پەتروپاۆلدا وتباسىنىڭ مازاسىن قاشىرعان 96 وتاعاسى جاۋاپقا تارتىلدى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 14-اقپان كۇنى اۋرۋحانالاردىڭ بىرىنە 32 جاستاعى كەلىنشەك سۇيەك سىنىعىمەن تۇسكەن. سوزىنە قاراعاندا، ۇيدەگى جانجالدان كەيىن ونى ازاماتتىق نەكەدەگى كۇيەۋى ۇرىپ- سوققان. العان جاراقاتتارىنا قاراماستان ول سول كۇنى سۇيىكتىسىنە ەش نارازىلىعى جوقتىعى تۋرالى ءوتىنىش جازدى.
«دەنساۋلىققا قاساقانا ورتاشا اۋىرلىقتاعى زيان كەلتىرۋ» بابى بويىنشا سوتقا دەيىنگى تەرگەپ- تەكسەرۋ باستالدى. مامانداردىڭ ايتۋىنشا، بۇل باپ بويىنشا ايىپپۇل، قوعامدىق جۇمىستارعا تارتۋ نەمەسە ەكى جىلعا دەيىن باس بوستاندىعىنان ايىرۋ جازاسى قاراستىرىلعان. الايدا ايەلىنە قول كوتەرگەن 35 جاستاعى قالا تۇرعىنىنىڭ جازاعا تارتىلۋى نەعايبىل، ويتكەنى ونى ءجابىر كورۋشى كەشىردى.
جالپى جىل باسىنان پەتروپاۆلدا وتباسىلىق-تۇرمىستىق قاتىناستار اياسىندا ءۇش قىلمىستىق ءىس تىركەلدى. 96 قالا تۇرعىنىنا اكىمشىلىك شارا قولدانىلدى. توعىز جاعدايدا وتباسىلىق جانجال بارىسىندا ايەلدەر زارداپ شەگىپ، ەكەۋى اۋرۋحاناعا ءتۇستى. سوتقا 76 ءىس جىبەرىلگەنىمەن، ونىڭ باسىم بولىگىندە كەلىنشەكتەر جابىرلەۋشىلەرىن كەشىرگەن. وتباسىنىڭ ويرانىن شىعارعان تەك 13 ى عانا اكىمشىلىك قاماۋعا الىندى.
«ايەلدەر ۇرىپ-سوعۋدى كەشىرگەندىكتەن، وتباسىنداعى مۇنداي قارىم-قاتىناس ادەتكە اينالادى. جۇدىرىعىن الا جۇگىرەتىندەرگە زاڭ بويىنشا توقتاۋ سالا الامىز. الايدا ايەلدەر كوپ جاعدايدا «جابۋلى قازان» كۇيىندە قالدىرادى. پوليتسيا قىزمەتكەرلەرى ارالاسقان كۇندە دە كەيىن كۇيەۋلەرىن كەشىرىپ جاتادى. پەتروپاۆلدىڭ پوليتسيا باسقارماسىندا ايەلدەردى زورلىق- زومبىلىقتان قورعايتىن توپ جۇمىس ىستەيدى. وعان 394856 تەلەفون ءنومىرى ارقىلى حابارلاسۋعا بولادى»، - دەيدى جەرگىلىكتى پوليتسيا قىزمەتى ءبولىمى باستىعىنىڭ ورىنباسارى ايدىن اقماعانبەتوۆ.