قىرعىزستان رەسپۋبليكاسى شىڭعىس ايتماتوۆتىڭ 90 جىلدىعىن كەڭىنەن اتاپ وتۋدە

استانا. قازاقپارات - ەل اۋماعىندا زاڭعار جازۋشىنىڭ تۋىندىلارىنا نەگىزدەلگەن سپەكتاكلدەر، قىسقامەتراجدى فيلمدەر فەستيۆالى، ادەبي كەشتەر مەن سالتاناتتى جيىندار ۇيىمداستىرىلدى،

دەپ حابارلايدى «حابار 24» ءتىلشىسى.

 شاراعا ەل پرەزيدەنتى دە قاتىستى. قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ باستاعان جوعارى لاۋازىمدى دەلەگاتسيا شىڭعىس ايتماتوۆتىڭ مەموريالدى كەشەنىنە بارىپ، جازۋشىنىڭ رۋحىنا تاعزىم ەتتى. ۇلى تۇلعانى ۇلىقتاۋ شاراسى ۇلتتىق فيلارمونيادا جالعاسىن تاپتى. سالتاناتتى جيىنعا پارلامەنت دەپۋتاتتارى مەن زيالى قاۋىم وكىلدەرى قاتىستى.

 سوورونباي جەەنبەكوۆ، قىرعىزستان رەسپۋبليكاسىنىڭ پرەزيدەنتى:

 - «شىڭعىس» ۇعىمى - ءبىز ءۇشىن قاسيەتتى ۇعىم سانالادى. ونىڭ ۇلىلىعى سول - ول تۇتاس قىرعىز حالقىن كۇللى دۇنيەجۇزىنە تانىتتى. ول ءوزىنىڭ شىعارمالارىندا حالىقتىڭ ءومىرىن سيپاتتادى. قاراپايىم حالىقتىڭ ومىرىنەن سىر شەرتە وتىرا، عالامدىق ماسەلەنى كوتەرە ءبىلدى. ادام ءۇشىن ەڭ قيىن مىندەت - ادام بولىپ قالۋ. كورنەكتى جازۋشىنىڭ بۇل سوزىنەن- اق ونىڭ گۋمانيستىك ۇستانىمىن اڭعارۋعا بولادى. ءار شىعارماسىندا ادام بولمىسى مەن ونىڭ جاسامپاز قۋاتىن سيپاتتاپ، ادامزات بويىنداعى ىزگى قاسيەتتەردى شەبەر سۋرەتتەيدى.

جازۋشىنىڭ وسى قاعيدالارىن بىشكەك تەاترلارىنىڭ ارتىستەرى ارنايى ازىرلەنگەن قويىلىمداردا جەتكىزۋگە تىرىستى. تەاتر ساحناسى مەن كينو الەمى شىڭعىس ايتماتوۆ تۋىندىلارىنىڭ ومىرشەڭدىگىن تاعى دالەلدەدى.

سۇلتان رايەۆ، قىرعىز رەسپۋبليكاسىنىڭ ەڭبەك سىڭىرگەن مادەنيەت قايراتكەرى:

 - شىڭعىس ايتماتوۆ - قىرعىز حالقى رۋحىنىڭ سيمۆولى. دەگەنمەن، ونىڭ شىعارماشىلىعى تەك ۇلتتىق قۇندىلىقتارعا عانا، عالامدىق قۇندىلىقتارعا نەگىزدەلەدى. ول - الەمدىك مۇرانىڭ ءبىر بولشەگى. جۋىردا ءبىز جاپونيادا بولدىق، كەشە عانا ماسكەۋدەن قايتىق. بارلىق جەردە دە ايتماتوۆتىڭ كىم ەكەنىن جاقسى بىلەدى.

 زاڭعار جازۋشىنىڭ 90 -جىلدىعىنا وراي بىشكەكتە شىڭعىس ايتماتوۆ اتىنداعى اكادەميا اشىلماق. ال جازۋشى دۇنيەگە كەلگەن شەكەر اۋىلىندا «شىڭعىس وردا» مەموريالدى كەشەنىنىڭ قۇرىلىسى باستالعان. بۇدان بولەك، ەل استاناسىنداعى اۋدانداردىڭ بىرىنە ۇلى ويشىلدىڭ اتىن بەرۋ جوسپاردا بار.

www.24.kz