋشى، مادەنيەت قايراتكەرى جايساڭ اقبايمەن دە اڭگىمەلەستى.
- ءسىزدىڭ ەڭبەك جولىڭىز - كوپشىلىككە ۇلگى- ونەگە. پارتيادا، مەملەكەتتىك قىزمەتتە ەڭبەك ەتتىڭىز. وتاندىق مادەنيەت سالاسىن دامىتۋعا ەلەۋلى ۇلەس قوستىڭىز. سىزگە مىقتى دەنساۋلىق، وتباسىڭىزعا باق- بەرەكە تىلەيمىن، - دەدى قاسىم- جومارت توقايەۆ.
جايساڭ اقباي باتىس قازاقستان وبلىسىنىڭ ءبىلىم جانە مادەنيەت سالالارىندا ۇزاق جىل ەڭبەك ەتكەن. سونداي- اق ول وڭىردە ولكەتانۋشىلىق قىزمەتىمەن تانىمال.
سوعىس ارداگەرى يۆان گاپيچ پەن ەڭبەك ارداگەرى جايساڭ اقباي پرەزيدەنتكە العىس ايتىپ، ريزاشىلىعىن ءبىلدىردى.
