ءبىلىم مەكەمەسى ءبىر داپتەردى 95 مىڭ تەڭگەگە ساتىپ الماقشى بولعان - اقمولا وبلىسى
بۇل تۋرالى اقمولا وبلىسى بويىنشا سىبايلاس جەمقورلىققا قارسى ءىس- قيمىل دەپارتامەنتىنىڭ باسشىسى ارمان راحيموۆتىڭ قاتىسۋىمەن وتكەن باعانى كوتەرۋ جانە بيۋدجەت قاراجاتىن ماقساتسىز پايدالانۋدى بولدىرماۋ فاكتىلەرىن انىقتاۋ ماقساتىندا مەملەكەتتىك ساتىپ الۋ مونيتورينگىنىڭ ناتيجەلەرى تۋرالى ونلاين- بريفينگتە ايتىلدى، دەپ حابارلايدى قازاقپارات ءتىلشىسى.
«مەملەكەتتىك ساتىپ الۋ سالاسى سىبايلاس جەمقورلىق ءىس- ارەكەتتەرىن جاساۋ ءۇشىن قولايلى ورتا بولىپ تابىلاتىنى ەشكىمگە قۇپيا ەمەس، جىل سايىن وسى سالادا مىڭداعان زاڭ بۇزۋشىلىقتار انىقتالادى. وسىعان وراي، سىبايلاس جەمقورلىق تاۋەكەلدەرىنىڭ الدىن الۋ ءۇشىن دەپارتامەنت «ساتىپ الۋدىڭ ءبىرىڭعاي تەرەزەسى» پورتالى ارقىلى مەملەكەتتىك ساتىپ الۋلارعا مونيتورينگ جۇرگىزەدى، ونىڭ قورىتىندىسى بويىنشا مەملەكەتتىك ورگاندار مەن ۇيىمدارعا ءتيىستى ۇسىنىمدار جولدانادى»، - دەدى ارمان راحيموۆ.
وسىلايشا، جىل باسىنان بەرى مونيتورينگ شەڭبەرىندە دەپارتامەنت ەنگىزگەن ۇسىنىمداردان كەيىن ساتىپ الۋعا جوسپارلانعان تاۋارلارعا، جۇمىستارعا جانە قىزمەتتەرگە جوعارى باعالاردى تومەندەتۋ ارقىلى 1 ميلليارد تەڭگەدەن استام قاراجات ۇنەمدەلدى.
مىسالى، اقمولا وبلىسى اۋداندارىنىڭ بىرىندەگى ءبىلىم مەكەمەسى 14250000 تەڭگەگە نەمەسە ءبىر داناسىن 95 مىڭ تەڭگەگە داپتەر ساتىپ الۋدى جوسپارلاعان. ال 1 داپتەردىڭ ورتاشا نارىقتىق باعاسى - 60 تەڭگە. دەپارتامەنتتىڭ ۋاقتىلى ارالاسۋىنىڭ ارقاسىندا ساتىپ الۋ توقتاتىلدى جانە بيۋدجەت قاراجاتى ۇنەمدەلدى.
مەكەمەنىڭ ءتۇسىندىرۋى بويىنشا، داپتەردىڭ باعاسىنىڭ بەلگىلەنگەن باعادان جوعارى بولۋىنا مەملەكەتتىك ساتىپ الۋ پورتالى اكىمشىسىنىڭ جىبەرگەن قاتەلىگى سەبەپ بولعان. سونداي- اق، «ەڭبەك - كوكشەتاۋ» ش ج ق ر م ك فيليالى مەملەكەتتىك ساتىپ الۋ ارقىلى جالپى سوماسى 6 ميلليون تەڭگەگە نەمەسە 1 ك گ ءۇشىن 200 تەڭگەگە سۇلى ساتىپ الماقشى بولعان. ال سۇلىنىڭ نارىقتىق باعاسى-90 تەڭگەنى قۇرايدى. وسىلايشا دەپارتامەنتتىڭ ۋاقتىلى ارالاسۋىنىڭ ارقاسىندا مەملەكەتتىك ساتىپ الۋدا ۇسىنىلعان باعا تومەندەتىلىپ، 3 ميلليون تەڭگەدەن استام قارجى ۇنەمدەلدى.
وسى رەتتە، سىبايلاس جەمقورلىققا قارسى وڭىرلىك قىزمەتتىڭ باسشىسى اقمولالىقتاردى بيۋدجەت قاراجاتىنىڭ جۇمسالۋىن قوعامدىق باقىلاۋ اياسىندا بەلسەندى ازاماتتىق ۇستانىم تانىتۋعا شاقىرادى.
اۆتور: اسلان وسپانوۆ