قازاقستاندىق 8 وقۋشى ازيا وليمپياداسىنا قاتىسىپ جاتىر
26 مامىر 09:54

قازاقستاندىق 8 وقۋشى ازيا وليمپياداسىنا قاتىسىپ جاتىر

نۇر-سۇلتان. قازاقپارات - فيزيكا پانىنەن 22-ازيا وليمپياداسىندا (APhO) قازاقستاندىق 8 وقۋشى جۇلدەلى ورىندارعا باق سىناپ جاتىر، دەپ حابارلايدى قازاقپارات.

ۇلتتىق قۇرامادا نۇر-سۇلتان، الماتى، پاۆلودار، اتىراۋ جانە اقتوبە قالالارىنىڭ 10-11-سىنىپ وقۋشىلارى بار. ولاردىڭ بارلىعى - فيزيكادان رەسپۋبليكالىق وليمپيادا جەڭىمپازدارى مەن جۇلدەگەرلەرى. بيىل زياتكەرلىك سايىستار 24-31-مامىر ارالىعىندا ونلاين فورماتتا وتەدى. قۇرلىقتىق حالىقارالىق وليمپياداعا الەمنىڭ 20-دان استام ەلىنىڭ وكىلى قاتىسادى.

ونىڭ ىشىندە بانگلادەش، كامبودجا، قىتاي، ءۇندىستان، يندونەزيا، يزرايل، مالايزيا، موڭعوليا، پاكىستان، رۋمىنيا، رەسەي، سينگاپۋر، شري-لانكا، قازاقستان، ساۋد ارابياسى، تۇركيا، تايلاند، تايۆان، ۆەتنام سياقتى ەلدەر بار.

«قازاقستاندىق مەكتەپ وقۋشىلارى جىل سايىن فيزيكادان ازيا وليمپياداسىنا قاتىسادى. بۇل مەكتەپ وقۋشىلارى ءۇشىن ءوز ءبىلىمىن الەمدىك دەڭگەيدە كورسەتۋگە جانە ازيا- تىنىق مۇحيتى ايماعىنداعى ۇزدىك ەلدەردىڭ كوشباسشىلارىمەن باسەكەگە تۇسۋگە تاپتىرماس مۇمكىندىك. بىلتىر بۇل وليمپيادا ونلاين ءوتىپ، جەرلەستەرىمىز جاقسى ناتيجە كورسەتتى. 2021 -جىلى ۇلتتىق قۇراما 1 التىن، 3 قولا مەدال جەڭىپ الدى. بيىلعى ناتيجە بۇدان دا جاقسى بولادى دەپ سەنەمىز»، - دەدى «دارىن» رەسپۋبليكالىق عىلىمي- پراكتيكالىق ورتالىعىنىڭ ديرەكتورى تيمۋر نۇركەشەۆ.

فيزيكا بويىنشا ازيا وليمپياداسىنداعى جەڭىس بالالارعا ۇلتتىق قۇراماعا كىرۋگە جانە حالىقارالىق ماتەماتيكالىق وليمپيادادا (IMO) قازاقستان اتىنان شىعۋعا مۇمكىندىك بەرەدى.

جاڭالىقتار