يندونەزيادا داۋىس ساناۋدان زورىققان سايلاۋ كوميتەتىنىڭ 91 مۇشەسى كوز جۇمدى

 نۇر- سۇلتان. قازاقپارات - يندونەزيادا وتكەن جالپىحالىقتىق سايلاۋداعى داۋىستاردى ساناۋ كەزىندە تيتىقتاپ زورىققان 91 ادام قايتىس بولدى.

 بۇل تۋرالى سەيسەنبىدە Antara اگەنتتىگى يندونەزيا ورتالىق سايلاۋ كوميسسياسىنىڭ ءتوراعاسى اريف بۋديمانعا سىلتەمە جاساپ حابارلادى.

اريف بۋديماننىڭ ايتۋىنشا، تاعى 374 ادامنىڭ قاتتى قالجىراعاندىقتان دەنساۋلىعى كۇرت ناشارلاعان.

قۇربان بولعانداردىڭ اراسىندا مالۋكۋ پروۆينتسياسىنداعى سايلاۋ ۋچاسكەسىنىڭ باسشىسى ادودو مولۋ دا بار. ول وڭىردەگى سايلاۋ قورىتىندىلارىنا ارنالعان جالپى وتىرىس كەزىندە جان تاپسىردى.

17 - ءساۋىر كۇنى يندونەزياداعى ەڭ ۇلكەن سايلاۋ وتكىزىلدى. ەل ازاماتتارى پرەزيدەنتتەن تىس ەكى پالاتانىڭ دەپۋتاتتارىن، جەرگىلىكتى زاڭ شىعارۋشىلاردى سايلاعان.

سايلاۋعا جالپى 240 كانديدات قاتىسىپ، ولار 20 مىڭ ورىنعا تالاسقان بولاتىن.

 داۋىس بەرۋگە 193 ميلليون سايلاۋشىنىڭ 80 پايىزى كەلگەن.