بيىل باسپانا كەزەگىندەگى 8 مىڭ ازاماتقا جەڭىلدەتىلگەن زاەم بەرىلەدى

None
None
نۇر-سۇلتان. قازاقپارات - بيىل باسپانا كەزەگىندەگى 8,8 مىڭ ازاماتقا جەڭىلدەتىلگەن زاەم بەرىلەدى.

بۇل تۋرالى ۇكىمەت وتىرىسىندا تۇرعىن ءۇي ساياساتىنىڭ جاڭا تاسىلدەرىن جاريالاعان ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.

2020-جىلى ەلىمىزدە 15,3 ميلليون شارشى مەتر تۇرعىن ءۇي سالىندى. 140 مىڭنان استام تۇرعىن- جاي پايدالانۋعا بەرىلدى.

«تۇرعىن ءۇي قۇرىلىسىنا سالىنعان ينۆەستيتسيا 2019-جىلمەن سالىستىرعاندا ءوسىپ، 2 تريلليون تەڭگەنى قۇرادى. مەملەكەت قاراجاتىنىڭ 1 تەڭگەسىنە 5 تەڭگە جەكە ينۆەستيتسيا تارتىلدى. 38,4 مىڭ وتباسىنا مەملەكەتتىك قولداۋ كورسەتىلدى. ونىڭ ىشىندە 28 مىڭ الەۋمەتتىك باسپانا جانە 10,4 مىڭ جەڭىلدەتىلگەن زاەم بەرىلدى»، - دەدى ول.

ونىڭ ايتۋىنشا، بيىل جالپى العاندا قارجىلاندىرۋدىڭ بارلىق كوزدەرى ەسەبىنەن 17 ميلليون شارشى مەتر تۇرعىن ءۇي سالۋ جوسپارلانىپ وتىر. بۇل 163 مىڭ باسپانانى قۇرايدى.

«مەملەكەتتىك ينۆەستيتسيا ەسەبىنەن كەزەكتە تۇرعان 31,3 مىڭ ادامعا قولداۋ كورسەتىلەدى. 22,5 مىڭ الەۋمەتتىك باسپانا سالىنىپ، ساتىپ الىنادى جانە كەزەكتە تۇرعان ازاماتتارعا 8,8 مىڭ جەڭىلدەتىلگەن زاەم بەرىلەدى»، - دەدى بەيبىت اتامقۇلوۆ.


سوڭعى جاڭالىقتار