سالىقتاردى قولما- قول اقشاسىز تولەۋ دەڭگەيى 90 پايىزعا جەتكىزىلمەك
«ق ر قارجى مينيسترلىگى «بۇگىنگى تاڭدا مەملەكەتتىك كىرىستەر ورگاندارى كورسەتىلەتىن قىزمەتتەردى سيفرلاندىرۋدىڭ، كەيىنگى جىلدارى بيۋدجەتكە قولما- قول اقشاسىز تولەم جاساۋدىڭ ىڭعايلى جانە قاراپايىم سەرۆيستەرىن جۇزەگە اسىرۋ ءۇشىن ءىس- شارالار جۇرگىزۋدە. 2019 -جىلدىڭ قورىتىندىسى بويىنشا بيۋدجەتكە قولما- قول اقشاسىز تولەمدەردىڭ ۇلەسى 80 پايىزدى قۇرادى. 2020 -جىلى سالىقتاردى قولما- قول اقشاسىز تولەۋ دەڭگەيىن 90 پايىزعا دەيىن ارتتىرۋ جوسپارلانۋدا. وسى كورسەتكىشكە قول جەتكىزۋ ءۇشىن مەملەكەتتىك كىرىستەر كوميتەتى بيۋدجەتكە سالىق تولەۋدىڭ ىڭعايلى جانە قاراپايىم قىزمەتتەرىن ىسكە قوستى»، - دەيدى و ك ق- دا وتكەن باسپا ءسوز ءماسليحاتىندا مەملەكەتتىك كىرىستەر كوميتەتى ءتوراعاسىنىڭ ورىنباسارى تالعات مامايەۆ.
ونىڭ ايتۋىنشا، بۇل سەرۆيستەر - سالىقتار مەن الەۋمەتتىك تولەمدەردى تولەۋ، بەرەشەك سوماسى، الداعى تولەمدەر جانە سالىق ءاميانى. ولاردى ءارتۇرلى ينتەرنەت الاڭداردا پايدالانۋعا بولادى.
«2018 -جىلدىڭ شىلدە ايىنان باستاپ سالىق تولەۋشىلەر سالىق مولشەرىن مەملەكەتتىك كىرىستەر كوميتەتىنىڭ موبيلدى قوسىمشاسى مەن ەكىنشى دەڭگەيلى بانكتەردىڭ موبيلدى قوسىمشالارى، ەلەكتروندى ۇكىمەت پورتالىندا باقىلاپ، تولەي الادى. 2019 -جىلدىڭ قىركۇيەگىنەن باستاپ بۇل پورتالدار مەن اتالعان موبيلدى قوسىمشالاردا جەكە تۇلعالار مۇلىك، جەر ۋچاسكەسى، كولىك قۇرالدارى، جەكە تابىس بويىنشا الداعى سالىقتاردى تولەۋ مۇمكىندىگىنە يە بولدى. ەكىنشى دەڭگەيلى بانكتەردىڭ موبيلدى قوسىمشالارى ارقىلى تولەنگەن سالىق تۋرالى مالىمەت مەملەكەتتىك كىرىستەر كوميتەتىنىڭ اقپاراتتىق جۇيەسىنە 2 مينۋتتىڭ ىشىندە كەلىپ تۇسەدى. بۇرىن بۇل اقپارات 2-3 كۇندە ءبىر- اق تۇسەتىن. ۋاقىتتى وسىنداي قىسقا مەرزىمگە قىسقارتۋ ارقىلى تاۋار شىعارۋ ءۇشىن قاجەتتى بۇرىنعىداي قۇجاتتاردى تالاپ ەتپەۋگە، بيۋدجەتتەگى شوتتىڭ جايى تۋرالى ماڭىزدى مالىمەتتەردى ۇسىنۋعا، ءوسىماقى سالماۋعا، شوتتاردى بۇعاتتان تەز بوساتۋعا مۇمكىندىك بەردى»، - دەدى ول.
اۆتور: ايان بەكەن ۇلى