بيبىگۇل تولەگەنوۆا 90 جىلدىق مەرەيتويىن اتاپ ءوتتى
«استانا وپەرا» تەاترىندا وتكەن مەرەكەلىك شاراعا ب. تولەگەنوۆانىڭ شاقىرتۋىمەن قازاقستاندىق تانىمال وپەرا انشىلەرى، ءىزباسارلارى، بيبىگۇل تولەگەنوۆا بايقاۋىنىڭ لاۋرەاتتارى قاتىستى.
قازاقتىڭ بۇلبۇل ءانشىسى ءوزىنىڭ اۋقىمدى رەپەرتۋارىنان ءبىرقاتار نومىرلەردى ورىندادى. اتاپ ايتقاندا، ە. برۋسيلوۆسكيدىڭ «قىز جىبەك» وپەراسىنان جىبەكتىڭ (گاككۋ) ارياسى، گ. تۋكايدىڭ سوزىنە جازىلعان تاتاردىڭ «تافتيلياۋ» ءانى، ن. لىسەنكونىڭ «ناتالكا- پولتاۆكا» وپەراسىنان ناتالكانىڭ ارياسى شىرقالدى.
جينالعان قاۋىم ق ر حالىق ءارتىسىنىڭ ءاربىر ونەر كورسەتۋىنەن كەيىن تىك تۇرىپ، قوشەمەت كورسەتتى.
«بۇگىن تۇڭعىش پرەزيدەنتىمىز- ەلباسى نۇرسۇلتان ءابىش ۇلى نازاربايەۆتىڭ باستاماسىمەن سالىنعان «استانا وپەرا» تەاترىندا ايگىلى ءانشى، اڭىز ادام بيبىگۇل احمەت قىزى تولەگەنوۆانىڭ مەرەيتويىنا وراي كەرەمەت كەش وتۋدە. ءسىزدى شىعارماشىلىق كەشىڭىزبەن شىن جۇرەكتەن قۇتتىقتايمىن. جىل بويى، الەمنىڭ ءار بۇرىشىنان ءسىزدىڭ اتىڭىزعا مىڭداعان حات كەلىپ تۇسۋدە. بيبىگۇل احمەت قىزى، سىزگە ق ر پرەزيدەنتى قاسىم- جومارت كەمەل ۇلى توقايەۆتىڭ قۇتتىقتاۋىن وقىپ بەرۋگە رۇقسات ەتىڭىز، - دەگەن ق ر مادەنيەت جانە سپورت ءمينيسترى اقتوتى رايىمقۇلوۆا مەملەكەت باسشىسىنىڭ جانە ق ر پارلامەنتى سەناتىنىڭ ءتوراعاسى داريعا نازاربايەۆانىڭ قۇتتىقتاۋ حاتتارىنان جىلى لەبىزدەردى وقىپ بەردى.
كەش بارىسىندا وپەرا جانرىنىڭ حاس شەبەرلەرى - دينا حامزينا، جاننات باقتاي، مەدەت چوتابايەۆ، يتاليادان ارنايى كەلگەن كوزيمو ورەستە، سونداي- اق دارىندى جاس ارتىستەر - نازىم ساعىنتاي، گۇلجانات ساپاقوۆا، مەيىر باينەش، گۇلدانا الدادوسوۆا جانە تاعى باسقالارى ونەرلەرىن پاش ەتتى.
«استانا وپەرا» سيمفونيالىق وركەسترىنە ابزال مۇحيتدين مەن ارمان ورازعاليەۆ جەتەكشىلىك ەتتى. تەاتردىڭ بالەت ترۋپپاسى دا بيبىگۇل تولەگەنوۆانى جالىن اتقان نومىرلەرىمەن قۇتتىقتادى. تانىمال ارتىستەر گاۋحار ۋسينا، تايىر عاتاۋوۆ، ولجاس تارلانوۆ، انەل رۇستەموۆا، نازيرا زاەتوۆا، بوستان قوجابەكوۆ، دانيار جۇماتايەۆ حورەوگرافيالىق ونەردىڭ جاۋھارلارىن ۇسىندى. بالەت ترۋپپاسىنىڭ كوركەمدىك جەتەكشىسى - التىناي اسىلمۇراتوۆا. «استانا وپەرا» تەاترىنىڭ حورى باس حورمەيستەر ەرجان ءداۋىتوۆتىڭ جەتەكشىلىگىمەن كەرەمەت ونەر كورسەتتى. كونسەرتتىڭ رەجيسسەرى - ناتاليا كاگادي.
«سىزدەرگە زور دەنساۋلىق، باق- بەرەكە، مولشىلىق تىلەيمىن، قۋانىشتى كۇندەرىمىز كوپ بولسىن، قۇداي تاعالا بىزگە قايعى كورسەتپەسىن، ەلىمىزدە بەيبىتشىلىك بولسىن، بارلىعىمىز امان بولايىق. مەن كوپ قيىنشىلىقتى، سونىڭ ىشىندە ۇلى وتان سوعىسىن دا، اشتىق پەن كەدەيلىكتى دە كوردىم. سوندىقتان ءبىزدىڭ قازىرگى ءومىر ءسۇرىپ جاتقان ۋاقىتىمىز - جۇماق دەۋگە بولادى. بۇگىنگى كەشىمە كوپ ادام جينالدى - بۇل ۇلكەن باقىت، مۇنىڭ ءبارى ءبىزدىڭ تۇڭعىش پرەزيدەنتىمىز ن. نازاربايەۆتىڭ ارقاسى. ول حالىق ءۇشىن كوپ جاقسىلىق جاسادى. بۇل تۋرالى ۇمىتپاۋىمىز قاجەت»، - دەدى بيبىگۇل تولەگەنوۆا.
بيبىگۇل تولەگەنوۆا ⅩⅩ عاسىرداعى ەڭ اتاقتى جيىرما ايەلدىڭ ءبىرى رەتىندە يۋنەسكو تىزىمىنە ەنگەن. ول جيىرمادان استام ماراپاتقا يە. ءانشىنىڭ سان قىرلى رەپەرتۋارى «گاۋھار تاس»، «جيىرما بەس» سياقتى حالىق اندەرىنەن، ل. حاميديدىڭ «بۇلبۇل»، ە. برۋسيلوۆسكيدىڭ «قوس قارلىعاش»، م. تولەبايەۆتىڭ «ەسكە الۋ»، ە. راحماديەۆتىڭ «تارانتەللا»، س. مۇحامەدجانوۆتىڭ «كوكتەم ۆالسى» سىندى قازاقستاندىق كومپوزيتورلاردىڭ تۋىندىلارىنان، سونداي- اق پ. ي. چايكوۆسكي، س. ۆ. راحمانينوۆتىڭ رومانستارىنان، ن. ريمسكي- كورساكوۆتىڭ وپەرالارىنداعى اريالاردان، باتىس كومپوزيتورلارىنىڭ (گ. دونيتسەتتي، ە. گريگ، ف. شۋبەرت) شىعارمالارىنان جانە ت. ب. قۇرالعان.