قازاقستاندا جىل باسىنان بەرى 9,8 ميلليون شارشى مەتر تۇرعىن ءۇي پايدالانۋعا بەرىلدى

نۇر-سۇلتان. قازاقپارات - قازاقستاندا بيىلعى جىلدىڭ 10 ايىندا 9,8 ميلليون شارشى مەتر تۇرعىن ءۇي پايدالانۋعا بەرىلدى.

بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات.

«10 ايدىڭ قورىتىندىسى بويىنشا 9,8 ميلليون شارشى مەتر تۇرعىن ءۇي پايدالانۋعا بەرىلدى، بۇل 2018-جىلعى وسى كەزەڭدەگى كورسەتكىشتى %100 قۇرايدى. تۇرعىن ءۇيدى ىسكە قوسۋ پايىزى جىلدىق جوسپارعا %75,4 قۇرادى. رەسپۋبليكا بويىنشا بارلىعى 84580 تۇرعىن ءۇي تاپسىرىلدى»، - دەپ اتاپ ءوتتى مينيستر 10 ايداعى الەۋمەتتىك-ەكونوميكالىق دامۋ قورىتىندىسى بويىنشا ق ر ۇكىمەتى وتىرىسىندا.

تۇرعىن ءۇي كولەمىنىڭ ۇلعايۋ كورسەتكىشتەرى ەلىمىزدىڭ 9 وڭىرىندە بايقالادى. بۇل تىزىمدە تۇركىستان (%130,4)، قىزىلوردا (%117,2)، اقتوبە (%116,7) قوستاناي (%115,9) وبلىستارى جانە شىمكەنت قالاسى (%116,4) كوشباسشى بولىپ وتىر.

الايدا، بۇعان قاراماستان، ۆەدومستۆو باسشىسى تۇرعىن ءۇيدى ىسكە قوسۋ بويىنشا قۇرىلىس قارقىنىنىڭ كەيبىر تومەندەۋى تۋرالى دا ايتىپ بەردى.

«تۇرعىن ءۇيدى ىسكە قوسۋ قارقىنىنىڭ تومەندەۋى جامبىل وبلىسىندا (%96,0) جانە نۇر-سۇلتان قالاسىندا (%64,2) بايقالادى. جىلدىق جوسپارعا (%105,0) قول جەتكىزۋ بويىنشا قابىلدانعان مىندەتتەمەلەردى ورىنداۋ ءۇشىن وسى اكىمدىكتەر ءوز جۇمىسىن جانداندىرۋى قاجەت. جالپى، جىل قورىتىندىسى بويىنشا مينيسترلىك جەتەكشىلىك ەتەتىن بارلىق سالالار بويىنشا ن ك ي جوسپارلى ماندەرىنە قول جەتكىزۋ جوسپارلانىپ وتىر»، - دەپ اتاپ ءوتتى ب. اتامقۇلوۆ.