قاڭتار وقيعاسىنان كەيىن ۇستالىپ، ازاپتاۋدان ولگەن ادام سانى 8 بولدى
بۇعان دەيىن باس پروكۋراتۋرا قاڭتار ايىنداعى وقيعالار بارىسىندا 238 ادام قايتىس بولعانىن حابارلادى. ونىڭ اراسىندا 6 ادام ازاپتاۋ سالدارىنان مەرت بولعان.
ق ر ادام قۇقىقتارى جونىندەگى ۋاكىلى ەلۆيرا ءازىموۆا ورتالىق كوممۋنيكاتسيالار قىزمەتى الاڭىندا وتكەن شارا بارىسىندا ازاپتاۋدان 8 ادامنىڭ قايتىس بولعانىن راستادى.
«بيىل 14- ناۋرىزدا پارلامەنتتە قاڭتار وقيعاسى بويىنشا تەرگەۋدىڭ ناتيجەسى مەن بارىسى تۋرالى بىرلەسكەن تىڭداۋ بولدى. لاڭكەستىك اكتىلەرگە كىمدەر قاتىستى، قانشا ادام قايتىس بولدى - مۇنىڭ ءبارى بارشامىزدى تولعاندىرادى. ءبىراق تەرگەۋدىڭ جالعاسىپ جاتقانىن ەستە ۇستاعان ءجون. دەگەنمەن، بۇل قۇقىق قورعاۋ ورگاندارى مەن سوتتى ازاماتتاردىڭ قۇقىعىن ساقتاۋ جانە قورعاۋ مىندەتىنەن بوساتا المايدى»، - دەدى ەلۆيرا ءازىموۆا و ك ق الاڭىندا.
«ناۋرىزدا قاڭتار وقيعاسى كەزىندە 8 ادامنىڭ ازاپتان ولگەنى ايتىلدى. ال تاياۋدا باس پروكۋراتۋرا بريفينگ بارىسىندا زاڭسىز كۇش قولدانۋ سالدارىنان قازا تاپقان 6 ادامنىڭ بار ەكەنىن راستادى. بۇل سونداي-اق قوعام بەلسەندىلەرى مەن تاۋەلسىز قاتىسۋشىلاردان العان اقپاراتقا سايكەس كەلەدى»، - دەيدى ول.
ودان بولەك، ومبۋدسمەن قاڭتارداعى وقيعالاردان كەيىن قانشا ادام ازاپتاۋعا ۇشىرادى دەگەن ساۋالعا جاۋاپ بەردى.
«قازىر ناقتى سانى بەلگىسىز. سەبەبى ءوتىنىش ءالى دە ءتۇسىپ جاتىر. ەگەر قاڭتاردىڭ ورتاسىندا 10 شاقتى قىلمىستىق ءىس قوزعالسا، كەيىن ونىڭ سانى 100 گە جەتتى. قازىر ودان دا كوپ. پروتسەسس بارىسىندا ساندار وزگەرىپ جاتىر. سوندىقتان ازىرگە سوڭعى ءارى ناقتى سان تۋرالى ايتۋعا ءالى ەرتە»، - دەپ ءتۇسىندىردى ەلۆيرا ءازىموۆا.