ترامپ: يادرولىق قارۋدىڭ 90 پايىزى ا ق ش پەن رەسەيگە تيەسىلى، بۇل جاقسى ەمەس

استانا. قازاقپارات - فينليانديا استاناسى حەلسينكي قالاسىندا سوڭعى توعىز جىلدا العاش رەت رەسەي جانە ا ق ش باسشىلارى كەزدەستى.

كەزدەسۋ بەلگىلەنگەن ۋاقىتىنان 1 ساعاتقا كەش باستالدى، دەپ حابارلايدى «قازاقپارات» ح ا ا بۇقارالىق اقپارات قۇرالدارىنا سىلتەمە جاساپ.

ۆلاديمير پۋتين امەريكالىق ارىپتەسى دونالد ترامپپەن كەزدەسۋگە قۋانىشتى ەكەنىن، ونىمەن ر ف- ا ق ش قاتىناستارىن جانە الەمدىك پروبلەمالاردى تالقىلاۋ نيەتىن ءبىلدىردى.

«ءبىز تۇراقتى بايلانىستى جالعاستىرىپ كەلەمىز. تەلەفون ارقىلى سويلەستىك جانە ءتۇرلى حالىقارالىق شارالار الاڭىندا بىرنەشە رەت كەزدەستىك. ارينە، ءبىزدىڭ ەكىجاقتى قارىم-قاتىناستارىمىز تۋرالى جانە الەمدەگى كوپتەگەن تۇيىتكىلدى جايتتار بويىنشا ەگجەي-تەگجەيلى اڭگىمەلەسۋدىڭ ۋاقىتى جەتتى»، - دەدى رەسەي پرەزيدەنتى.

ول امەريكالىق ارىپتەسىن «قوناقجاي فينليانديا جەرىندە» كورگەنىنە قۋانىشتى ەكەنىن ايتتى. كەزدەسۋدە الدىمەن پۋتين ءسوز باستادى، ءبىراق جۋرناليستەردىڭ الدىندا نەبارى بىرەر اۋىز سوزبەن شەكتەلدى، دەپ حابارلايدى تاسس.

USA TODAY-دىڭ اقپاراتىنا سۇيەنسەك، ا ق ش پرەزيدەنتى دونالد ترامپ فوتوتىلشىلەر ءۇشىن ارنايى ۇيىمداستىرىلاتىن ءداستۇرلى قول الىسۋ كەزىندە رەسەيلىك ارىپتەسىنە «ساۋدا، يادرولىق قارۋدان قىتايعا دەيىنگى بارلىق ماسەلەلەردى» تالقىلاۋعا دايىن ەكەنىن مالىمدەدى.

پرەزيدەنت ترامپ «بۇكىل الەم امەريكا مەن رەسەيدىڭ اراقاتىناسى جاقسى بولۋىن قالايتىنىن» ءبىلدىردى.

كەزدەسۋ ۆلاديمير پۋتيننىڭ ماسكەۋدە كىدىرىپ قالۋىنا بايلانىستى بەلگىلەنگەن ۋاقىتىنان ءبىر ساعاتتاي كەش باستالدى.

فين پرەزيدەنتتىك سارايىنداعى كەزدەسۋدە ترامپ رەسەيدە وتكەن فۋتبولدان الەم چەمپيوناتىن ماقتاپ، ونىڭ «بارلىق الەم چەمپيوناتتارىنىڭ ىشىندەگى ۇزدىگى» بولعانىن ايتتى.

ا ق ش پرەزيدەنتى رەسەي باسشىسىنا امەريكان- رەسەي قارىم-قاتىناستارىن جاقسارتۋدىڭ مۇمكىندىكتەرىن كورىپ وتىرعانىن مالىمدەدى، دەپ حابارلايدى تاسس.

«ەكى ەلدىڭ بىرلەسە ارەكەت ەتۋگە زور مۇمكىندىكتەرى بار. (...) بارشامىزدى تولعاندىراتىن ماسەلەلەر كوپ، مەن ولارعا جاۋاپ تابامىز دەپ ۇمىتتەنەمىن. ەڭ ماڭىزدىسى - وسى»، - دەدى ترامپ.

«اقىر اياعىندا ءبىزدىڭ قاتىناستارىمىز ايرىقشا بولادى دەپ ويلايمىن»، - دەدى ا ق ش پرەزيدەنتى.

ۆاشينگتون اكىمشىلىگىنىڭ باسشىسى ۇنەمى «تاتۋ بولعان جاقسى» ەكەنىن ايتاتىنىن تاعى ءبىر رەت ەسكە سالدى.

ترامپ تاتۋلاستىققا ماسكەۋ مەن ۆاشينگتون عانا ەمەس، بۇكىل الەم ۇمتىلاتىنىن ايتتى.

«ءبىزدىڭ تاتۋلاسقانىمىزدى بۇكىل الەم قالاپ وتىر دەپ ويلايمىن»، - دەدى ول.

«ءبىزدىڭ ەلدەر - ەكى جەتەكشى يادرولىق دەرجاۆا. ولاردىڭ ۇلەسىنە يادرولىق قارۋدىڭ %90 تيەسىلى، بۇل جاقسى ەمەس - جامان»، - دەدى ترامپ.

رەسەي جانە ا ق ش پرەزيدەنتتەرىنىڭ كەلىسسوزدەرى بىرنەشە ساعاتقا سوزىلادى، سودان كەيىن ولار باسپا ءسوز الدىنا شىعادى.

USA TODAY-دىڭ حابارلاۋىنشا، تاڭەرتەڭ ترامپ ا ق ش جانە رەسەي قارىم-قاتىناستارى ەشقاشان قازىرگىدەي تومەنگى دەڭگەيدە بولماعانىن ايتقان. ا ق ش پرەزيدەنتى حەلسينكيگە جەكسەنبى كۇنى كەلگەن.

فوتو: ميحايل مەتسەل/تاسس