جامبىلدىق 911 ازامات ءدىني اعىمداردىڭ ىقپالىندا ءجۇر

None
None
تاراز. قازاقپارات - بۇگىندە جامبىل وبلىسى بويىنشا 911 ازامات دەسترۋكتيۆتى ءدىني اعىمداردىڭ ىقپالىندا ءجۇر، دەپ حابارلايدى قازاقپارات.

قۇبىلىس جامبىل وبلىستىق ءدىن ىستەرى باسقارماسى يسلام باعىتىنداعى ءدىني بىرلەستىكتەرمەن بايلانىستار جونىندەگى ءبولىمىنىڭ باسشىسى ەركەبۇلان اقبايدىڭ ايتۋىنشا، وڭىردە وڭالتۋ جۇمىستارى تۇراقتى تۇردە جۇرگىزىلىپ كەلەدى.

«2015-جىلدان بۇگىنگە دەيىن جۇرگىزىلگەن وڭالتۋ جۇمىستارىنىڭ ناتيجەسىندە، دەسترۋكتيۆتى ءدىني باعىتتاعى 679 ازامات قوعامعا بەيىمدەلسە، ونىڭ 118 ىنە اعىمداعى جىلى اتقارىلعان جۇمىستاردىڭ ناتيجەسىندە قول جەتكىزىلدى. ونىڭ ىشىندە 11 ازامات جاستار ساناتىنا كىرەدى. اتالعان جۇمىستار ۇلتتىق قاۋىپسىزدىك كوميتەتىنىڭ جامبىل وبلىسى بويىنشا دەپارتامەنتىمەن بىرلەسە وتىرىپ، ەلىمىزدىڭ اقپارات جانە قوعامدىق دامۋ مينيسترلىگى تاراپىنان ۇسىنىلعان وڭالتۋ كريتەريلەرىنە سايكەس جۇرگىزىلۋدە. اعىمداعى جىل ىشىندە تەولوگ ماماندار تاراپىنان تۇزەۋ مەكەمەلەرىندەگى 172 اداممەن جەكە كەزدەسۋلەر وتكىزىلدى. جوعارىدا اتالعان جەكە كەزدەسۋلەر جىل باسىندا ارنايى ءار سوتتالۋشىعا جەكە بەكىتىلگەن تەولوگيالىق وڭالتۋدىڭ جەكە باعدارلاماسىنا سايكەس جۇرگىزىلدى»، - دەيدى ە. اقتاي.

بۇگىنگى تاڭدا وڭىردەن 25 ازامات شەتەلدىك ءدىني وقۋ ورىندارىندا وقىپ ءجۇر. الايدا سول 25 ازاماتتىڭ 14 ءى ساۋد ارابياسى، پاكىستان، مىسىر، قىرعىزستان مەملەكەتتەرىندە كۇماندى وقۋ ورىندارىندا وقىپ جاتقان بولسا، قالعان 11 ءى تۇركيا، مىسىر مەملەكەتتەرىنىڭ جوعارى وقۋ ورىندارىندا ءبىلىم الۋدا ەكەن. سونداي-اق، ەل ىشىندە جولدان تايدىرۋعا ۇگىتتەيتىن توپتار دا از ەمەس دەسەك، الايدا، ولاردىڭ دەنى قۇزىرلى مەكەمەلەردىڭ قۇرىعىنا ىلىنۋدە ەكەن.

«اعىمداعى جىلدىڭ باسىنان بەرى وڭىردە پوليتسيا قىزمەتكەرلەرى ءدىني باعىتتاعى 34 اكىمشىلىك-قۇقىق بۇزۋشىلىق فاكتىلەردى انىقتاعان. ونىڭ 16 دەرەگى ەل اۋماعى مەن شەكارالاس مەملەكەتتەر ازاماتتارىنىڭ تىيىم سالىنعان ەكسترەميستىك سيپاتتاعى ادەبيەتتەردى زاڭسىز اكەلۋىنە قاتىستى بولىپ وتىر. جالپى سانى 27 دەن اسا ەكسترەميستىك مازمۇنداعى كىتاپ تاركىلەنىپ، اكىمشىلىك قۇقىق بۇزۋشىلىق قىلمىستىق كودەكسىنىڭ 453-بابى بويىنشا تىيىم سالىنعان ەكسترەميستىك ادەبيەتتى رەسپۋبليكا اۋماعىنا اكەلگەنى ءۇشىن قىرعىز رەسپۋبليكاسىنىڭ 14 ازاماتى جانە رەسەي مەن وزبەكستان مەملەكەتىنەن 2 ادام اكىمشىلىك جاۋاپكەرشىلىككە تارتىلعان»، - دەيدى وبلىستىق پوليتسيا دەپارتامەنتىنىڭ باسپا ءسوز قىزمەتى ءوز مالىمەتىندە.

سوڭعى جاڭالىقتار