قازاقستاندا 8- ناۋرىزدا تۋعان قانشا ەر ادام بار؟
Massaget.kz ءتىلشىسى 8- ناۋرىزدا تۋعان ەرلەر تۋرالى قىزىق دەرەكتەرگە شولۋ جاسادى.
قازاقستاندا تۋعان كۇنىن 8- ناۋرىزدا تويلايتىن قانشا ەر ادام بار؟
ۇلتتىق ستاتيستيكا بيۋروسى مالىمەتىنشە، 27587 ەر ادام 8- ناۋرىزدا تۋعان.
8- ناۋرىزدا تۋعان ەر ادامداردىڭ مىنەزى قانداي بولادى؟
وسىنداي ەرەكشە كۇنى دۇنيەگە كەلگەن ەر ادامدارعا ادەتتە مىنا قاسيەتتەر ءتان ەكەن: ءورشىل، جاڭا جاعدايلارعا تەز بەيىمدەلۋ قابىلەتى، سىپايىلىق.
ولار كوپ جۇمىس ىستەيدى جانە تەرەڭ قيال مەن تۇسىنىككە يە. بۇل كۇنى تۋعاندار قارجىلىق قولداۋسىز ءوزىن سەنىمسىز سەزىنەدى. سونداي-اق، ولار ىسكەرلىك مىندەت پەن ول ءۇشىن جاۋاپكەرشىلىكتەن ەشقاشان قورىقپايدى.
8- ناۋرىزدا تۋعان قانداي تانىمال ەر ادام بار؟
8- ناۋرىزدا دۇنيەگە كەلگەن اڭىز ادامداردىڭ ءبىرى - ءانشى، كومپوزيتور، كۇيشى، اكتەر ماناربەك ەرجانوۆ. ول 1901-جىلى 8- ناۋرىزدا قاراعاندى وبلىسىندا دۇنيەگە كەلگەن. ەرتەڭ - اتاقتى ءانشىنىڭ 122 جىلدىق مەرەيتويى.
«ازىلدەپ جاتادى». 8- ناۋرىزدا تۋعان ەر ادامدار
8- ناۋرىزدا دۇنيەگە كەلگەندەردىڭ ءبىرى - الماتىداعى حالىقارالىق ينجەنەرلىك-تەحنولوگيالىق كوللەدجىڭ ستۋدەنتى ارسەن اسەت. ول بۇل كۇنى قىزىق سەزىمدە بولاتىنىن جاسىرمادى.
«ارينە، قىزىق بولادى. دوستارىم ازىلدەپ جاتاتىن كەزدەرى بولادى، جىل سايىن 8- ناۋرىزدىق قۇتتىقتاۋلاردى جىبەرەدى. بۇل كۇنى ءوزىمدى «بارلىعى تۋعان كۇنىمنىڭ ارقاسىندا دەمالىپ جاتىر» دەپ جۇباتىپ، سوعان ءماز-مەيرام بولىپ جۇرەمىن»، - دەيدى ول.
ال ءدال وسى دۇنيەگە كەلگەندەردىڭ ءبىرى الماتىلىق ايدوس توقان تۋعان كۇنىنىڭ 8- ناۋرىز حالىقارالىق ايەلدەر كۇنىنە ساي كەلەتىنى ىڭعايسىزدىق تۋعىزاتىنىن جاسىرمادى.
«قىزىق دەپ ايتۋعا كەلمەيدى، ىڭعايسىزدىعى كوپ. بارلىق جەردە بوس ورىن جوق، ءبىر جەرگە شىعۋ ءۇشىن 1-2 اپتا بۇرىن دايىندالۋ كەرەك، ال وعان ۋاقىت بولماي قالادى. سول ءۇشىن كوبىنە 8- ناۋرىز دەمالىس بولسا دا، كەيىن اتاپ وتەمىن»، - دەيدى ايدوس.
ول بۇل كۇنى قىزدارعا قوسىلىپ، ءوزى دە گۇل العان كەزدەر بولعانىن ەسكە الدى.
«1-كۋرستا قىزداردى قۇتتىقتاۋ كەزىندە بارلىعىنا گۇل بەرگەن كەزدە ماعان دا گۇل بەرگەن. ءبىراق ىشىندە ءۇسىپ قالعان، قىزدارعا بەرۋگە ۇيات گۇلدى بەردى. مەرەكە قارساڭىندا اپايلار قىزدارعا سىيلىق جاساپ، باعا قوياتىن كەزدە ماعان دا قوسىپ قويىپ بەرەتىن. ال كەيدە ءتىپتى قاربالاستا تۋعان كۇنىم ەكەنى ۇمتىلىپ تا كەتەتىن ەدى»، - دەيدى ول.