استانا اكىمدىگىنە 96 ادام بوسقىن مارتەبەسىن الۋ ءۇشىن جۇگىنگەن
27 قىركۇيەك, 21:19

استانا اكىمدىگىنە 96 ادام بوسقىن مارتەبەسىن الۋ ءۇشىن جۇگىنگەن

استانا. قازاقپارات - ەلوردا اكىمدىگىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب بوسقىن مارتەبەسىن الۋ ءۇشىن مەملەكەتتىك ورگانعا جۇگىنگەندەر تۋرالى ستاتيستيكالىق مالىمەتتى ايتتى، دەپ حابارلايدى قازاقپارات ءتىلشىسى.

«استانا قالاسى اكىمدىگىنىڭ الەۋمەتتىك قورعاۋ باسقارماسى بوسقىن مارتەبەسىن بەرۋ بويىنشا جۇمىس جۇرگىزۋدە. قازىر بىزگە 96 ادام جۇگىندى. ولاردىڭ تەك ەكەۋى عانا - رەسەي ازاماتتارى»، - دەدى يليا سكۋب ەلوردا اكىمدىگىندە وتكەن بريفينگتە.

ونىڭ ايتۋىنشا، بوسقىن مارتەبەسىن قاراۋ ماسەلەسىن ارنايى قۇرىلعان كوميسسيا ءۇش اي بويى قارايدى.

«وسى ەكى ازامات بويىنشا شەشىم ءالى قابىلدانعان جوق. جالپى، ەلوردادا ءتورت ازاماتقا بوسقىن مارتەبەسى بەرىلدى. ولاردىڭ ەكەۋى – ق ح ر ازاماتتارى، تاعى ەكەۋى - اۋعانستان ازاماتتارى»، - دەپ قوستى سپيكەر.

بۇعان دەيىن استانا قالاسىنىڭ پوليتسيا دەپارتامەنتى كوشى-قون قىزمەتى باسقارماسىنىڭ باستىعى ارمان بايمۇحانبەت جىل باسىنان بەرى استاناعا قانشا شەتەلدىك ازامات كەلگەنىن جاريالاعان ەدى.

سونداي-اق شەتەلدىكتەردى قابىلدايتىن جەكە جانە زاڭدى تۇلعالار كەلۋشىلەرى تۋرالى ىشكى ىستەر ورگاندارىنا حابارلاۋى ءتيىس. زاڭ بۇزعاندارعا ايىپپۇل قاراستىرىلعان.

جاڭالىقتار