ينتەرنەتتەگى تەرىس سيپاتتاعى ماتەريالداردىڭ 90 پايىزى لاڭكەستىكتى ناسيحاتتاۋعا ارنالعان
بۇل تۋرالى ورتالىق كوممۋنيكاتسيالار قىزمەتىندە قر اقپارات جانە قوعامدىق دامۋ ۆيتسە-ءمينيسترى نۇرگۇل ماۋبەرلينوۆا ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ مينيسترلىك زاڭعا قايشى مازمۇنداعى ماتەريالداردى انىقتاۋ تۇرعىسىندا ينتەرنەت پەن الەۋمەتتىك جەلىلەرگە تۇراقتى مونيتورينگ جۇرگىزەدى. سونىمەن قاتار، ينتەرنەت-رەسۋرستار اكىمشىلەرىنە ەسكەرتۋ جاسايمىز. زاڭنامانى بۇزۋدىڭ قانداي تۇرلەرى كەزدەسەدى؟ بۇل رەتتە ءبىرىنشى كەزەكتە لاڭكەستىكتى، ءدىني ەكسترەميزمدى ناسيحاتتاۋ، سۋيتسيدكە شاقىراتىن ماتەريالداردى تاراتۋ، ەسىرتكى مەن قارۋ ساتاتىن سايتتار جانە الەۋمەتتىك جەلىلەردەگى پاراقشالار سەكىلدى زاڭعا قايشى ماتەريالدار بار. كۇن سايىن ونداعان نەمەسە جۇزدەگەن وسى تەكتەس ينتەرنەت- رەسۋرستار مەن الەۋمەتتىك جەلىدەگى پاراقشالاردى انىقتايمىز»، - دەدى ن. ماۋبەرلينوۆا.
وسى ورايدا ۆيتسە-مينيستر اتالعان ماسەلە بويىنشا ستاتيستيكالىق مالىمەتتەرگە توقتالدى.
«ەگەر 2016 -جىلى 140 مىڭ قۇقىققا قايشى ماتەريال انىقتالسا، 2017 -جىلى - 300 مىڭنان استام، ال وتكەن جىلى - 130 مىڭ وسىنداي ماتەريال تىركەلدى. ياعني، 2018 -جىلى بۇل كورسەتكىش تومەندەدى. 2019 -جىلى 45 مىڭنان استام تەرىس سيپاتتاعى ماتەريال انىقتالدى. انىقتالعان زاڭسىز ماتەريالدىڭ 90 پايىزعا جۋىعى - لاڭكەستىكتى ناسيحاتتاۋعا ارنالعان. قالعاندارى ەسىرتكى تاراتۋ، قاتىگەزدىك پەن زورلىق-زومبىلىقتى، ءسۋيتسيدتى جانە پورنوگرافيانى ناسيحاتتاۋعا بايلانىستى بولىپ تۇر»، - دەدى ول.
نۇرگۇل ماۋبەرلينوۆانىڭ اتاپ وتۋىنشە، قاۋىپسىزدىك سەرتيفيكاتى ناقتى زاڭعا قايشى كونتەنتتى شەكتەۋگە مۇمكىندىك بەرەدى.
بۇدان بۇرىن حابارلانعانداي، اسقار جۇماعالييەۆ بۇگىندە ينتەرنەتتە زاڭعا قايشى كونتەنت ءجيى كەزدەسەتىنىن، سونداي-اق كيبەرلىك قاتەرلەر دە بار ەكەنىن اتاپ ءوتتى. وسى ورايدا ءتيىستى قورعانىستى قامتاماسىز ەتۋ ءۇشىن اتالعان قاۋىپسىزدىك سەرتيفيكاتى ىسكە قوسىلادى. اتالعان سەرتيفيكات رەسۋرستى ەمەس، ناقتى قۇقىققا قايشى كونتەنتتى شەكتەيدى.
ايتا كەتەيىك، مينيستر ءار ادام سمارتفونعا قاۋىپسىزدىك سەرتيفيكاتىن ءوز ەركىمەن ورناتاتىنىن جەتكىزدى.
اۆتور: رۋسلان عابباسوۆ