قىزىلورلىقتاردىڭ 90 پايىزى گازبەن قامتىلاتىن بولادى

قىزىلوردا. قازاقپارات - سىر ءوڭىرى حالقىنىڭ 90 پايىزعا جۋىعى 2020 -جىلى «كوگىلدىر وتىن» يگىلىگىن كورەتىن بولادى، دەپ حابارلايدى قازاقپارات ءتىلشىسى.

قىزىلوردا وبلىسى ەلدى مەكەندەرىنىڭ 85 پايىزى «بەينەۋ- بوزوي- شىمكەنت» ماگيسترالدى گاز قۇبىرىنىڭ بويىندا ورنالاسقان. جالپى ۇزىندىعى 1143 شاقىرىم بولاتىن گاز قۇبىرى ماڭعىستاۋ، اقتوبە، قىزىلوردا جانە تۇركىستان وبلىستارىنىڭ اۋماعىنان وتەدى. سوندىقتان الداعى ۋاقىتتا ايماقتا گاز يگىلىگىن كورەتىن ەلدىڭ قاتارى كوبەيەدى دەپ جوسپارلانىپ وتىر.

وڭىردە گازداندىرۋ جوباسىنىڭ ءبىرىنشى كەزەڭى بەس جىل بۇرىن باستاۋ الدى. قازىرگى تاڭدا ارال، ايتەكە بي، شيەلى جانە جاڭاقورعان سەكىلدى وبلىستاعى ءىرى اۋدان ورتالىقتارى «كوگىلدىر وتىن» يگىلىگىنە قول جەتكىزدى. بۇگىنگى كۇندەرى قارماقشى، جالاعاش، سىرداريا اۋداندارىنىڭ ورتالىقتارى بويىنشا گاز تارتۋ جۇمىستارى جۇزەگە اسىپ جاتىر. بيىل ولار دا «كوگىلدىر وتىنعا» قول جەتكىزەدى.

اۋدان ورتالىقتارىنان بولەك وبلىستاعى ءبىرقاتار اۋىلدار دا گازعا قوسىلىپ ۇلگەردى. بىلتىر شيەلى اۋدانىنداعى ىبىراي جاقايەۆ جانە بيدايكول اۋىلدارى اتالمىش يگىلىككە العاش قوسىلعان اۋىلدار قاتارىندا سانالادى.

قازىر وبلىس حالقىنىڭ 64, قىزىلوردا قالاسى تۇرعىندارىنىڭ 95 پايىزى گاز يگىلىگىن كورىپ وتىر.

 ايتا كەتەرلىگى، استانا قالاسىن گازداندىرۋ ماقساتىندا قولعا الىنىپ وتىرعان «سارى ارقا» ماگيسترالدى گاز قۇبىرىنىڭ قۇرىلىسى دا  قىزىلوردا وبلىسىنان ورنالاسقان. ول «قاراوزەك» گاز كومپرەسسورلىق ستانسياسىنان باستالادى.

اۆتور: ءادىلجان ۇمبەت