USD 416.91 EUR 446.47
RUB 7.34 CNY 62.53
جاڭالىقتار

ەلوردادا 8-قاباتتاعى ءسابيدى قۇتقارۋعا قاتىسقان ساعي جىلقىشيەۆ توسبەلگىمەن ماراپاتتالدى

13 مامىر 12:08
:ءبولىسۋ
ەلوردادا 8-قاباتتاعى ءسابيدى قۇتقارۋعا قاتىسقان ساعي جىلقىشيەۆ توسبەلگىمەن ماراپاتتالدى

نۇر-سۇلتان. قازاقپارات – ق ر توتەنشە جاعدايلار ءمينيسترى استانادا تەرەزەدەن سالبىراپ تۇرعان ءسابيدى قۇتقارۋعا قاتىسقان ساعي جىلقىشيەۆتى توسبەلگىمەن ماراپاتتادى، دەپ حابارلايدى قازاقپارات.

ماراپاتتاۋ ءراسىمى بۇگىن نۇر-سۇلتان قالالىق توتەنشە جاعدايلار دەپارتامەنتىندە ءوتتى. ساعي جىلقىشيەۆ 8-قاباتتاعى تەرەزەدەن قۇلاعالى تۇرعان بالدىرعاندى قۇتقارعان ءسابيت شونتاقبايەۆقا كومەك كورسەتكەن. س. جىلقىشيەۆكە ەرلىگى ءۇشىن ق ر توتەنشە جاعدايلار ءمينيسترىنىڭ بۇيرىعىمەن «توتەنشە جاعدايداعى ەرلىگى ءۇشىن» توسبەلگىسى، العىس حات پەن قولساعات تابىستالدى.


ەسكە سالايىق، 11-مامىر كۇنى ءسابيت دوسىمەن بىرگە تاڭەرتەڭ جۇمىسقا بارا جاتقان كەزدە ادامداردىڭ شوعىرلانعان توبىن جانە 8-قابات دەڭگەيىندە ايعايلاپ تۇرعان بالانى كورگەن. ولار دەرەۋ پودەزگە جۇگىرىپ كىرىپ، كورشىلەر ارقىلى 7-قاباتقا كوتەرىلگەن. ءسابيت پەن ساعي قۇتقارۋ شارالارىنا بىردەن كىرىسكەن. سەبەبى ءاربىر سەكۋند ماڭىزدى بولدى. سابيت تەرەزە ارقىلى سىرتقا شىققان. ال ساعي ءبىر قولىمەن دوسىنىڭ اياعىن، ەكىنشى قولىمەن تەرەزەنى ۇستاپ تۇردى. «ءبىز ايعايلاعان داۋىستاردى ەستىپ، ءىلىنىپ تۇرعان بالانى كوردىك. ويىمىز تەك بالانى قۇتقارۋ بولدى، ويلانباستان جۇگىردىك»، - دەپ اتاپ ءوتتى ساعي جىلقىشيەۆ.

ەكى دوستىڭ بىرلەسكەن كۇش-جىگەرىمەن ساناۋلى مينۋتتا قىز امان-ەسەن قۇتقارىلدى. بۇل وقيعانىڭ ۆيدەوسى جەلىدە كەڭ تارالىپ، ەر ازاماتتاردىڭ باتىل ارەكەتىنە كوپشىلىك ءتانتى بولدى. ق ر توتەنشە جاعدايلار ءمينيسترىنىڭ بۇيرىعىمەن الدىمەن، س. شونتاقبايەۆ «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى، نۇر-سۇلتان اكىمى التاي كولگىنوۆ ونى جەكە قابىلداپ، لوكوموتيۆ زاۋىتىنا جۇمىسقا ورنالاستىرىلاتىنىن ايتتى. ال «G-پارك» قۇرىلىس كومپانياسى سابيتكە ءۇش بولمەلى پاتەر سىيعا تارتتى. كەيىن كوپتەگەن قازاقستاندىقتار مەن قوعام بەلسەندىلەرى سابيتكە بالانى قۇتقارۋعا كومەكتەسكەن ساعيگە دە قۇرمەت كورسەتىلۋى كەرەكتىگىن ايتتى. سولايشا، كەلەسى كۇنى ساعي جىلقىشيەۆكە GBG قۇرىلىس كومپانياسى ەكى بولمەلى ءۇي سىيلادى. ال بۇگىن ول ءمينيستردىڭ ماراپاتىن قولعا الدى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات