شىعىس قازاقستاندا 92 جاستاعى كەيۋاناعا قاراقشىلىق شابۋىل جاساعان كۇدىكتى ۇستالدى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، پوليتسياعا حابارلاسقان 92 جاستاعى كەيۋانا پاتەرىنە تەرەزە ارقىلى كىرگەن بەلگىسىز بىرەۋدىڭ وزىنە كۇش قولدانىپ، اقشا تالاپ ەتكەنىن ايتتى.
«بەلگىلى بولعانداي، قارت كىسى ۇيدە جالعىز تۇرادى. قۇلاعى دۇرىس ەستىمەيتىندىكتەن، قىلمىسكەردىڭ ىشكە كىرگەنىن بايقاماي دا قالعان. ءوزىنىڭ ارام پيعىلىن جۇزەگە اسىرماق بولعان ەر ادام زەينەتكەردى تۇنشىقتىرىپ، ودان اقشا تالاپ ەتە باستايدى. سول كەزدە كەيۋانا ەسىنەن تانىپ قالعان. امالى قۇرىعان قىلمىسكەر ءىزىن سۋىتقان»، - دەپ حابارلادى ۆەدومستۆو وكىلدەرى.
حابار تۇسە سالىسىمەن وقيعا ورنىنا پوليتسيا قىزمەتكەرلەرى جەتىپ، ىزدەۋ جۇمىستارىنا بارلىق جەكە قۇرام جۇمىلدىرىلدى.
«وسىنداي كەزدە ءار مينۋت قىمبات. ويتكەنى شابۋىلداۋشى الىسقا ۇزاپ، ءتىپتى قالا اۋماعىنان شىعىپ كەتۋى مۇمكىن ەدى. الايدا ءتارتىپ ساقشىلارىنىڭ جەدەل ءىس- ارەكەتتەرى ناتيجەسىندە ول قولعا ءتۇستى. قازىرگى ۋاقىتتا سوت سانكسياسىمەن كۇدىكتى قاماۋعا الىنعان. وعان قاتىستى ق ر ق ك- ءنىڭ 192-بابى 3-بولىگىنە سايكەس سوتقا دەيىنگى تەرگەۋ امالدارى جۇرگىزىلۋدە. ەر ادام 12 جىلعا دەيىن باس بوستاندىعىنان ايىرىلۋى مۇمكىن»، - دەدى وبلىستىق پوليتسيا دەپارتامەنتىنىڭ باستىعى ساعات ماديەۆ.
ءوز كەزەگىندە قارت كىسى مەن ونىڭ كورشىلەرى پوليتسەيلەرگە قىلمىستى اشىپ، قاسكويدى ۇستاعاندارى ءۇشىن العىس ءبىلدىردى.
اۆتور: تالعاتجان مۇحامەتبەك ۇلى