اۋا رايى ەسكەرتۋىن ەلەمەي جولعا شىققان 8 ادام جاۋاپكەرشىلىككە تارتىلدى

استانا. قازاقپارات - توتەنشە جاعدايلار ءبىرىنشى ۆيتسە- ءمينيسترى يبراگيم كۇلشىمبايەۆ قاردىڭ قالىڭدىعىنان كولىك قوزعالىسى قيىنداعان وڭىرلەردى اتادى، دەپ حابارلايدى قازاقپارات ءتىلشىسى.

«اۋا رايىنا مونيتورينگ جۇرگىزىلىپ، اۆتوجولدارداعى توتەنشە جاعدايلاردى جويۋ جانە الدىن الۋ بويىنشا ءتيىستى شارالار قابىلدانىپ جاتىر. بۇگىندە اۆتوكولىكتەر ءجيى قالىپ قوياتىن 3 مىڭنان استام جول ۋچاسكەلەرى انىقتالدى. وڭىرلەر بويىنشا قار قۇرساۋىندا كوبىنە اباي، اقمولا، اقتوبە، شقو، جامبىل، قاراعاندى، قوستاناي، پاۆلودار جانە س ق و اۆتوكولىكتەرى قالىپ قويىپ جاتادى. جولدا قالاتىنداردىڭ كوپشىلىگى اۋا رايىنا بايلانىستى ەسكەرتۋلەردى ەلەمەيتىندەر نەمەسە جازعى جانارمايدى قولداناتىندار»، - دەدى يبراگيم كۇلشىمبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، اۋا رايى قولايسىزدىعىنا قاتىستى ەسكەرتۋگە قاراماستان كولىك تىزگىندەيتىن جولاۋشىلاردى جازاعا تارتۋ زاڭمەن قاراستىرىلعان.

سپيكەردىڭ دەرەگىنشە، جىل باسىنان بەرى 8 ادامعا قاتىستى اكىمشىلىك حاتتاما تولتىرىلىپ، جاۋاپقا تارتىلدى.

ت ج م ورىنباسارى كوتەرگەن كەلەسى ماسەلە كولىك يەلەرىنىڭ بەلگىلەنبەگەن اۋماق جانە مۇز ۇستىمەن ءجۇرۋى.

«قىس مەزگىلى باستالعالى اقمولا، اتىراۋ جانە قىزىلوردا وبلىستارىندا قايعىلى جاعدايعا اكەلگەن بىرنەشە فاكت تىركەلدى. سونىمەن قاتار كولىگىمەن بىرگە مۇزعا ويىلىپ كەتكەن 8 جاعداي تىركەلدى. سالدارىنان 3 ادام قازا تاپتى»، - دەيدى ءبىرىنشى ۆيتسە- مينيستر.

بۇعان دەيىن حابارلاعانىمىزداي، قىس باستالعالى 3 مىڭنان استام ادام قار قۇرساۋىنان قۇتقارىلعان.