سىر ەلىنەن استاناعا 90 توننا كۇرىش جەتكىزىلدى
جارمەڭكەگە قىزىلوردا قالاسى مەن 7 اۋداننان 380 تونناعا جۋىق ءونىم تۇرلەرى جەتكىزىلدى.
ونىڭ ىشىندە: كۇرىش - 90 توننا، جىلقى، سيىر، قوي ەتى - 15 توننا، ءسۇت ونىمدەرى - 6 توننا، ارا بالى، بالىق - 15 توننا، كوكونىس، قيار، قىزاناق - 50 توننا، قۇلپىناي، الما، المۇرت، ورىك - 4 توننا، سوك، تالقان، اس تۇزى - 1 توننا، باقشا داقىلدارى (قاۋىن، قاربىز، اسقاباق) 120 توننا، ت. ب. ونىمدەر ۇسىنىلدى.
«جىل سايىنعى داستۇرگە اينالعان جارمەڭكەگە سىر ەلىنەن 400 تونناعا جۋىق اۋىل شارۋاشىلىعى ونىمدەرىن اكەلدىك. ەرەكشە ايتىپ كەتەتىن ءسات بۇگىندە وبلىستىڭ اۋىل شارۋاشىلىعى سالاسى اسىرەسە سوڭعى 5 جىلدا جوعارى كورسەتكىشتەردى كورسەتۋدە.
وبلىستىڭ ىشكى جالپى ءونىمىنىڭ قۇرىلىمىنداعى اۋىل شارۋاشىلىعىنىڭ ۇلەسى %2,5 دان %3,7 عا ارتتى، اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيا 22,8 ەسەگە ءوستى. ودان بولەك سىر ەلى كۇرىشتىڭ ەلى ەكەنىن ءبارى بىلەدى. وسى تۇرعىدا ايرىقشا ايتىپ وتكەن ءجون، 2017 -جىلى وبلىستىڭ كۇرىششىلەرى 500 مىڭ توننا كۇرىش جيناپ كەزەكتى رەكورد جاسادى»، - دەدى قىزىلوردا وبلىسى اۋىل شارۋاشىلىعى باسقارماسىنىڭ باسشىسى باقىت جاحانوۆ.
باسقارما باسشىسىنىڭ ايتۋىنشا وبلىس قازىر نەگىزىنەن كارتوپ، كوكونىس، باقشا ءوندىرىسىن دامىتۋدى قولعا الۋدا. اتاپ ايتقاندا، اعىمداعى جىلى قىزىلوردا قالاسىندا يسپاندىق تەحنولوگيا بويىنشا اۆتوماتتاندىرىلعان جىلىجاي كەشەنىنىڭ قۇرىلىسى ىسكە قوسىلادى. بۇدان بولەك، 20 جىلىجاي سالۋ جوسپاردا بار.
سونىمەن قاتار اۋىل شارۋاشىلىعى باسقارماسىنىڭ باسشىسى وڭىردەگى اگروونەركاسىپ جاعدايى مەن سول سالاعا تارتىلاتىن ينۆەستيتسيا ماسەلەسىنە دە توقتالدى.
«ۇستىمىزدەگى جىلى جولداۋدا پرەزيدەنت اگرارلىقتاردىڭ الدىنا 2 ستراتەگيالىق ماقسات قويدى: ەڭبەك ونىمدىلىگىن تۇبەگەيلى ۇلعايتۋ جانە قايتا وڭدەلگەن ونىمدەردىڭ ەكسپورتىن ارتتىرۋ. قويىلعان مىندەتتەرگە قول جەتكىزۋ ءۇشىن وبلىستىڭ «اگروكارتاسىن» جۇزەگە اسىرۋدىڭ 2018-2022 -جىلدارعا ارنالعان ەگجەي- تەگجەيلى ءىس- شارالار جوسپارىن ازىرلەپ، بەكىتتىك. جالپى، وسى ءىس-شارالار جوسپارى شەڭبەرىندە اعىمداعى جىلى جالپى العاندا قۇنى 7,0 ميلليارد تەڭگەدەن استام 10 ينۆەستيتسيالىق جوبانى ىسكە اسىرۋ باستالادى»، - دەدى ب. جاحانوۆ.
ەلوردانىڭ 20 جىلدىعىنا ارنالعان جارمەڭكە اياسىندا حالىق اراسىندا ونىمدەردىڭ ءدامىن تاتىپ كورۋ شاراسى مەن مەرەكەلىك كونسەرت ۇيىمداستىرىلۋدا.
