پولشانىڭ 90 جاستاعى تۇرعىنى قازاقستاندا تۇراتىن وتباسىن ىزدەيدى
بۇل تۋرالى Kyzylorda-news.kz سايتى جازدى، دەپ حابارلايدى قازاقپارات.
پولياك ازاماتى ۋلا كوتاربا اگەنتتىككە الەۋمەتتىك جەلى ارقىلى جۇگىنىپ، ءوزىنىڭ شەشەسى يزابەللا برەستە تۋعانىن ايتقان. 30 -جىلداردىڭ اياعىندا اكەسى قاماۋعا الىنعاننان كەيىن كىشكەنتاي يزابەللا اناسىمەن جانە اپكەسىمەن بىرگە قازاقستانعا جەر اۋدارىلادى. الدىمەن يتۋمەن كەڭەسىنە، ارتىنشا اپكەسىنىڭ اۋرۋىنا بايلانىستى ماكينكاداعى اۋرۋحاناعا جىبەرىلگەن.
باسپاناسىز جۇرگەن ولاردى جەرگىلىكتى تۇرعىن ۋستينيا ميرەنچۋك ۇيىنە اكەلىپ، سوڭعى نانىن ءبولىسىپ جەگەن.
سوعىستان كەيىن يزابەللا پولشاعا ورالادى. ءبىراق ۋستينيا اجەيدى ۇمىتپاي، حات جازىپ تۇرادى. كوپ جىل بويى جازعان حاتىنا جاۋاپ بولماي، تەك 1970 -جىلى ودان ماكينكاعا شاقىرعان حات كەلگەن.
كوكشەتاۋ اۋەجايىندا اناسىمەن بىرگە كەلگەن يزابەللانى ۋستينيانىڭ ۇلى پەتر كۇتىپ الادى. ولار ماكينكاعا دەيىن ۇجىمشاردىڭ ديرەكتورى ارنايى جىبەرگەن ماشينامەن جەتەدى. كوپتەن كۇتكەن جۇزدەسۋ بولىپ، كول-كوسىر جاس توگىلەدى، ەستەلىكتەر ايتىلادى. كەيىنىرەك پەتر ىنىسىمەن بىرگە يزابەللانىڭ شاقىرۋىمەن پولشاعا بارىپ قايتادى.
ولار تاعى ءبىراز ۋاقىت حات-حابار الىسىپ تۇرادى، ءبىراق كەيىننەن بايلانىس ءۇزىلىپ قالادى. ال ولاردىڭ حاتتارى قازىر ساقتالماپتى.
قىزىنىڭ ايتۋىنشا، يزابەللا ۋستينيا اجەي تۋرالى كوپ ايتادى. ءوزى، بالالارى جايلى بىلگىسى كەلەدى. قاريا التسگەيمەر اۋرۋىنا شالدىققان. ونىڭ ەسىندە قازاقستانعا كەلگەنى عانا بار.
ۋلا اناسىنىڭ ارمانىن ورىنداۋ ماقساتىندا، بۇكىل قازاقستاندىقتاردان ۋستينيا ميرەنچۋكتىڭ وتباسىن ىزدەۋگە كومەكتەسۋىن سۇرايدى.