الماتىدا قاڭتار وقيعاسى كەزىندە ادام ولتىرگەن ينكاسساتور 8 جىلعا سوتتالدى

الماتى. قازاقپارات - الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتى قاڭتار وقيعاسى كەزىندە اقشا ايىرباستاۋ پۋنكتتەرىنىڭ ءبىرىنىڭ جانىندا كىسى ءولتىردى دەگەن كۇدىككە ىلىنگەن ادامعا قاتىستى ۇكىم شىعاردى، دەپ حابارلايدى قازاقپارات ءتىلشىسى.

سوت انىقتاعانداي، بىلتىر قاڭتار ايىندا توتەنشە جاعداي كەزىندە ينكاسساتور بولىپ جۇمىس ىستەيتىن سوتتالۋشى ب. اقشا ايىرباستاۋ پۋنكتىنە شابۋىل جاسالعانى تۋرالى شاقىرتۋعا بارعان. جوعارىدا اتالعان جەرگە ول ارىپتەستەرىمەن بىرگە كەلگەندە جابىرلەنۋشى ن. -نى جانە باسقا دا ادامداردى كورگەن. ال اقشا ايىرباستاۋ پۋنكتى تونالعان.

«سوتتالۋشى ب، ۇرىلاردى دالاعا شىعارىپ، قولدارىن بايلاماق بولعان، وعان جابىرلەنۋشى ن. قارسىلىق كورسەتىپ، قاشىپ كەتۋگە ارەكەت جاساعان. وسى كەزدە جابىرلەنۋشىنى قۋىپ جەتكەن سوتتالۋشى ونىڭ ارقاسىنان اتقان. جارالانعان ن. كوپ قان جوعالتۋ سالدارىنان اۋرۋحانادا كوز جۇمدى»، - دەپ اتاپ ءوتتى قالالىق سوتتىڭ باسپا ءسوز قىزمەتى.

سوتتالۋشىعا ق ر قىلمىستىق كودەكسىنىڭ 106-بابى 3-تارماعى «دەنساۋلىققا قاساقانا اۋىر زيان كەلتىرۋ» بويىنشا ايىپ تاعىلدى. سوت جازا تاعايىنداۋ كەزىندە كىناسىن ءىشىنارا مويىنداۋ تۇرىندەگى جازانى جەڭىلدەتەتىن ءمان-جايلاردى جانە سوتتالۋشىنىڭ اسىراۋىندا جاس بالالاردىڭ بولۋىن ەسكەردى.

«سوت ۇكىمىمەن ب. ابايسىزدا جابىرلەنۋشىنىڭ ولىمىنە اكەپ سوققان دەنساۋلىققا قاساقانا اۋىر زيان كەلتىرگەنى ءۇشىن كىنالى دەپ تانىلدى. ينكاسساتور 8 جىلعا باس بوستاندىعىنان ايىرىلدى»، - دەپ حابارلادى سوتتان.

ۇكىم زاڭدى كۇشىنە ەنگەن جوق.