قازاقستاندا حالىقتى سۋمەن جابدىقتاۋ دەڭگەيى 92,6 پايىزعا جەتتى
بۇل تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«ەلىمىزدە 2000-جىلداردان باستاپ حالىقتى اۋىز سۋمەن جانە سۋ بۇرۋ قىزمەتىمەن قامتاماسىز ەتۋ بويىنشا ماقساتتى ساياسات جۇرگىزىلىپ كەلەدى. 20 جىل ىشىندە «اۋىز سۋ»، «اق بۇلاق»، «وڭىرلەردى دامىتۋ»، «نۇرلى جول» باعدارلامالارى اياسىندا 48,2 مىڭ شاقىرىم ينجەنەرلىك جەلى سالىندى.
ناتيجەسىندە حالىقتى سۋمەن جابدىقتاۋ دەڭگەيى 92,6 پايىزعا جەتتى. بيىل 2020-2025-جىلدارعا ارنالعان «نۇرلى جەر» باعدارلاماسىن ىسكە اسىرۋعا كىرىستىك. وسى باعدارلاما اياسىندا 2025-جىلعا قاراي ەل حالقىن تولىقتاي ساپالى اۋىز سۋمەن قامتاماسىز ەتۋ مىندەتى تۇر»، - دەدى مينيستر.
ونىڭ اتاپ وتۋىنشە، ەلباسى تاپسىرماسىنا ساي اۋىلداردى سۋمەن جابدىقتاۋ جۇيەسىن دامىتۋعا جىل سايىن كەمىندە 100 ميلليارد تەڭگە قاراجات بولىنۋدە.
«بيىل قالالار مەن اۋىلداردا سۋمەن جابدىقتاۋ جانە سۋ بۇرۋ جەلىلەرىن دامىتۋعا رەسپۋبليكالىق بيۋدجەتتەن 113,6 ميلليارد تەڭگە ءبولىندى. 303 جوبا ىسكە اسىرىلۋدا»، - دەدى بەيبىت اتامقۇلوۆ.