ماڭعىستاۋ وبلىسىندا 90 جاستاعى قاريا كوروناۆيرۋستان جازىلىپ شىقتى
بۇگىن اتاباي ازماعامبەتوۆ ءتۇپقاراعان اۋداندىق ورتالىق اۋرۋحاناسىنىڭ كوروناۆيرۋس ينفەكسياسىنا ارنالعان بولىمىنەن ەمدەلىپ شىقتى.
اتاباي اقساقال اتالعان بولىمگە كوروناۆيرۋس ينفەكسياسى، وكپەنىڭ ەكى جاقتى قابىنۋى دياگنوزىمەن 24- مامىر كۇنى تۇسكەن ەدى.
ءتۇپقاراعان اۋداندىق ورتالىق اۋرۋحاناسىنىڭ باس دارىگەرى گۇلشات شالابايەۆا اقساقالدىڭ قازىرگى جاعدايى تۋرالى ايتتى.
«اتاباي اقساقال 20- مامىردان باستاپ اۋىرا باستاعان. ءوزىنىڭ ايتۋىنشا، دەنەسىندە السىزدىك بەلگىلەر پايدا بولعان. جانۇياسى بىزگە حابارلاسقاننان كەيىن، دارىگەرلەر شۇعىل تۇردە ۇيىنە بارىپ، دەنساۋلىعىن تەكسەردى. اقساقالدىڭ وكپەسىن تىڭداۋ ناتيجەسىندە جانە كومپيۋتەرلىك توموگرافيا قورىتىندىسىنا سايكەس ناۋقاستىڭ وكپەسىنىڭ 35 پايىزى زاقىمدالعانى انىقتالدى. اقساقال اۋرۋحاناعا 24- مامىردا قابىلداندى. بۇگىن دەرتتەن ايىعىپ، وتباسىمەن امان-ەسەن قاۋىشىپ وتىر»، - دەدى ول.
دارىگەر تۇرعىندارعا كوروناۆيرۋس ينفەكتسياسىنىڭ نەگىزگى بەلگىلەرىنىڭ السىزدىك، دەنە قىزۋىنىڭ كوتەرىلۋى، جوتەلدىڭ پايدا بولۋى، ءىشتىڭ ءوتۋى مەن تەرلەۋ ەكەندىگىن ايتتى. مۇنداي بەلگىلەر پايدا بولعان جاعدايدا دەرەۋ دارىگەرلەر كومەگىنە جۇگىنۋ كەرەك.
«سوڭعى تاجىريبەلەر كورسەتىپ وتىرعانداي، جوتەل بەلگىسى جوق، الايدا دەنەسىندە السىزدىك قانا بايقالعان ازاماتتاردىڭ ەكى وكپەسىنىڭ بىردەي قابىنعانى انىقتالىپ وتىر. سوندىقتان دا، تۇرعىنداردى دەنساۋلىقتارىنا بەي-جاي قاراماۋعا، سانيتارلىق تالاپتاردى ساقتاۋعا، مەيلىنشە ۆاكسينا قابىلداۋعا شاقىرامىن»، - دەدى گۇلشات شالابايەۆا.