8 جىلىن قازاق بالەتىنە ارناعان جاپون بالەريناسى ەلىنە ورالماق
ءوز سۇحباتىندا ءبيشى قازاقستانداعى ءومىرى تۋرالى اسەرلەرىمەن ءبولىسىپ، قازاق بالەتىنىڭ ەرەكشەلىگى تۋرالى ايتتى، سونىمەن قاتار ەلىمىزگە، تۋعان تەاترىنا كورەرمەن رەتىندە كەلۋگە ۋادە بەردى، دەپ حابارلايدى «استانا وپەرا» تەاترىنىڭ باسپا ءسوز قىزمەتى.
- ءسىز ون جىلعا جۋىق كاسىبي قىزمەتىڭىزدى قازاق بالەتىنە ارنادىڭىز، ەلوردالىق تەاترعا قالاي كەلدىڭىز، ەلىمىزبەن تانىستىعىڭىز قالاي باستالدى؟
- بەس جىلداي ماسكەۋلىك تەاتردا جۇمىس ىستەدىم، 2013 -جىلى قازاقستاندا ورتالىق ازياداعى ەڭ ءىرى تەاترلاردىڭ ءبىرى اشىلادى دەگەندى ەستىپ، ءوز باعىم مەن كۇشىمدى سىناۋعا بەل بۋدىم. وتە قاتاڭ كونكۋرستىق ىرىكتەۋ بولدى، ارتىستەردى ءتۇرلى ەلدەن كەلگەن قازىلار مۇشەلەرى باعالادى، باعىما وراي، شىعارماشىلىق بايقاۋدان سۇرىنبەي ءوتىپ، «استانا وپەرا» ترۋپپاسىنا قابىلداندىم.
- قازاقستان بىردەن ۇنادى ما؟
- ءيا، البەتتە. مۇنداعى ادامدار وتە اشىق جارقىن، مەيىرىمدى، نيەتتەس. بالەت ترۋپپاسىمەن تانىسقان كەزدە دە وزىمە دەگەن وسىنداي قارىم- قاتىناستى سەزىندىم، مەنى قولداپ، كومەكتەسىپ، ءاردايىم اقىل- كەڭەسىن بەرۋدەن ايانبايتىن كوپتەگەن دوسىم بار.
- ولاي بولسا، نەلىكتەن جاپونياعا ورالۋ تۋرالى شەشىم قابىلدادىڭىز؟
- تۇسىنەسىزدەر مە، بالەت ءارتىسىنىڭ عۇمىرى قىسقا، مەنىڭ جاسىم 36 دا، كاسىبي مانساپتى توقتاتۋ ءساتى كەلدى، سوندىقتان توكيوعا، ساعىندىرعان وتباسىما ورالامىن دەپ شەشتىم. قىزمەت سالامدى اۋىستىرۋدى جوسپارلاۋدامىن، دەگەنمەن بالەت ماڭگى- باقي مەنىمەن بىرگە، ەندى تەك ءوزىم ءۇشىن اينالىسامىن. «استانا وپەرا» تەاترىندا جۇمىس جاساعان جىلدارىم ىشىندە ساحنا تورىندە جارقىن جەكە پارتيالاردى، تورتتىكتەردى، ەكىلىكتەردى جاسادىم، تەاتردىڭ رەپەرتۋارىنداعى تۇگەل دەرلىك سپەكتاكلدەردە بيلەدىم.
«شوپەنيانا» رومانتيكالىق بالەتىندەگى پرەليۋد ايرىقشا ەسىمدە، ول وتە كۇردەلى ءنومىر. وسىنداي ءماندى دە مازمۇندى مانسابىم ءۇشىن، اسىرەسە، «جيزەل»، «دون كيحوت» بالەتتەرىندەگى بىرنەشە پرەمەرالارىم ورىن العان ءوزىمنىڭ سوڭعى تەاتر ماۋسىمىم ءۇشىن بالەت ترۋپپاسىنىڭ كوركەمدىك جەتەكشىسى، رەسەيدىڭ حالىق ءارتىسى التىناي اسىلمۇراتوۆاعا العىسىم شەكسىز، مەن ءاردايىم ونىڭ قولداۋىن، ماعان دەگەن جىلى لەبىزىن سەزىندىم.
- سۇحباتتارىڭىزدىڭ بىرىندە ءسىز اتا- اناڭىز ءارقاشان كورەرمەن ءۇشىن بيلەۋىڭ كەرەك دەپ ۇيرەتكەنىن ايتقانسىز.«استانا وپەرا» تەاترى اشىلعالى ءسىزدىڭ ءوز كورەرمەندەرىڭىز پايدا بولعانىن جاقسى بىلەمىز.
- تەاترىمىزعا يگى، جانى جايساڭ جاقسى كورەرمەندەر كەلەدى، ولار ۇنەمى ارتىستەردى قوشەمەتتەرىمەن قولداپ وتىرادى. ءسوزسىز، كەز كەلگەن ءارتىس زالدان كەلەتىن قۋاتپەن جىگەرلەنەدى، ارامىزدا ەموتسيالارمەن الماسۋ جۇرەدى دەسەك بولادى. مەن بالەتتى قاتتى جاقسى كورەمىن، ساحناعا شىققان كەزدە ءوزىم ءۇشىن دە بيلەيمىن، بۇدان زور ءلاززات الامىن، سەبەبى ءاردايىم وسىنى ارماندايتىنمىن.
- قازاقستاندا وتكىزگەن جىلدارىڭىز ىشىندە ءوزىڭىز ءۇشىن قانداي جاڭا تۇستاردى اشتىڭىز؟
- مۇنداعى ادامداردىڭ جايدارى ەكەنىن جوعارىدا ايتىپ ءوتتىم. وسىندا تۇرىپ كەلە جاتقاننان بەرى قازاقتىڭ ءداستۇرلى تاعامدارىنا ۇيرەندىم، وتە ءدامدى ەت، اسىرەسە، قازى ءتىل ۇيىرەدى. بۇل ەلدىڭ سالت- ءداستۇرى مەن مادەنيەتى كەرەمەت. كوپ ۋاقىت بويى نۇر- سۇلتاندا تۇرعاندىقتان، قالانىڭ اسەم ساۋلەتىن اتاپ وتە الامىن، ول الەمدىك استانالاردان ەش كەم تۇسپەيدى.
دەمالىس كۇندەرى دوستارىمىزبەن جاپ- جاسىل ساياباقتار مەن گۇل باقتارىندا ءجيى قىدىراتىنبىز، مۇندا ءبارى دە جانعا جايلى، قولايلى، ءبارى دە كەرەمەت ويلاستىرىلعان. ءبىر جاعىنان، قازاق مەنتاليتەتىنە، مادەنيەتىنە ءسىڭىسىپ كەتتىم، وسى ەلمەن قوشتاسۋ كوڭىلىمدە مۇڭلى سەزىم تۋدىرادى. ارقامدا جاۋاپكەرشىلىك جۇگى بارىن سەزىنەمىن، سەبەبى مادەني ءومىر مەنىڭ ەسىمىممەن دە بايلانىستى: «استانا وپەرا» تەاترىنىڭ اشىلۋىنا قاتىستىم، مۇندا ماعان ارناپ تىگىلگەن كوستيۋمدەر دە بار. زور العىس سەزىمىمەن كەتىپ بارامىن، سەبەبى ءدال وسى قازاقستاندا الەمدىك اتاعى بار قويۋشى حورەوگرافتارمەن جۇمىس ىستەۋ مۇمكىندىگى تۋدى. اشىلعان ساتىنەن باستاپ تەاتر اۋقىمدى ءىس تىندىردى، باسقا ترۋپپالاردا مەن دايىن رەپەرتۋاردى بيلەيتىنمىن، ال مۇندا بالەتتىڭ تۇڭعيىعىنا تەرەڭىرەك بويلاۋعا، سپەكتاكل جاسالۋىنىڭ قىر- سىرىن ۇيرەنۋگە مۇمكىندىك بەرىلدى، وسىنىڭ ارقاسىندا بالەتتىڭ دۇنيەگە كەلۋى تۋرالى پىكىرىم تۇبەگەيلى وزگەردى، بۇل وراسان زور ەڭبەك.
كوز الدىمدا «استانا وپەرا» تەاترى قازاقستان مادەنيەتىنىڭ بەتكە ۇستارىنا اينالدى، وسى تاريحتىڭ ءبىر بولشەگى بولعانىم ءۇشىن ءوزىمدى باقىتتى سەزىنەمىن. ەندىگى كەزەكتە تەاترعا كورەرمەن رەتىندە ورالۋ جوسپارىمدا بار، ال ەگەر ترۋپپا گاسترولدىك ساپارمەن جاپونياعا ات باسىن بۇرسا، مىندەتتى تۇردە سىيلىقتارىممەن بارامىن.
«استانا وپەرا» تەاترىنىڭ ديرەكتسياسى، بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا بالەت ءارتىسى ماريكو كيتامۋراعا ۇلكەن زال ساحناسىندا سومداعان بەينەلەر گالەرەياسى ءۇشىن، قاجىرلى دا قايراتتى ەڭبەگى مەن جۇمىسقا دەگەن ءمىنسىز قارىم- قاتىناسى ءۇشىن شەكسىز العىسىن ءبىلدىردى. باسشىلىق ءارتىستىڭ جاڭا باستامالارىنا ساتتىلىك، مىقتى دەنساۋلىق تىلەپ، تەاتردىڭ ەسىگى ماريكو كيتامۋرا ءۇشىن ءاردايىم ايقارا اشىق ەكەنىن ايتتى.