وتكەن جىلى استانا بيۋدجەتىنە 937 ميلليارد تەڭگە تۇسكەن - ءماسليحات

استانا. قازاقپارات - استانا قالالىق قارجى باسقارماسىنىڭ باسشىسى ءالىبي جۇمايەۆ ەلوردانىڭ 2022 -جىلعى بيۋدجەتىنىڭ اتقارىلۋى تۋرالى ەسەپ بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، وتكەن جىلى استانا قالاسى بيۋدجەتىنە 937 ميلليارد 646 ميلليون تەڭگە ءتۇستى نەمەسە 30 ميلليارد 153 ميلليون تەڭگەگە اسىرا ورىندالدى.

«مەنشىكتى كىرىستەردىڭ جيىنتىق كولەمى 898 ميلليارد 608 ميلليون تەڭگەنى قۇرادى نەمەسە 103,8 پايىزعا ورىندالدى. سونىڭ ىشىندە سالىق تۇسىمدەرى بويىنشا تۇسكەنى 556 ميلليارد 603 ميلليون تەڭگە نەمەسە 29 ميلليارد 461 ميلليون تەڭگە اسىرا ورىندالدى. سالىقتىق ەمەس تۇسىمدەر بويىنشا 19 ميلليارد 576 ميلليون تەڭگە نەمەسە 114,8 پايىز كورسەتكىش بار، قوسىمشا 2 ميلليارد 520 ميلليون تەڭگە تۇسكەن»، - دەدى ءا. جۇمايەۆ استانا قالالىق ءماسليحاتىنىڭ وتىرىسىندا.

سونىمەن بىرگە، استانا قالاسى بيۋدجەتىنىڭ 2022 -جىلعى شىعىندارى 954 ميلليارد 309 ميلليون تەڭگەنى نەمەسە 98,3 پايىزدى قۇرادى.

«شىعىستاردىڭ جالپى سوماسىنىڭ 1,6 پايىزى يگەرىلمەدى. پايدالانىلماعان قاراجاتتىڭ جالپى سوماسىنىڭ 41,9 پايىزى - كولىك جانە جول- كولىك ينفراقۇرىلىمىن دامىتۋ باسقارماسىنا، 33,33 پايىز - قۇرىلىس باسقارماسىنا، 12,7 پايىز - وتىن- ەنەرگەتيكا كەشەنى جانە كوممۋنالدى شارۋاشىلىق باسقارماسىنا، 4,4 پايىز - ءبىلىم باسقارماسىنا، 1,7 پايىز - جۇمىسپەن قامتۋ جانە الەۋمەتتىك قورعاۋ باسقارماسىنا تيەسىلى. قالعان يگەرىلمەگەن سومالار باسقا باسقارمالاردا بايقالعان»، - دەدى ءالىبي جۇمايەۆ.

بيۋدجەت قاراجاتىن يگەرمەۋدىڭ باستى سەبەپتەرىنىڭ ءبىرى - قۇرىلىس ماتەريالدارىنىڭ قىمباتتاۋى جانە جوبالىق سمەتالىق قۇجاتتامانى تۇزەتۋ بولعان.

«وعان قوسا، 2022 -جىلعى رەسپۋبليكالىق بيۋدجەتكە ناقتىلاۋ جۇرگىزىلگەن. بۇل قاراجاتتى باسقا جوبالارعا قايتا بولۋگە مۇمكىندىك بەرمەدى»، - دەپ ءتۇسىندىردى قارجى باسقارماسىنىڭ باسشىسى.

اۆتور:

ايجان سەرىكجان قىزى