جىلۋ ەلەكتر ورتالىقتارىن جوندەۋگە 90 ميلليارد تەڭگە جەتپەي تۇر - مينيسترلىك

استانا. قازاقپارات - ەلىمىزدەگى جىلۋ ەلەكتر ورتالىقتارىنىڭ قىزمەتىن تالداۋ جۇمىسى اياقتالدى، ونىڭ ناتيجەسى كەلەسى ايدا جاريالانادى.

بۇل تۋرالى ەنەرگەتيكا ۆيتسە-ءمينيسترى جاندوس نۇرماعانبەتوۆ ءمالىم ەتتى، دەپ حابارلايدى قازاقپارات ءتىلشىسى.

«ەكىباستۇزدا بولعان اپاتتان كەيىن كوميسسيا قۇرىلدى. كوميسسيا تاپسىرماسىنا سايكەس بۇكىل جىلۋ ەلەكتر ورتالىقتارىنىڭ جاعدايىنا تالداۋ جاسالدى. تالداۋ نەگىزىنەن قارجىنىڭ جۇمسالۋى جانە جوندەۋ جۇمىستارىنا قاتىستى بولدى. جالپى ەلىمىزدەگى جىلۋ ەلەكتر ورتالىقتارىن جوندەۋگە 180 ميلليارد تەڭگە قارجى تالاپ ەتىلسە، سونىڭ ىشىندە 90 ميلليارد تەڭگە جەتپەي تۇر. قالعان قارجىنى بىرەۋ سالۋى كەرەك قوي. ەلەكتر ەنەرگياسى تۋرالى زاڭعا سايكەس جەتپەگەن قارجىنى تۇتىنۋشى تولەيدى نەمەسە بيۋجەت قارجىسىنان وتەلەدى. ال بيۋجەتتەن جەكە مەنشىك يەسىنە قارجى بولىنبەيدى»، - دەدى جاندوس نۇرماعانبەتوۆ پارلامەنت سەناتى قارجى جانە بيۋجەت كوميتەتىنىڭ وتىرىسىندا.

ونىڭ ايتۋىنشا، ەگەر جەو يەلەرىنە قالعان اقشانى سال دەسە، ولار قۇيىلعان قارجىنىڭ پايدا اكەلمەيتىندىگىن العا تارتادى.

«ماسەلە كۇردەلى. ءبىر جولى - ءتاريفتى كوتەرۋ، ياعني الداعى 5-7 جىل بويى بىرتە-بىرتە ءوسىرۋ. سوندا مەنشىك يەسىنىڭ دە جۇمىس ىستەۋگە نيەتى بولادى. سونىمەن قاتار ءبىز ج ە و يەلەرىنە اشىق بيۋجەت تالابىن قويىپ وتىرمىز. كەز كەلگەن ادام قارجىنىڭ قايدا جانە قانشا كولەمدە جۇمسالىپ جاتقانىن بىلە الۋ مۇمكىندىگى. جۇمسالعان قارجى اشىق كورسەتىلسە، ارتىق سۇراق تۋىندامايدى. بۇگىندە جەو- نا تالداۋ جۇمىسىن اياقتادىق، كوپ اقپارات جينالدى. ونىڭ ناتيجەسىن كەلەسى ايتا جاريالايمىز»، - دەيدى ول.

ەسكە سالا كەتسەك، بيىل قاڭتاردا پرەمەر-مينيستر ءاليحان سمايىلوۆ ەلىمىزدەگى جىلۋ ەلەكتر ورتالىقتارى جەلىسى الداعى 2-3 جىل ىشىندە قايتا جاڭارتىلادى دەگەن ەدى.