ەنەرگەتيكا مينيسترلىگى ا ي-92 ماركالى بەنزين باعاسىن 236 تەڭگەگە دەيىن ءوسىرۋدى ۇسىندى

نۇر- سۇلتان. قازاقپارات - ەنەرگەتيكا مينيسترلىگى مۇناي ونىمدەرىنىڭ شەكتى باعاسىنا مەملەكەتتىك رەتتەۋ ءتارتىبىن وزگەرتۋدى ۇسىنىپ وتىر، دەپ حابارلايدى قازاقپارات.

بۇل تۋرالى بۇيرىق جوباسى اشىق ن ق ا سايتىندا جاريالاندى. جاريالانعان بۇيرىق جوباسىنا سايكەس، باعالارىنا مەملەكەتتىك رەتتەۋ بەلگىلەنگەن بولشەك ساۋدادا وتكىزىلەتىن مۇناي ونىمدەرىنە قوسىمشا قۇن سالىعى ەسەبىمەن شەكتى باعالار مىناداي مولشەردە بەلگىلەنگەن:

1) اي-80 ماركالى بەنزين - 1 ليتر ءۇشىن 89 تەڭگە؛

2) اي-92، اي - 93 ماركالى بەنزين:

قوستاناي، سولتۇستىك قازاقستان وبلىستارىندا - 1 ليتر ءۇشىن 187 تەڭگە؛

نۇر- سۇلتان، الماتى، شىمكەنت قالالارىندا، اقمولا، اقتوبە، شىعىس قازاقستان، باتىس قازاقستان، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ وبلىستارىندا، سونداي- اق اباي، جەتىسۋ، ۇلىتاۋ وبلىستارىندا - 1 ليتر ءۇشىن 182 تەڭگە.».

3) ديزەل وتىنى (جازعى، ماۋسىمارالىق): اقمولا، اقتوبە، شىعىس قازاقستان، باتىس قازاقستان، قوستاناي، سولتۇستىك قازاقستان وبلىستارىندا، سونداي- اق اباي وبلىسىندا - 1 ليتر ءۇشىن 260 تەڭگە؛

نۇر- سۇلتان، الماتى، شىمكەنت قالالارىندا، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ وبلىستارىندا، سونداي- اق جەتىسۋ، ۇلىتاۋ وبلىستارىندا - 1 ليتر ءۇشىن 230 تەڭگە.

الايدا، ەنەرگەتيكا مينيسترلىگى مۇناي ونىمدەرىن بولشەك ساۋدادا وتكىزۋگە شەكتى باعا مۇناي مەن مۇناي ونىمدەرىنىڭ الەمدىك باعالارىن، ەۋروپا نارىقتارىنا دەيىنگى كولىك شىعىستارىن، اكسيزدەردى، وپەراتسيالىق جانە باسقا دا شىعىستاردى ەسكەرىپ، اي-92 ماركالى بەنزين ليترى- 236 تەڭگە، ديزەل وتىنى - 420 تەڭگە ەكەنىن ەسكەرتتى.

«اي-92 ماركالى بەنزين باعاسىنىڭ 54 تەڭگەگە كۇرت ءوسۋى حالىق اراسىندا تەرىس اسەر ەتۋى مۇمكىن ەكەنىن ەسكەرە وتىرىپ، 2025 -جىلعا دەيىن (ە ا ە و مۇناي جانە مۇناي ونىمدەرىنىڭ ورتاق نارىقتارى جۇمىس ىستەي باستاعان مەرزىم) شەكتى بولشەك ساۋدا باعالارىن (اي-92 جانە اي-93 ماركالى بەنزين) كەزەڭ- كەزەڭىمەن كوتەرۋ ۇسىنىلادى» - دەلىنگەن بۇيرىق جوباسىندا.

اۆتور: ساياگۇل جارىلقاسىن