قاسىم- جومارت توقايەۆ ايەلدەر قاۋىمىن 8-ناۋرىز مەرەكەسىمەن قۇتتىقتادى
قىمباتتى حانىمدار!
بارشاڭىزدى حالىقارالىق ايەلدەر كۇنىمەن شىن جۇرەكتەن قۇتتىقتايمىن!
سىزدەر الەمگە جىلۋلىق پەن جاراسىم سىيلاپ، جاقىن جاندارىڭىزدى ماحابباتقا بولەيسىزدەر. اياۋلى انالارىمىز وسكەلەڭ ۇرپاقتىڭ بويىنا ادامگەرشىلىك قۇندىلىقتاردى ءسىڭىرىپ، ولاردى ەڭبەكقور، ءبىلىمپاز بولۋعا تاربيەلەيدى.
بۇگىندە ايەلدەر قاۋىمىنىڭ وتباسىنداعى، قوعام ومىرىندەگى جانە مەملەكەتتى جان- جاقتى دامىتۋ ىسىندەگى ءرولى وراسان زور.
قىز- كەلىنشەكتەر وندىرىستە، شىعارماشىلىق جولىندا، ساياسات، بيزنەس جانە باسقا دا كوپتەگەن سالادا بيىك بەلەستەردى باعىندىرىپ كەلەدى.
مەملەكەت گەندەرلىك تەڭدىكتى ساقتاۋعا، ايەلدەر قۇقىعىن قورعاۋعا جانە وتباسى قۇندىلىقتارىن نىعايتۋعا ءاردايىم باسا ءمان بەرەدى.
انالارىمىز بەن ارۋلارىمىزدىڭ الاڭسىز ءومىرى - ۇلتىمىزدىڭ جارقىن بولاشاعىنىڭ كەپىلى.
سىزدەرگە زور دەنساۋلىق، ب ا ق- بەرەكە تىلەيمىن!
ءاردايىم كوكتەم كۇنىندەي جادىراپ جۇرىڭىزدەر!
ايتا كەتەيىك، كەشە، 7-ناۋرىز كۇنى مەملەكەت باسشىسى قاسىم- جومارت توقايەۆ 8 -ناۋرىز - حالىقارالىق ايەلدەر كۇنىنە ارنالعان مەرەكەلىك ءىس- شاراعا قاتىستى.
پرەزيدەنت ايەلدەر قاۋىمىن 8-ناۋرىز مەرەكەسىمەن قۇتتىقتاپ، ۇلتىمىزدىڭ دۇنيەتانىمىندا ايەلدىڭ ورنى ەرەكشە ەكەنىن اتاپ ءوتتى. سونداي- اق مەملەكەت باسشىسى سۇلۋلىق پەن نازىكتىك، مەيىرىم مەن شاپاعات - ءبارى دە ايەلدەردەن باستاۋ الاتىنىن جەتكىزدى.
«شىن مانىندە، ءاربىر ادام ءۇشىن انادان ۇلى، انادان قىمبات ەشكىم جوق. ەڭ قاستەرلى قۇندىلىقتارىمىز «جەر- انا»، «وتان- انا» ۇعىمدارىمەن تىعىز بايلانىستى. «اتا ۇلدى، انا ۇلتتى تاربيەلەيدى» دەيدى. بۇل ءسوزدىڭ ايرىقشا ءمان- ماڭىزى بار. ۇلت بولاشاعى ۇرپاق تاربيەسىنەن باستالادى. ءار بالانىڭ جەتىستىگى - انا ماحابباتىنىڭ جەمىسى. ۇلى اباي ايتقان «تولىق ادامعا» ءتان اسىل قاسيەتتەر ۇرپاقتىڭ بويىنا انا ارقىلى داريدى»، - دەدى پرەزيدەنت.